羅馬 Ciampino FIFe' 國際貓展

D 相好多朋友系 Facebook 見過。但有D朋友唔用 Facebook 所以我貼下系到。

出展比賽的得美人一個，英雄系義大利唔見得評判住，因為佢要贏多張系義大利境外的證書先可以升班繼續系義大利境內展。但帶埋佢，擔心佢見唔到美人系屋企亂黎。錯有錯著地，佢第二日開始適應翻貓展環境。

比賽結果，美人系佢果組得佢一個，佢有夠 standard 所以兩日都贏左2張證書翻黎。
第一日阿娘走左去做 steward －經常地唔夠人做“妹仔”，因為非常辛苦，5個評判無個系義大利人，一個法國評判識得少少意大利文，所有評判全部英文⋯⋯但5個“妹仔” （有男有女）得1個識得英文（阿娘）同1個識得法文⋯⋯其他唔知道點算成日拉住阿娘解話。所以第一日無相睇，因為阿爹懶影相⋯⋯
睇佢兩個幾纏綿⋯⋯第一日美人驚出個 box 死攬住英雄唔放，甚至要鑽入英雄個肚到⋯⋯最後隔離個朋友幫手（我系台到唔知道發生乜事）抬噻兩隻出黎分開，阿爹先可以帶佢上台。
第一日評判系挪威人，評語：少女入成貓組，佢仲發育中，所以好多野都唔系好肯定，整體 excellent，耳朵形狀優越，面型非常三角，耳朵 setting excellent。毛質非常挪威森林貓。系甘多⋯⋯ 其實⋯⋯佢唔系好知道點睇⋯⋯ 算。美人又非常緊張，我自己仲著住妹仔制服唔可以多嘴問。阿爹又唔問⋯⋯反正都知道佢唔系好識得睇⋯⋯
遇上其他挪威森林貓的配育員，其中一隻系米蘭黎，因為由我個評判睇，所以我有機會同佢講兩句，隻貓好靚仔，我問佢之後我可唔可以去佢個 box 到同佢傾，佢非常好人地話好呀。佢隻仔仔入 nomination 佢問我幾點開始，我話未知道，佢話佢系外面，如果到佢問我可唔可以叫佢，我話無問題。佢隻靚仔入到圍，佢問我可唔可以 present 佢，因為我自己都有挪威森林貓，識得舞佢地。我話當然無問題啦，甘好機會摸隻甘靚的貓，我點會放過！另外一個羅馬的配育員帶隻挪威森林貓參加絕育組，都系叫我幫手。我當然無問題啦！所以兩隻都系我 present BIS。落台等 BIS 的時候，我帶埋阿爹佢睇米蘭配育員隻靚仔，之後佢問我地可唔可以睇下美人，我話當然得啦。佢黎睇，問隻仔好靚，點解佢今日唔出，2張 CACIB⋯⋯要出去贏第三張。明白，佢邊到出品，Europa's 哇！你可以揾到隻 Europa's 翻黎，好強呀。我答：佢系最低 inbreeding 果胎，老豆系邊個，阿媽系邊個。佢有D印象點樣，我話佢個頭型唔系好 standard，佢摸英雄，話佢個頭未生好，幾大，2歲未做老豆。佢叫我地唔好擔心，佢D仔都系發育到1歲左右停噻，到做老豆2歲幾3歲先第二度發育，4個月重成1公斤（2.2磅）。果陣個頭同身先合翻比例（依家英雄系頭細身大⋯⋯）。美人，佢好有潛力呀！邊樹出品 Vimmerskongen，下？邊位，我講美人阿公同佢老豆個名佢就知道。哇！佢來頭唔細！唔怪得佢甘靚。我話暫時未知道，佢仲發育中，個頭有排都唔定型，不過好重手，對耳個型就應該唔會走樣。佢睇完話，美人走勢好好。不過我話揾佢都揾得我辛苦，我主要睇佢近親繁殖同英雄配會唔會低。再睇佢性格，健康最後有無英雄無D野先決定要佢。佢話都明，要齊甘多條件絕對唔容易。問佢有無入圍，我話無，我地唔旨在。問翻佢阿靚仔邊樹出品，Wood Lack！下！Wood Lack 邊個系佢老豆，Ulika 哇！！唔怪得阿靚仔個側面甘熟面口！同佢老豆一樣！（佢老豆系 08年世界冠軍個老豆）你米仲勁！佢微笑，話佢因為識得法文，同法國配育員溝通方便，所以所有  line 都系法國黎。如是者 BIS 米蘭靚仔大獲全勝 仲贏埋 Best of Best。米蘭配育員非常高興，佢話個結果完全唔估計唔到，因為靚仔唔系超好狀態。呢樣真，佢大件過英雄（佢4歲），但上手同英雄差不多重。佢好淡定⋯⋯淡定到系台到等到眠左！！

第二日，我上午無做妹仔，因為隔離個朋友星期日唔展，阿爹的描述令阿娘非常擔心同樣情況出現⋯⋯所以同妹仔阿頭講星期日我唔撈。由於阿爹甘辛苦先可以拎美人出 box，阿娘甘懶⋯⋯當然要捻辦法。我打開道門，放美人最鍾意的 remover cream 系枱，用半個鐘頭引到佢自己走出黎，佢乖就當然有甜頭啦。跟住準備下佢就帶佢上台，阿爹抱住佢，佢系甘震⋯⋯ 我問佢尋日都系甘震呀？系呀⋯⋯佢又唔系震唔停，間中停下，我就系佢停的時候俾 D cream 佢，震一陣，又停，又俾，之後就唔震，系甘望住我，我等一陣又俾少少。（我俾的份量其實好少，系手指頭點少少連1mg都無）。輪到佢見法國評判。法國評判話佢好好，但毛唔夠長，無底毛（當然⋯⋯佢甩噻⋯⋯換季呀麻！），呢個評判之前評過英雄，我知道佢識得睇挪威森林貓，所以當然就系甘問佢個額頭同個下巴佢點睇。佢話佢個頭生緊，其實個三角面型未完美，但個額頭同下巴應該會好 Standard，最重要佢10個月1個星期已經甘重，佢骨骼好好。好高好長，毛質地好好。我問顏色 ok 嗎？好好，佢顏色比例好好，好夠暖色調。佢好 elegant，叫我去佢後面睇，佢擺好美人，話佢真系好靚。 跟住佢同美人玩，美人又同佢玩！仲捻住佢驚到唔識得郁，仲鬼甘快手，評判同佢玩得開心，抱佢，佢就系甘 rub 評判，評判個頭靠近佢，佢仲嘴評判系甘rub⋯⋯簡直系到出賣色相，好在英雄唔系到，唔系就大鑊。評判話美人系好有潛力的 show cat。當兩隻不相伯仲的貓一齊比，評判會俾隻好似美人甘識得收買評判的貓贏，甚至佢系無另一隻甘 standard 都會贏出。（甘大家明白啦！）Nomination 美人無入圍，其實都知道，佢太細同D2歲貓女比一定無份，同佢D毛唔夠長。

午飯妹仔朋友揾我，佢系法國評判的妹仔，話下午唔夠妹仔做 BIS 問我可以唔可以幫手，我望下阿爹，佢話無問題，佢一個搞得掂。甘我口痕問佢，另外隻 group 3 法國評判點評語。點解我會問佢，因為我識得個主人，佢都系羅馬，但一個是非人，成日系我地後面唱衰我地，但見面就笑口⋯⋯假到絕，佢成日同人講佢隻女靚個美人，因為佢隻女的公公婆婆都系 World Winner，我系台到見到佢，佢個女系靚，好淡定，無好似美人甘震騰騰。但有無需要唱衰人呢？但小人就系絕對唔可以得罪⋯⋯朋友話評判鍾意美人多過果隻貓女，無得同場比（因為美人公開組，佢果隻仲系幼貓組）美人有佢無的，佢有美人無的，但整體美人好過佢（因為佢識得收買評判乎？）。我著制服就上台，另外個羅馬挪威森林貓絕育組個主人好緊張走黎揾我，話佢隻貓好緊張，點算，系米依家就要帶佢上台。我問隻貓做緊乜？佢話終於佢眠緊，我話可以等5分鐘，依家你佢揾我老公攞 F3 噴少少系手俾阿貓聞，甘佢就聞唔到其他貓的味會無甘緊張。我會同阿頭講我 present 你隻貓，你唔好擔心。佢帶隻貓上台，佢驚驚地，我就 T-touch 佢一陣放佢入 box 等 present。絕育組先，我 present 挪威森林貓，雖然無贏，但個配育員好開心，好多謝我同阿爹幫手，佢之前Dshow 無甘定。米蘭挪威森林貓星期日代左我個位，但好似有D唔同，佢唔點同我講野，最後佢問我可以唔可以present 佢隻靚仔，我話無問題（注意：Steward 系 BIS 唔可以 present 自己的貓）因為點托隻貓有技巧，我問佢我托得ok嗎，佢話 ok 但可以再好少少，教我點托高個屁股同前面隻手點”聊“到佢抬起個頭。同我托慣挪威森林貓我托得佢地好舒服呀，所以個個挪威森林貓的配育員都想揾個識得 present 的妹仔，因為隻貓舒服就唔亂郁，有分加。如是者 BIS 靚仔贏出但輸 BOB 但已經好好。之後同米蘭配育員講左幾句後，羅馬個是非配育員走黎揾佢，系甘擦鞋⋯⋯甘我明乜事情啦。又唔知道講D乜⋯⋯尋日同米蘭配育員仲好好地，今日甘⋯⋯ 我唔理，我問佢攞張卡片，佢話尋日俾左阿爹，我話保險少少攞多張。

一睇⋯⋯我知道佢系邊個啦！我識得佢個 cattery 名，因為我有特別留意佢其中一隻貓女，但已經收場， 佢做左成日妹仔，仲要開夜車14個鐘頭翻米蘭，唔好煩住佢，等我寫mail 煩佢好過⋯⋯ 我mail 佢話佢知道果隻貓女個配育員其實有 propose 過同一組合的幼貓俾我，但我無要，因為我知道佢已經有隻一樣血統書的貓女系義大利，甘根本系搞破壞！所以我無要到。佢回覆我，多謝我講佢聽，同知道我系點的人，佢好高興我無要，同從呢件事件知道我真正系一個點的人。佢話黎羅馬一定揾我，叫我教佢煮亞洲菜，如果我地北上話佢知道，佢想請我地食飯。

羅馬挪威森林貓絕育組個配育員系會場外同羅馬個是非配育員同我老公吹水（都話小人唔得罪得，呢D情況阿爹最識得做），絕育組個配育員問阿爹美人邊樹出品，個是非配育員竟然搶答 Vimmerskogen （我老公系主人都未答⋯⋯）跟住就將話題轉到佢隻貓的祖父母系世界冠軍⋯⋯ 因為美人個配育員（貓舍）系義大利唔出名，所以唔系好多人識得，因為佢地無點出口貓（我系美人出塞好似寫過）最遠果隻米就系美人⋯⋯通常都系丹麥同挪威，破例的一次系西班牙，之後就系美人同佢阿妹去左法國，所以義大利無乜人認識唔奇怪，但如果系講貓名，就系人都知道系邊隻，因為阿公系絕育組世界冠軍（但佢唔系 Vimmerskogen 出品，所以個名無呢個名）⋯⋯突然阿爹答嘴，哦⋯⋯世界冠軍，甘美人個75％阿哥都系2010年幼貓組世界冠軍，我老婆唔俾我講，不過你講開我又講下咯。阿爹形容佢塊面即刻紅噻，絕育組個配育員就唔識得合埋個口，但佢系好高興個樣。阿爹仲同佢兩個講“唔好話俾我老婆知道我講出黎，佢一定鬧鬼我，佢唔鍾意用佢阿哥個世界冠軍個名銜出黎講，費事人地期望太高”。其實我唔系唔俾佢講，佢老作，不過我覺得成日掛系口邊都無乜意思⋯⋯ 寫俾大家睇會寫，但系貓展成日講咩⋯⋯講得多都厭啦。

一個高興的週末，見到好多野，識得多D人，同品種唔同品種，羅馬，米蘭，佛羅倫薩的配育員，特別因為做妹仔，如果做得好，贏得好多配育員會信任，容易開始講野：）

最高興其實系⋯⋯入場的時候獸醫檢查，有乜好高興？因為獸醫檢查英雄個口（因為要睇有無貧血 － 病毒性疾病）打開佢個口，佢想叫隔離個獸醫黎睇（通常2－3個獸醫），睇乜，睇英雄D牙，有乜好睇，因為無牙垢⋯⋯對我系好正常的事情，我日日同佢地刷牙，英雄自細習慣仲鬼甘鍾意。佢話檢查過甘多貓（果日200隻，平均一個獸醫檢查65隻貓，D獸醫通常都唔止去一個 show 幫手）無一隻成貓好似英雄甘系無牙垢。可能會問，唔俾隻貓系洗左牙？甘果個系獸醫一睇就知無洗牙，同明顯地佢右邊系黃過左邊（左邊好白）因為佢用右邊食野。我話我日日幫佢地刷牙，佢話如果個個好似你甘就好咯，我地唔需要同貓洗牙甘麻煩。（有錢都唔要？）

毛球季節黎啦！

成屋都系毛球呀，好似西部片甘，好多毛球隨地滾。
春天我D大帝掉件羊毛低衫出黎。
公主掉得最早，跟住黑色的兩件開始。
部吸塵機無日得閒。

飲水，食草，擦毛， remover （去毛膏） － 春天少不了 － 減少 hairball 問題。

平時佢地唔點飲水（因為90％濕糧⋯⋯餅乾少飲水自然少），
呢段時間如果發現貓多飲水要注意一下，因為貓本來就唔會點飲水。
多飲水應該系有問題（大定小，小如毛球，大如腎病）

所以呢論煮貓食D牛肉，雞肉同火雞的時候都加多少少水，

等佢地飲多液體 容易D清毛球出體外。

英雄同美人日日隊草（平時都有，但呢論多左），公主對草無興趣。
日日同佢地擦毛，擦出黎的多到儲起夠織整件大碼羊毛衫。
平時都有日日擦下，佢地唔知道幾爽，（由細開始同佢地用個擦玩）
但無甘多，所以呢論要擦耐少少，多幾次由頭到尾巴，
雖然日日吸塵，夜晚好似無噻，但早上都系發現好多毛球。
草繼續種（屋企花園⋯⋯唔得，我驚鄰居D DDT 唔知道仲有無系到）。

以前D remover （去毛膏）系 pet shop 買，有幾個牌子選擇，價錢唔同。
其實求其買都可以，但⋯⋯我又衰，買左幾隻之後（我成日留起D盒）就系到比較D 成份。
凡士林份量有多有少，有D植物油純植物油，但我都覺得唔系好妥，因為成70％，80％油
同個指示話的份量我覺得太多⋯⋯最後⋯⋯
問獸醫建議！！

獸醫開左隻天然的我地D 大帝
牙膏裝，無凡士林，植物油，油的份量系50％。
因為獸醫專用，要系藥房買（雖然唔需要醫生紙）。
獸醫寫埋份量（呢樣我最想要！）
平時一個星期一次 1cm，如果發現有毛球（食野時候好似唔落格好似想翻扣，吐散毛 －D毛唔系一舊，好似人咳甘但無野出）連續3日，每次1cm。如果照盒上指示系1teaspoon （成2cm）
我發現呢個獸醫好鍾意 1cm，好多野用量都系寫1cm，同用藥份量好輕。

點解唔想要凡士林？雖然好多網上貓父母都話凡士林又平又方便。
我一支3隻貓用2－3個月，14歐元左右，如果系一隻可以用6－9個月，
但相對一日一 teaspoon 凡士林放落貓糧到系好貴（系藥房買的貴價食用凡士林500ml 都系8歐元）。
因為系消化唔到所以會用而貓唔會吸收過量油份對肝構成問題。
但其實凡士林對條腸有一定影響。
最早期凡士林系獸醫俾有便秘的貓用。但通常系獸醫診所到由獸醫俾（針筒，如果隊錯落氣管好大問題！）。
但便秘成因好多，毛球系其中一個。
甘大家就以為自己系屋企餵食凡士林就可以控制毛球問題。
但獸醫知道用的份量，同真系需要的時候先用到。（一 teaspoon 其實太多）
如果大家記得2年前英雄便秘，個舊獸醫無睇佢真正乜事情就俾5cc凡士林！
後來問過，獸醫正常一次最多系2cc，再唔得，肯定唔系其他問題，隔日都系2cc
⋯⋯ 所以一次 5cc 個份量仲令條腸情況更差（捻起就想掉個手榴彈入舊獸醫間診所！）

我地要星期俾一次，因為3件都長毛，D毛球問題容易D出現，所以獸醫建議我定時要俾。

如果吐左之後唔需要俾去毛膏，系吐唔出先俾，
水，草同去毛膏的作用系幫D毛纏結一齊，方便出黎。
所以吐左之後俾其實無作用，只系俾額外的油份。

如果短毛貓，平時可能都唔需要點俾去毛膏（好似我甘要一個星期一次），
但換毛季節，都系種定多D草，如果發現貓貓有毛球問題先俾都可以。

如果有毛球唔理，除左貓無食慾外，D毛球可以塞住條腸，越積越大越難出，
要動手術。

話時話⋯⋯前日英雄個傻仔本來想吐D毛球出理，
點知佢死要面，唔肯系兩位小姐前吐出黎甘失儀態，吞翻⋯⋯
又咳過，今次阿娘系佢旁邊打氣（跳埋舞啦！！）遮住兩位小姐，佢都系吞翻⋯⋯
尋日佢繼續無胃口，便便到無料到，應該系毛球卡住左唔上唔落。
所以額外俾1cm佢。
尋晚3：00吐左出黎，成食指甘粗同長（一半系公主D毛⋯⋯都唔明點解1紅2黑都一半吐出黎D毛系紅⋯⋯公主D全部都系佢自己⋯⋯），即刻清理，美人已經系到索呀索呀⋯⋯
美人暫時未吐，但應該系呢兩日，因為佢又好似卡住食唔落野個衰款：S
幾日英雄有翻胃口，但都系要繼續睇到佢地實。

英雄美人公主三角關係

8 個月大的時候影⋯⋯

9個月大 ⋯⋯

話甘快呢個細路女就快10個月大，佢其實同公主關係算系甘，最唔妥公主果個系英雄。

其實都唔系今日的事情，但事情根本解決唔到。英雄間中會系柄公主，但並非無原因佢會佢柄。
原因1：公主去完廁所無埋好D金。英雄就會先入廁所蓋好之後出黎柄佢。
原因2：公主對美人唔友善⋯⋯英雄即刻護花心切，即刻柄公主兩野。事情發生最多就系⋯⋯貓廁所，佢地是但一個入貓廁所，另外兩個系門口等（公主通常唔會）。出黎之後就好開心甘好似開 party。公主唔鍾意慶祝，會對美人“唔友善”甘就俾英雄柄佢。

原因3：阿娘只要大聲少少喝住公主（佢絕育之後成日餓，有機會就偷野食，俾我發現就叫住佢）⋯⋯英雄即刻柄佢！呢樣比較新。

解決方法，公主上完廁所即刻清理。但有時候唔夠英雄快，佢系廁所門口等⋯⋯
阿娘唔大聲叫公主，但廁所慶祝會唔一定照顧得到，因為叫唔走佢兩個⋯⋯

其他時間就無乜問題。其實公主唔合群，同佢唔系甘鍾意人抱得問題，我地都捻左好耐點解佢會甘，直至有一次同另一個配育員傾開佢有一胎7隻的時候有乜問題，就有D頭緒⋯⋯

公主有6弟兄姊妹。英雄有4弟兄姊妹。美人有3弟兄姊妹。公主的配育員完全系新手，屋企只有2隻母，一隻系公主媽媽，公主媽媽的第一胎。英雄個配育員20年經驗，成屋都系母貓（公貓住另一處方便管理）英雄媽媽已經做左媽媽幾次。美人屋企9隻貓同住，美人媽媽第二胎。

挪威森林貓一般3－5隻一胎(件頭比較大的貓，一胎的數目差不多系呢個，體積細D的會多D），個媽媽容易湊（件件都甘大⋯⋯阿媽再大都唔系甘容易湊甘多個）。但7隻以上其實個阿媽會好辛苦，（有朋友的緬因貓一胎9隻，但阿媽2個月後就去左）。如果個媽媽系新媽媽有D可能會唔系好識得湊，照顧教育唔到甘多隻細路。多過4 隻幼貓的時候會爭奶頭的時候，你可以話D貓好笨有8個奶頭都要爭？其實佢地先唔笨，阿媽媽躺下4個比較底，另外4個比較高，最後兩個近大腿，所以最方便的得3個。而且佢地決定邊個奶頭系自己，唔容易放棄會打。4－5隻的時候都還好，7隻的時候樓上會壓住樓下果D。所以會打（我地可能唔知道佢地打）

 － 公主可能就系甘情況下唔鍾意其他貓。因為佢比較害羞（佢配育員講），爭奶頭的時候俾其他貓擠左出去。

佢個配育員其實有同我地講，佢有幫手畏奶。但如果畏得佢唔舒服，就會聯想俾人抱等於唔舒服。佢仲要系新手⋯⋯
－ 公主可能系甘唔鍾意人抱。

公主系配育員處其實未見果成貓公貓⋯⋯同年紀的幼貓男孩子佢已經唔鍾意，可能系甘，佢唔識得接受英雄。
但公主系關心英雄同美人，但一同生活總有磨擦的時候，兼佢兩個爛玩精幾難頂。

美人同英雄呢，兩個老友鬼鬼。英雄教美人好多野⋯⋯包括⋯⋯食草。

最近一次英雄走去柄公主，發現一個有趣的現象，美人－ 佢本來系另一處，但聽到佢兩個開片，走埋黎，乜都無做，只系坐系佢兩個附近，奇怪的事情發生，英雄走開。

另一次早上，美人霸左廚房個窗口最好個位，公主走埋去，未等公主“出聲”美人一手踏住公主個頭，公主即刻唔郁。跟住美人放底手，公主就走開左。

有次美人系貓樹個吊籃到，個籃邊高度系我眼前少少，我走埋去，佢一手按住我個頭，我由得佢，跟住佢用另一隻手按埋，要我個頭移近佢，然後⋯⋯佢舔我個頭仲系甘系到 purr。佢依家系渣fit 貓。但公主唔一定想 under 佢，但唔敢亂黎，因為有個護花使者系到左住噻。

今日終於搬噻D文

但搬唔到D留言。其實舊 blog 會 keep。因為好多留言好有意思。
懶⋯⋯系真系懶寫 blog。因為 facebook 實在太方便。同舊 blog 上相超辛苦。
加上好多 blog 友都搬，所以都系時候搬。
個blog 令我結識好多朋友。一個美麗的回憶。
但會繼續系呢到寫，因為 FB 無辦法俾我長篇大論發神經甘寫。(定我老左，長氣）
搬的時候系一篇一篇甘 copy and paste，睇翻自己寫D野，由3句變2000字！哇，死唔死⋯⋯

呢論無寫，因為實在太太太忙⋯⋯
本來以為唔同公司續約恢復自由人身份會無甘忙⋯⋯有多D時間畫翻畫（其實都差不多，不過系電腦畫 ：S)
有好多朋友其實已經知道我幫我老公 D  Apple App 做 graphic design，後期⋯⋯越玩越興奮⋯⋯
玩埋 3D 動畫，再玩到⋯⋯3D 插畫，3D系一個無底深潭。依家開始要跟埋市場策略（點解好似走翻去做廣告甘⋯⋯）做到老學 到老，40幾歲人先開始⋯⋯但打自己工好好多。

聖誕500 cookie 大 project，然後⋯⋯PawPeds G2 開始跟第二班 （2月23日開始左）
今次得我同我師傅兩個跟，因為本來以為得12個人⋯⋯所以本來系得我一個，上次同我一齊跟果位葡萄牙挪威森林貓配育員跟 G1 英文⋯⋯點知道最後成16個（依家15個，有個壞學生自動離開），所以校長踢師傅落理幫我。但師傅已經跟緊G3瑞典文，G1法文，所以G2英文我分多D工作量。唔系師傅無時間翻譯 G3！！我等 G3等到眼都突。雖然師傅俾左本書名我自己睇住先，我都睇到差不多尾。可能要問校長俾個名等我買黎睇。

PawPeds 挪威森林貓課程揾我幫手寫 study material （搜集資料多）
PawPeds 文章繼續翻譯 （停一停，因為管理位太太搬屋，寫左都無得上住）
PawPeds G1 意大利文翻譯（我無甘勁可以翻譯意大利文，不過幫個朋友睇有無會錯英文意思）
公主，英雄，美人都安好，但D相貼噻上 FB⋯⋯美人個 GSDIV 報告出左，一如所料，normal，因為父母都系 normal，但義大利 ANFI 今年新規定，所有貓爸爸同媽媽最少要有 EX （出展）同品種中指定的 DNA test result。本來呢，我可以懶，問 breeder 攞父母個 result 交，但寫明要系 test result，我費事到時佢地唔接受，要我嘔個 result 甘煩，所以 test 左算。反正美人已經系第3代 normal 佢條 line 好 clean.（唔知道中文點寫！！）

之後意大利文的網站要改（working list 上由最低升到頭5啦！！）

羅馬貓展，美人6個月，英雄2歲

英雄 groom 好等評判叫上台，佢上次出展之後，今次鎮定好多。

美人第一次出展，呢張系星期六早上影。

佢自己一個系個 box 到，英雄個 box 系隔離。

不過下午佢見完評判之後都仲系好唔定。

將佢放入英雄個 box 到，佢就乖乖地眠，

同開始食。佢好跟英雄，英雄做乜，佢就跟，

佢見英雄好乖甘眠，佢又跟住眠埋一份。

貓展佢兩個都各自系自己個組別贏了，但無更進一步的到 nomination。但我地已經好開心，因為英雄比之前鎮定。美人呢，第一次但星期日有進步。因為其他 breeder 朋友問佢第一日點，佢叫唔錯，無怪叫，無走貓，淨系評判手到亂郁，同揾阿爹（佢系 papa's girl），classic 第一次出展貓動作，3個朋友（有男有女）即刻圍住佢，叫我地走開少少佢見唔到。每一個都學評判甘抱起佢，對住佢講一論，跟住放佢落桌子，另一個接馬，繼續甘做，等佢習慣下系陌生人手上，見唔到阿爹阿娘都有安全感。星期日佢系評判手就好好多，但評判桌子上的玩具實在太吸引⋯⋯都系郁郁貢，但評判都會明，甘細對D玩具無興趣，隻貓一定有問題啦。

評判對英雄的評價，我地都心中有數，都系果幾樣，但有D系個評判根本唔知道想點（或點講話你隻貓點解唔入圍，其實以為太多主觀因素，根本講唔清，又怕比人鬧），就求其老作（都唔系第一次，所以每次都好期待評判老作比賽邊個贏）。

對美人呢，讚不絕口，其中一個（因為兩日分別見2個唔同的評判）仲以為佢系男孩子，跟住睇下佢張 from 系女孩子（張 form 無名，得號碼，EMS code 同出生日期）！佢成長得好好（我做阿娘的聽到呢句最安慰⋯⋯嗚嗚⋯⋯兩日嗚嗚左2次⋯⋯太高興）佢呢個年紀已經甘大唷！佢呢個年紀已經出齊D毛！（哇！）佢實在比公主同年紀的時候大少少，但毛就真系唔清楚，因為唔同顏色，D質地有分別，同英雄同年紀的時候比，佢又真系好少少，但可能系氣候分別（英雄差不多6個月的時候系夏天）。佢好挪威森林貓 look （呢樣我知道），佢耳朵上果D毛再長D更好（我都知道）但應該會再長（呢樣我都知道⋯⋯）條尾長度ok（我都知道，但另一個話佢條尾長我就唔同意⋯⋯英雄條尾就真系長，不過依家個身長左，條尾未跟得上所以長度變成正常）。個頭好三角，耳朵 setting 好好（我都知道，本來估計佢地話佢對耳朵再大會更好，點知道無人講，反正已經捻定點答⋯⋯我地 breed 貓，唔系兔仔⋯⋯）。反而話佢個鼻梁夠直，額頭夠圓，同個 chin 夠 firm，呢幾點我地本來有疑問，因為我覺得美人個鼻梁同額頭個個星期都唔同樣， 我自己覺得佢個額頭唔系真系好圓，個鼻梁有一小小地唔平，但俾佢張相佢 breeder 同其他 breeder 睇，都話系直（哦⋯⋯甘我唔應該對到甘 close up 睇⋯⋯成日俾人話 我眼有尺），英雄細的時候個額頭都系圓，但大下大下就平左。但兩個評判都甘講，就聽住先。英雄可能做左老豆之後佢個頭會再生，因為發現佢呢年得個身系甘長同高，個頭同條尾無改變，因為個評判有問佢做左老豆未⋯⋯未⋯⋯等阿女大（好在無問我點解唔俾佢 offer stud service⋯⋯）。

星期日多得朋友幫忙揾到兩個系佢地個 ring 的兩個 double box 我地本來訂就系2個double，系朋友們同一個 ring，點知道⋯⋯都唔系點知道⋯⋯義大利人系甘上下，到 ring 的時候發現系兩個 single！所以星期六搬左去另一個 ring 到，揾到雖然唔系隔離，兩個之間朋友已經安定好D貓，無謂要麻煩人家，當然即刻搬⋯⋯搬的時候，個 steward head 揾我（已經10點幾⋯⋯），話系我日本朋友叫佢揾我，因為無 steward 俾芬蘭評判（要講英文），下！已經開始成個幾鐘頭，個評判無 steward？！甘即系逼我上馬⋯⋯ 因為規定，一個評判要有2個 steward 幫手⋯⋯佢一個都無⋯⋯真系義大利人的管理方法令人大開眼界。唯有超快消毒兩個 box 搬好之後，著 Steward 制服，掉底兩個細路俾阿爹湊，反正朋友們系附近，無阿娘應該 ok 掛⋯⋯（唔系⋯⋯英雄呢個 mamma's boy 唔見阿娘就超緊張）。之後日本朋友同我講唔好意思，因為佢老公已經做左 steward 佢唔可以掉底 D貓走埋去做，但識講英文的無幾人⋯⋯我話唔緊要，一個好好的經驗，睇多好多野（一如以往我系甘追住個評判問野，因為其他品種的標準我唔熟），同好多未見果的品種！收場的時候 steward head 問我系第幾次做 steward，我話第一次，佢話仲以為我系有經驗⋯⋯（吹張⋯⋯唔怪得乜都唔話我知道應該點做⋯⋯好在評判講2句我已經知道要做乜），系甘遊說我下次做（因為甘辛苦，仲識得講英文的唔多），我話會，跟住⋯⋯俾左25歐元我！我話做乜？佢話做 steward 有薪水⋯⋯我話系呀，佢講笑話早知道我甘懵，節省佢25歐元 哈哈。評判俾張 cert 我，讚得好好，都好開心，雖然累到 PK。原來籌夠 steward cert 可以做學生評判！有朋友話，不如一齊讀咯⋯⋯好，但暫時未得，慢慢黎，太多野要搞，但做 steward 會照做。

話說回頭其實點解死都要翻朋友們所在的果個 ring 到？有朋友互相照應，走開都有人睇住D貓，一定會走開，2件分別見唔同評判，唔同時間見。朋友們分別出展3－8隻，所以大家照顧大家的貓，雖然大家的品種唔一樣，但反而先可以溝通。點解⋯⋯

星期六的時候搬左其他 ring，唉⋯⋯遇到另一個系羅馬的挪威森林貓 breeder，上次展的時候大家都有講有笑，我系一個超級坦白的人，我話佢知道我之後個星期去瑞典接美人翻黎，系 group 3，佢問我好多有關美人血系D野，我又好坦白甘分享。但到佢答我佢隻仔D野的時候，我覺得佢一系就唔知道自己講乜，一系俾人老點⋯⋯佢話佢隻仔（雖然都系挪威森林貓，但同英雄唔同組，所以無關係，就算同組大家上台拗手瓜我都覺得我無野會隱瞞）0％ inbreeding。我話好事，4代0％，英雄同美人都系近4代0％，全套英雄高少少5點幾，美人呢2點幾，佢兩個後代中和少少得3點幾（講緊全套23代）。佢話唔系呀，系全套（16代或以上）系0％？心捻⋯⋯下？！你無野呀麻⋯⋯邊有挪威森林貓前4代唔系 heavy inbreeding？到第8代都仲有 heavy inbreeding 出現啦 ⋯⋯ 所有品種貓都系由 inbreeding 開始⋯⋯無可能0％。算啦，佢可能之後會知道⋯⋯話佢隻貓名門出品 bla bla bla，我對系波蘭的 breeder 同血系唔熟識，不過知道大部分都系由瑞典入口，但果2個名我見過（人名又唔見我甘好記性⋯⋯哀）所以由得佢自吹自擂，（後來我好奇⋯⋯走去 check⋯⋯ 全套系6點幾 inbreeding⋯⋯我又真系好衰同⋯⋯好貓）。上次貓展之後都有聯絡，不停問美人D野，但我又無話佢知道我 check 佢隻仔，費事佢以為我有其他企圖。有問我又必答，佢對美人條血系有興趣系好事，最少系未來可能可以合作。點知道⋯⋯原來佢系買左一隻同美人同組（同顏色）的貓女，細美人一個月⋯⋯ 上次貓展的時候佢一定已經系訂左，但一直唔出聲，系到問⋯⋯系怕美人會贏佢隻貓⋯⋯我想死⋯⋯有乜甘大不了呢？

星期六有個女人（同一ring）走黎英雄面前問，佢系 Europa？我答系呀，佢即刻走左⋯⋯招呼都無句⋯⋯怪人，算⋯⋯後來果個羅馬 breeder （就叫佢做癡肥女人吧，簡單D）介紹個怪女人系佢朋友⋯⋯都系 breed 挪威森林貓（義大利北部）。佢有隻貓仔同英雄同組（同色）不過系幼貓組，英雄系成貓國際冠軍組，唯獨可能系 BIV 會碰頭爭 BIV（我又唔覺得有乜問題⋯⋯點解甘鬼祟⋯⋯）BIV佢隻貓仔贏左（星期六，星期日另一隻贏左），因為同 ring 所以聽到佢點奚落英雄同自鳴得意。我走埋去恭喜佢，大讚佢隻貓靚（呢樣系事實，我都知道英雄失分的地方，佢唔 perfect 但有我要的野）。佢個口丫大左3秒之後先識得講多謝。之後都系無辦法溝通⋯⋯佢好求其應酬我打發我走，甘算啦，我開第一步，人家道門繼續關著，我都無辦法。癡肥女人星期六早上有走埋黎睇美人，幾靚幾得意丫，甘就走左⋯⋯佢系自己網站寫佢個新女女的祖父母都系世界冠軍（我識得兩個世界冠軍的 owner）所以佢覺得如果佢個女如果唔系血統書未到手（法國人做野慢⋯⋯），出賽一定贏美人⋯⋯其實我無所謂，有唔同血系出現系好事丫。我乜都無再同佢講任何其他野⋯⋯無謂得罪小人⋯⋯但有去世界冠軍貓展的朋友（MainCoon)一見美人，佢好靚！未見過義大利有甘水平的貓（佢地去好多展，南到北個個城市都去齊），跟住問，佢好熟面口，好似系世界冠軍貓展見過（佢地當中D貓有贏世界冠軍或 BIV ）同佢好似樣的貓⋯⋯ er 系，佢超過一半的阿哥（超過一半，因為同一個老豆，阿哥媽媽系美人的半個姐姐，同一阿媽⋯⋯，所以照計系超過一半）系3－6個月幼貓組世界冠軍⋯⋯我地其實都好後知後覺（死未？）。朋友們：唔怪得啦！我隻就系輸左俾佢阿哥，唔怪得佢甘熟口面。佢阿哥真系超級靚，佢真系好靚女！！好高興義大利有甘級數的貓！義大利挪威森林貓有救啦！（睇⋯⋯佢地將會系我地 BIS 的最大競爭對手⋯⋯但抱的態度如此，難怪佢地之間可以合作，將佢地的品種質素提高）我都知道我系貓展怪人。有幾多 breeder 出展目的唔系贏 BIV BIS 呢？（有⋯⋯我咯）我D朋友好知道我地系甘，好似志在參與就算 ：P

去貓展我有自己一套理論，

一，俾我自己D貓適應下唔同的人，唔同的氣味，唔同的聲音，我屋企靜英英，最嘈果件叫電視機（淨8：30後先會開）⋯⋯ 有人到訪，但系自己地頭，佢地自然會無問題。最多系個個星期帶佢地出超級市場同游下車河一次，見到其他人，但都無貓展甘近距離同多 － 重要離開自己地頭渦！日後佢地就唔會見到陌生人就驚，亂陣腳。出街，去見獸醫等，都唔會覺得 stress，有自信同安全感。依家英雄同美人一上車就大眠特眠，話知你死，有 treats 照食可也。好多路人（路上，超級市場同寵物店）見到佢兩個系個貓箱到，都好驚訝問，點可能佢兩個甘鎮定，我隻貓出門即刻怪叫，賴尿⋯⋯佢兩個仲可以睇住D魚流口水⋯⋯見到狗想出黎玩（無俾佢地出⋯⋯人家店內玩破壞咩⋯⋯）公主呢⋯⋯自小缺乏訓練（我地之前無知⋯⋯），所以出門大嘈特嘈，依家好少少，但好 stress。其實好簡單，佢兩個（英雄3個月，美人4個月）個個星期都帶佢地游車河，英雄因為再細一D開始，所以佢好容易習慣，同佢 breeder 自細已經訓練佢坐車，出門；美人大少少開始，2次之後已經無問題，從來無叫（系突然開快佢會叫兩聲，依家已經無）。間中兩個都會叫，一系太熱，或⋯⋯阿爹手車太辣⋯⋯

二，同其他 breeder 交流。睇其他貓（同品種或不同品種），學到好多野。因為經驗唔會寫系書到。唔同品種有唔同的經驗，但呢D經驗可能系自己品種上派上用場。

如果出展為左知道點 select 同贏，呢個觀念絕對錯，評判見的只系呢隻貓的外觀，同非常主觀的評選（健康呢？特別系遺傳病睇鬼到⋯⋯性情可以估到少少）。作為 breeder 連自己個品種應該長成甚麼樣子才符合標準都唔知道？甘選配目標呢？連自己目標都唔知道，靠評判講就不停甘改目標乎？？甘點做配育員？？？評判唔一定系 breed 你個品種，佢地可能見果成千的同一品種同色的貓，知道國際間的分別，系同一賽事中佢的經驗話佢知道邊隻佢認為系靚D。如果做配育員唔理貓健康，只為贏而選配，只會導致破壞整個品種基因庫（gene pool）同品種整體健康。點解？有配育員為贏而選配 extrem type，身體越配越長 － 脊骨會有問題，鼻越短越好 －貓呼吸唔正常，耳朵越大越好 －頭骨改變導致其他問題。有D inbreed 到離譜。甘同搞破壞有乜分別？甘做配育員不如唔好做。如果為贏多幾個獎，D貓容易叫高價錢⋯⋯哀（已經聽說有如此3人）。

做配育員系終生學習，我好慶幸有好的師傅，佢同我講，佢已經系貓會所有貓品種的評判，已經選育30年，但仲有好多需要學習，做配育員，如果真心愛貓，需要非常非常虛心學習，因為呢個領域非常大，仲有好多地方佢甘老經驗都只系一個開始 － 佢開始學習。

貓展之後幾日，26號美人足6個月

28號英雄2歲，但天氣唔好⋯⋯無影相，但貓展影左算。等好天先補影啦。

虎年 update 一下

趁今日有少少時間，安定咗少少，系下一個 G2 318開始之前，
寫下呢個就快發霉的 blog。
多謝多位博友的祝福，虎年過后，2貓暫時健康有進展。
先講老大公主
1月7日照超聲波，公主的心臟就唔系好正常，
子宮好多包囊同有液體，要盡快做絕育手術。
最快排到的時間1月11日上午11：00.
手術成功，等切片報告，驗清楚系咪癌病。
結果系只有普通包囊。
因為舊獸醫延醫2年，令子宮的情況非常惡劣。
1個星期我陪足佢24小時系佢间房。
直至佢完全康復。
現在，佢好健康，只系要睇住佢唔好食過量變咗“加菲貓”
要同佢玩貓餅游戲，等佢活動下。

英雄。
雖然D毛球出曬黎，但我地覺得佢都系有嘢唔妥。
2月6日帶咗佢去照 X-ray
獸醫由頭睇到佢落尾，都話佢好健康啵……
無任何異樣，無發燒，佢又無嘔食物（2次甘大把，都系D毛球作怪，反而毛球就吐咗2次）無拉（相反地佢便秘）
但 X 光片睇佢無嘢塞住條腸……
所有內臟都好正常，無異物
但5日佢拉咗一堆毛 ：S 可能就系最后果D唔上唔落的由便便出咗黎。
獸醫話，如果佢仲系無胃口，便便都如我們說描述的，
唯有照超聲波，但亦有可能好單純佢系心理病（相思病）問題，
預約咗11日10：00，
因為照超聲波的專科醫生只有周四上午駐診，
但7日開始佢有翻胃口。D便便又好翻D，
所以6日就取消咗，話我地想睇多個星期佢有無進展。
獸醫幫我地將個預約改咗下一個星期。
佢無好堅持，因為英雄實在好健康的樣子，
只系話，佢遲早都要照超聲波……
此話可解？
挪威森林貓有可能帶 HCM （心肌肥大）的遺傳病。
雖說緬因庫貓發病率比較高，但 HCM 系所有貓都有可能有。
緬因庫貓的配育員都好注重 HCM control
挪威森林貓好多配育員都開始加入行列。
英雄的親爹親娘無照過，所以都系照照安心D。

睇咗貓博友“貓日子”使用者付費 好身同感受，
我系咪過分憂心呢？英雄系咪只系心理問題呢？
英雄有毛球問題開始，已經系唔同的地方尿俾我睇，
想話我知道佢有嘢唔妥，但因為公主當時有問題，
唔可以排除佢因為對屋企人（貓）改變產生的反應。
但自從公主“放生”後，佢都有繼續尿系廁所外，
唔系大量，系幾滴，驗尿又話佢無問題。
連廁所我地都換咗個超大的（有時間影俾大家睇個超大“新屎炕”），
佢毛球問題解決後，胃口好咗少少
都有尿咗系外面的1次記錄。
發現佢便便有D粘狀物體……m…… 1日有，一日無
都系唔好埝太多，佢應該唔系單純的心理問題。
毛球塞咗成2個月，可能引起好多其他問題。
18日帶英雄照超聲波，
照所有消化系統同心臟。
英雄非常難搞，照超聲波要3個人先搞得佢掂 ：S
心臟正常，腎正常（無 PKD），淋巴正常，但
個膽有發炎！！膽管炎。但好在好輕微，膽管無塞住。
個肝無發漲，系見到有D異物流出個膽囊。
我對住個屏幕其實都唔知道照緊邊處，
系睇住獸醫個報告先知道，獸醫好專心甘對住個屏幕，好少同人講嘢，
系都系同英雄講，安慰佢，叫佢咪再亂郁，就快得，你乖乖地。
最多系叫我地拎下英雄，因為由旁邊照甘多……

膽管炎非常輕微，所以佢無發燒、無系甘飲水、無嘔，好活躍，凈系無胃口。
條腸都有少少發炎，獸醫話好難講系有雞先定有蛋先。

我有問，系咪因為免疫系統弱所以發炎
（獸醫覺得我系一個“問題師奶”，乜都問餐死—。—），
唔關事，（後來上網查過，膽管炎可以因為 FIP，FIV 導致，但由于英雄的淋巴無異狀，所以排除 FIP，公主12月已經驗血 FIV 同 FeLV都 Negative，所以照常理英雄都唔會有 FIV 同 FeLV）
細菌何處來？
膽管炎好多貓都會感染，原因不明。
雄性發病率比較高。


我自己的估計系因為條腸塞住太耐，連獸醫都估計唔到D毛可以塞甘耐……
因為無人埝過杜蟲藥可以搞成甘。
一直以為杜蟲藥系好安全，但如果無蟲，杜蟲藥的毒可以搞亂條腸，
第一次見獸醫的時候佢都系話呢個系有可能性。
而英雄系一只出來都無用口吐毛的貓，佢所有吞咗的毛都系便出黎……
D食物同毛球擺系條腸成個幾月……無細菌滋生就怪，
有可能D細菌走咗去膽到。
因為都系同一細菌搞到發炎。

接著抽血，我無跟住去，費事佢又將我變成“受難標志”
獸醫話佢好唔合作…… 當然，公主就非常容易搞，
因為佢驚到唔亂郁，英雄呢，得把聲，fuu 人但唔出爪，無動作……
抽血驗 chemical、 blood count 等等全套。
我要求驗埋 FIV FeLV （30歐元我豪得起），
獸醫都同意，反正同佢抽血甘辛苦，
佢地2個獸醫加一個助手先搞得佢掂……
抽的樣本夠驗埋，一次搞掂佢好過，雖然公主都系 negative，
但驗清楚大家都安樂。
獸醫開咗2種抗生素1種食10日，1種5日，12個鐘頭一次。
另加一種補肝（其實都系藥…… 不過藥成分比較低）一個月。
食物方面，無生肉。Hill's l/d ……但唔好味……
我地自行決定。
驗血同便便報告20日早上全部到齊。
便便無問題，驗血報告證實只系肝膽有問題。
FIV 同 FeLV 都 Negative。

結論：
我覺得好彩，系英雄甘輕微的狀態已經發現，
及早醫治，好多貓到有嚴重病癥先醫理，可能肝膽有比較嚴重的損毀，
更難醫治。

呢個獸醫好在系佢唔會亂用藥，
如果唔系一早我地覺得英雄條腸有問題，
佢就開俾腸的藥就算。
雖然好多病都可以用抗生素搞掂
但唔清楚真正原因，等于濫用藥物
（好似之前果個獸醫就系好例子，公主就系最好的受害者典范）

好在佢唔系一早求其用D抗生素打發我地走。
好有耐性。佢亦好明白，當貓主覺得自己的貓有問題，
就算系診所點睇只貓都健康，都唔可以排除佢系有問題的可能性。
因為貓主對住只貓一年365日（我系365日，其他可能少咗1/2個星期放假），
獸醫可能只系一年見只貓1個鐘頭（可能有D只系10分鐘）
好貓的行為變異完全系靠貓主描述。
我地亦好堅持，雖然張單好貴，我預咗，我情愿系其他地方 cut budget
但貓的預算永遠系 open - no limit！

貓唔識得話你知道佢邊到唔妥，邊到痛，
而且佢地好忍得。系靠貓主觀察有無異樣。

獸醫只能夠靠驗呢驗路睇究竟邊到唔妥。
同樣的病癥可以系好多種唔同的病。
我好多謝果位照超聲波的獸醫，佢救咗我地2貓。
唔系所有心臟科同專門做超聲波的獸醫有同樣的能力
我地後來繼續搵呢兩個獸醫的“底”，
發現超聲波獸醫系意大利小型動物心臟科權威，
超聲波的歐洲權威，仲開班授徒……
我地真系走狗運地搵到呢兩個獸醫。

土煞12月！

2009年終于過去，連最后一個月都唔系過的非常平安。
同阿妹申公主同英雄由12月開始，兩個都有D嘢唔妥，
最后換獸醫，公司要我用公司提供的 laptop 左邊的肩膀的舊患又黎騷擾我，
跟住唔知道講開乜，講到屋企附近又動土，今次比較應，
因為出門口系天井到就見到部推土機
阿妹即刻話 - 風水上土煞呀！即刻搵料教我擺陣擋煞。
擺咗之後，又真系好似好少少。唔理系真定心理作用，
最緊要全家平安。

23日見新獸醫之后，做咗D test 到現在為止，
英雄好翻D，但胃口仲系麻麻。但慢慢恢復。
公主呢，等7號照心臟。

23日之前因為兩件寶貝唔舒服，搞到屋企兩只兩腳動物都心不在焉。
圣誕節雖然近，但情緒低落到水平線下……公司D PK 又系到搞搞震……，
非常懷疑原獸醫的診斷，
寫 mail 問一個羅馬英國人緬因貓 Main Coon 的 breeder 一D問題
同講咗原獸醫的診斷後，
佢都覺得原獸醫錯，甘當然我地想換獸醫，問有無好介紹。
佢將我地的問題轉發俾佢的獸醫，問接唔接。
新獸醫肯接之後將聯絡電話交俾我地預約，
星期一一早打電話，兩日都爆滿，得23日（星期三）早上有時間……
緬因貓的 Breeder 用得佢15年，應該無問題，
我地已經第二次換獸醫……之前果個唔夠3年，呢個都唔夠3年。
兼新獸醫接開出展的貓，應該知道我地的要求同期望。
個 breeder 點識得？系羅馬同英雄系臺上爭最后入圍的時候就系佢只貓。
後來見到佢原來系我地個 ring 到，抽煙的時候又818講下貓。
聽佢有口音，問佢應該唔系意大利人嗎？佢話佢系英國人，
我話，我終于可以唔用意大利文！用英文大家都舒服D、
原來佢系香港住過！所以大家親切感又多少少。佢好好人，好多難得的經驗分享。
所以我地感覺“走頭無路”要換獸醫的時候就 mail 咗佢。
佢本來想我地帶英雄公主去見獸醫的時候陪我地去，但時間夾唔到。
叫我地見完之後話佢知道情況如何。我地話英雄無乜問題，等舊獸醫另一個 test 翻，公主兩個 test 即日有，再一個系 DNA 等過年後先有。。佢安心好多。
之後，新年前有D報告出咗，打電話俾佢祝賀新年的時候話佢知道個進度，
英雄去咗 Torino 做的 DNA test 系 negative
佢好開心，仲問我地有無同新獸醫約幾時同公主照，佢都約差不多時間，
因為佢的貓女好似懷孕，要照照，如果可以我地到時系新獸醫到見。

23日見個新獸醫，我列咗公主同英雄用咗乜藥，
幾時出現D乜情況的清單。所有公主同英雄的驗血報告俾新獸醫，有噻日期
新獸醫話 Shirely （個 breeder) 介紹的同 Shirely 都差不多（即系點呢？D嘢太清楚？？唔似意大利人？—。— 但擺明我就唔系意大利人啦）
佢檢查噻公主D驗血報告同公主由頭到腳包括皮膚，呢樣真系未見過之前D獸醫檢查，話好懷疑D驗血報告系做俾人，唔系俾動物……所以要同公主抽血做 test，
佢唔系好相信公主真系果個問題，因為無辦法吻合（報告同病癥包括子宮發炎），但心臟有怪聲，先同公主抽血做 DNA 先如果唔系呢只病就要照心同子宮，問
1.佢出展唔出展。唔出展，
2.甘我系佢脖子下少少剃D毛抽得唔得。無問題。
3. 我帶佢去助手間房（應該系消毒咗的地方）抽血，你地要唔要參與。
唔參與，費事左頭左勢。
4分鐘，公主剃咗的地方其實唔系好顯眼，由后面如果佢擰轉頭就會明顯。無搞到成身火酒味翻來。新獸醫話，佢好乖喲（我心埝因為你系獸醫唔系評判……兼因為我唔在場佢驚到唔識郁）。

到今日為止，兩件的血液、便便同尿尿（凈英雄）全部都系 negative，剛收到公主系 Padova 做的 DNA test 完全證明原獸醫錯到好離譜！！好在因為公主真正病因唔系呢個問題，佢用間 lab 有問題，兼一直都“醫錯病”！！叫好彩，如果傳染咗俾英雄，因為佢話唔會傳染…… 系我地自己發現原來系可以……所以未換獸醫之前抽血即刻做 DNA test，公主就等搵到新獸醫先處理，如果英雄本來無事但因為佢 not well informated 而出問題，我要佢俾死更難受！將會進行法律行動。

現在公主食得、瞓得，一切正常，無任何異狀，雖然自己系一間房到，英雄公主爹夜晚陪佢瞓，日間，用公司部 PK laptop 就我系佢房陪佢半日，其余時間要安撫英雄，佢可能因為粒“無厘頭”杜蟲藥搞到佢腸同肚痛，腸應該無問題，但可能因為便秘帶來 hairball problem 仲未清到，所以胃口差，等多幾日佢食只 cream 如何。公主健康算系良好。等7號可能知道多少少佢乜問題。

仲有，新獸醫診金好平……睇兩個花成1.5個鐘頭，40歐元含稅連英雄的便便同抽血！！其他 test 另計，但收費都叫平。特別系 FIV 同 FeLV 可以話全城最平。如果系收容所的貓狗，獸醫俾七折，包括驗血驗乜乜乜物都七折。仲有D result 好快，即日或隔日有（原本的要等2、3 日，真系等得黎死咗都有之），雖然打電話問比較辛苦，因為佢好忙，系診斷途中都要自己接電話。但有收據呢樣嘢系最好，唔需要問，俾錢之前張單已經系我面前。仲唔一定要俾現金，收信用卡同提款卡！呢樣好，唔系下下要搵地方又唔知道要幾多襟幾多。後來搵資料（因為想告之前個獸醫）張獸醫收據除咗系稅務上要求外，系醫學責任。如果無，即個獸醫唔愿意負責！！呢樣嘢，唔知道系咪所有國家通行，請各自修行。意大利的姐妹們，如果寵物需要有麻醉的，甚至系最普通的洗牙都好，做之前，獸醫一定會俾張同意書你簽，睇清楚先簽，唔俾的就帶寵物走，搵另一個獸醫，系做完之後，甚至未俾錢之前，一定要有獸醫抬頭有蓋章的收據，寫明做咗乜，無論系手術或只是診斷應該要俾你。特別系手術，需要麻醉的情況一定要收據，有乜冬瓜豆腐，你可以告到個獸醫除牌。

因為23日我地都鎮定少少之後，就發現我要開工整餅……
鄰居德國佬已經送咗D曲奇餅過黎，隔離阿太又一個餅，
唔回禮都好，我都想整D餅俾屋企人。
之前一個星期有少少時間就已經整好D dough
所以做的時候就唔需要太多時間。

因為時間關系，心情問題，
整唔到好似2008年甘大場面同大量的餅。
突然埝到不如整 3D 餅，
無餅模，求其搵張牛油紙剪個樹型，
篤4個洞 mark 位（兩個筍位的之間，一定要有個空間留俾發大咗之後的餅，如果唔系就企唔到四平八穩）要邊到開個入筍位
所以棵樹系90度一凹一凸入筍就企得到。
D chess board 就系之前個星期
為咗令自己分心唔好埝甘多的時候迫自己整定。
如果唔系成日偷偷喊，我真系會發神經。

D樹搞掂之後就用 royal icing 扮靚，
連整色整水都無，白色就上。
整埋個低座，都系果舊 dough 圓形一個就算。
用 royal icing ”茨“棵樹系上面。灑糖粉，擺好D chess board 包，
最鐘意就系，無嘢余下，全棵樹除咗塊膠同粒星唔食得之外。

9棵，老爺奶奶，小狼老豆、小狼、小琪、溫達老豆（其實唔系好想俾佢，因為佢又衰2嘢，1，24日吧渣要帶埋個女去佢阿姨到過，唔放溫達老豆，45年來第一次佢24日晚上無同老爺奶奶過，第二嘢，奶奶生日唔系意大利……個女掉底俾吧渣阿姨個 baby sitter 湊8日，奶奶當然“鵝”到反轉，點可能個女8個月，唔帶埋佢系身邊但掉底俾 baby sitter 噶？？）4個鄰居分噻，自己無留。

回應系，好好味，收貨。


圣誕節我老公生日，應佢要求……又系檸檬批一個。所以無影相。

26日無好似往年甘去奶奶到午飯，因為要陪下兩件毛球，2個半日唔系屋企，
佢地都未復原，奶奶都明白，
見到我好似鬼甘款（雖然平時都相去不遠，但無甘離譜）
所以都無“鵝”，雖然知道佢唔系好開心，所以27日補翻，佢又開心翻。

1月3日奶奶生日，去外面的餐廳慶祝，無理由奶奶生日仲要佢煮呀嘛……
雖然系佢請客……
奶奶一言“邊個系到，想黎就黎，生日就系果日，唔會等人”就明白
雖然佢話愛D仔，明白D仔難為之處，但心底都想自己生日D仔系身邊共享。
因為溫達老豆之前話，等佢翻來先慶祝，奶奶唔肯，唔等佢。
一如以往，老爺奶奶生日我一定整餅。今年唔整Casatta，
換下，因為小狼同小琪都唔鐘意甜的 Ricotta，
問咗小狼老豆，佢兩個蘋果同梨食唔食？……
小琪蘋果會食下，小狼就乜水果都唔食，除咗檸檬批個 lemon crud 系佢第一次鐘意食的水果 cream。
甘呀，整老友教的蘋果批啰，唔想又檸檬，雖然個檸檬批好受歡迎，
但唔好獨孤一味呀化，雖然都系近，換個餡都好過無新意。

個批白色…… 生日點都要“寫”下嘢。
就用咗D曲奇餅余下唔知道可以做乜好的 dough
用老爺俾我套模最細果個cut咗成40 plus 塊出黎。
D字系用整浸 rum 的 cherry 時候的糖漿，
寫咗之後灑顏色糖。
D花呢，因為奶奶鐘意花，所以用 butter cream
整。因為亂咗成個月，屋企紅色的食用色素干咗都唔知道…… 本來系可以用 strawberry 整色整水，但奶奶對 strawberry 過敏 ，最後，好彩屋企一定有 cherry 果醬，雖然無系紅，系紫紅色，有D顏色就 ok，因為埝住，如果小狼同小琪真系唔鐘意食蘋果，有D cream 佢地應該會食D Cream.

 D 花仔，好多謝老友寄俾我D嘴，
好正，34朵花搞到我手痛，
因為我慌死個 butter cream 會太軟，
雖然天氣凍，開車去餐廳要1個鐘頭，
車入面有暖氣，
我驚佢捱唔到，所以打到佢好“實”
唔會到時塌就無眼睇。好在到場都無塌到。

奶奶見到個餅，好開心，眼有淚光。小狼老豆攞起D花，你真好心機。
我鐘意整，但我要搵人幫我食先得啵。全部都話，你放馬過黎啦，我地多多都食得！
原來無吧渣的時候，大家都會開心同輕松D…… 英雄公主爹模仿吧渣的口吻的時候，大家的表情都系“我頂佢唔住”大家大笑，…… 連一年都見佢唔超過3次的小狼同小琪都唔鐘意佢……無得救。

結果，除咗小狼最後留底D蘋果（個底同個面佢就食咗），佢見到個餅的時候問我入面系乜，我話你食咗先試一口，如果唔系你連試都唔試，如果真系唔鐘意就唔好食，挑起你鐘意的先食啦，我整定D cream 就系驚你唔鐘意食，佢真系甘都食得出系水果。反而小琪好鐘意，仲再添，我話……其實有提子干，佢呆咗，因為佢系唔食提子干。我話好少，可能食唔出，兼D肉桂味蓋咗，原來佢連肉桂都唔鐘意，但唔話佢知道佢就食噻。當然老爺奶奶都再添，D cream 大家都隊噻俾小狼，佢話D cream 好正，我話……你食唔出有 cherry？ 佢眼都大埋！下有咩？？但甘好味，唔似啵！甘果醬有幾多水果味丫…… 小狼老豆同佢兩個仔女講，阿嬸（唉，唔認老到唔得）圣誕節特登問我你兩個乜唔食，特別整到你兩個都會食噶。奶奶聽到，走過黎我到，抱住我，系我耳邊講，“我真系好彩，好多謝，你真系好用心思整個餅，我知道你好愛護我地一家。”

一個餅，唔可以全部人都會食或鐘意食，就得一個就唔到7個，除咗個檸檬批，但圣誕剛整咗……我驚佢地會厭倦。但奶奶的生日餅，過去的經驗話我知道，如果唔系全家都鐘意，大家可以分享，佢有D遺憾，今年，我想佢再開心D，雖然唔系佢最鐘意的 Casatta 但全部人都分享佢的生日餅，兼佢都好鐘意呢個批，我覺得佢比舊年開心好多，溫達老豆唔系到的遺憾都無埋，無期望無失望系真的。我做多少少工夫又點話，我自己過癮一下，幫D新噴嘴開光，唔好埝太多公主同英雄可能會出現的問題，最后其實問題系…… 個獸醫，唔系佢兩個。兼小狼一個的口味容易照顧。甜到嘔的就可以搞掂佢。甘佢都唔會覺得唔開心，被逼食D對佢黎講難食到死的嘢，但又有甜品食喔，無需要叫多個甜品甘異相。

再追加，11月但全講貓

1.無相睇的嘢
消除基因突變：不可能的夢想 繁體版本，都系講貓選育，同配育員須知的概念。

未有時間翻譯住，等12月有時間休息一下先…… 好鬼辛苦。
最后公司俾我一日翻譯5500字的目標，雖然少咗，但都都系要做餐死。

英雄11月攤系沙發瞓的樣，因為壁爐好暖，佢就好開心甘攤開噻黎瞓，
佢太長……就到條尾，就對手仔入唔到鏡頭。我又唔想郁，如果我郁動佢就會卷翻埋，就影唔到佢呢個款。

英雄上電視
因為貓展，俾拉齊奧ANFI貓會主席叫咗去上電視做 promo。
大家可以見到英雄外，見下我老公個樣（唔好錯過，因為我從來都唔 post 我自己同我老公個樣系 blog 到）。
我無出鏡，因為只限一貓一人。（好彩走得甩）
但熱到兩件嘢死死下。

11月21、22日羅馬貓展
挪威森林貓公開組（成貓）10個月以上 第4組黑色深淺環紋組冠軍。
奇怪的系……佢呢種最典型的挪威森林貓顏色竟然得佢一個，
仲要系唯一一件挪威森林貓雄性成貓！其他唔系雌性就系幼貓。
所以贏出唔難……但去之前就驚驚地，
贏多一場就可以贏到國家冠軍的頭銜，但要等等…… 因為之后果D老甘遠，
12月12日有兩日系 Tuscany 北，但因為 吧渣個女要領洗，
走唔甩（吹漲，非常討討厭的吧渣）12月12、13日羅馬都有貓展，
但唔系 ANFI 主辦，贏咗都無用，但13日會去參展，等英雄適應下。

ANFI 的就要等2010年啰。國家冠軍之后個組別就系……國際冠軍……
唉……唔好埝，贏到最後呢場先算。

法國評判非常好人。
解釋得好好，
一見英雄就話，佢好年輕（very young male)
但一上手，好重，個骨格好好。
個身好長，毛質好好，底層毛未出噻，因為羅馬比較暖，應該2月先會出噻呢。但 ok 咖。條尾好好，夠長，D毛好夠分量，因為個肚到咖啡色唔夠多，失少少分，但因為佢會再大（系，挪威森林貓一直生長到3-4歲）所以算系依家我“評判”只能俾 ok，但你地唔好擔心，佢會轉顏色（系，我睇到英雄D咖啡色開始“走”出黎）。耳朵可以再大D，如果個尖再尖少少就更好，但世界冠軍貓對耳朵都系同佢差不多。額頭再圓少少會 perfect，頭型的三角好靚，耳朵 well set (唔知道點翻譯）。 但無貓系 perfect 甚至系世界冠軍都唔會完全 perfect。佢已經好好，臨場有D緊張，眼夠大，但圓咗少少，有機會帶多D去出比賽，佢會再淡定D 可以改善。CAC 評判仲講咗下次要注意D乜，同睇幼貓的時候要點睇。
好多謝呢個評判！星期日果個意大利評判就不提也罷，評價差不多，但無解釋。
最鐘意法國評判寫的“Expression” 句  comment  - Very sweet，意大利果個無寫。

11月28日，英雄一歲生日

甘快，英雄到羅馬已經8個月。
睇住佢系甘大，系甘生毛，好鐘意玩，好鐘意撒嬌（人同公主）
每一次教 command 佢都學得幾快。雖然佢無公主甘精，
但亦非笨貓。
出 show 可以大覺瞓，系評判手到最多對耳向下。
評判托佢上手的時候佢唔系甘樣，但評判一講嘢，佢對耳朵就向下。
可能法國評判D英文有D古怪……聽唔習慣。

生日飯，兔肉，20g raw 其他90g 系煮過，個面系熟，但入面系生生地。
佢唔鐘意食魚……同公主相反，但公主都鐘意食兔肉。
所以一家4口星期六的晚飯就系兔肉。
如果系公主生日，就系三文魚啰！

埋頭苦干的懶蟲浦頭一陣……續，有相睇！

貼3張甘大把…… 精選相，請唔好投訴 

英雄一生的第一次
1.俾評判評頭品足兼摸身摸勢

英雄一生的第一次 normation （中文唔知道叫乜）
2.俾個39唔識7的人抱（英雄仲覺得佢有怪味，落臺後系甘洗自己），仲要系甘多對眼面前，吵耳的麥克風呼叫同掌聲中、熱死佢的射燈中，跟住5個評判摸身摸勢后，度過非常之唔自在，系甘搵阿爹阿娘的5分鐘！（我地咪就企系影相個位到，因為 normation 貓主要系后面）

英雄一生的第一次
3.show 後飽暖思床褥，好累，normationshow 完之后系16：00要要等19：00先可以松人。早上見完評判之后已經食咗三文魚，完 normation 之後食咗牛肉（全部罐頭……無辦法煮新鮮）。英雄食飽飽之后，上埋廁所，入個細到唔恨的籠到，拖咗佢最鐘意的玩具 Doggy 攬住瞓，佢平時系攬住阿娘或公主，但當日無人俾佢攬，就拖咗 Doggy 黎攬。

貓廁所：個貓廁所唔系個籠入面，食又果到，去又果到……甘唔衛生，阿娘辛苦D帶個大廁所去俾佢好過，但貓展中，有途人（貓展收入場費每位7.5歐元睇貓），見到我系亞洲人面孔，就好唔客氣系個籠前面大聲甘同身邊的朋友講，“你睇下，呢D人幾衰，連廁所都唔俾貓去，擺乜展覽”。我聽到，即刻話“太太，個廁所系下面”，佢 O 曬嘴，以為我唔識得聽同講？我仲揭開臺前面塊布俾佢睇成個屋型的廁所。跟住話：我唔鐘意自己D貓系甘細的地方（63cmx 63cmx65cm高）的地方食同休息都要對住個廁所甘唔衛生。位太太當場同其他同行的人都“哦、哦，有道理”甘好快就閃人。
最唔鐘意D人掉嘢入貓籠，或用手篤！連我地系前面放咗塊透明膠板，都”料“到系塊板同個籠之間小小位都要摸，全場都貼曬，嚴禁放手指入貓籠都系甘……）同旁邊的緬因貓夫婦講，佢地次次都好想系個籠到通電，電下D人先會驚，有D貓主好絕，系暹羅貓的籠前面寫“你可以隨便放手指入黎，佢鐘意咬人，被佢咬到唔好同我投訴”

問心唔系甘鐘意去貓展，大獎一定系圍內人（評判朋友，搞手）贏。仲要等成日，不過今次好在身邊幾個貓主都好 nice，教咗好多嘢同8咗好多嘢。有人見到系場外間 bar 到，有個貓主送嘢俾個意大利評判。話衰在無帶手機，唔系影底佢都好。難得英雄都幾鐘意去，下次再俾佢去羅馬個展。

公主都有去，不過佢唔鐘意甘嘈，嬲爆爆唔靚女所以無影，佢連評判都唔想見，由得佢，我自在佢唔好怕出街，同慢慢無咗上次展覽的陰影，我就已經還神。貓展之后佢系好咗D，起碼系車到唔會嘈，會瞓同無甘 stress。

英雄高高在上

如果系公主同英雄活躍時段無動靜的時候……
阿娘就要四圍搵貓，
特別系英雄呢只好奇的7個月幼貓……
真系膽大包天，無有識死。好在阿娘經驗老到，
唔會隨時俾佢嚇到大叫，仲識得拎定部相機去影佢D罪證！
果日早上，通常佢食飽飽之前就會玩餐飽或先去洗手間方便一論。
通常都會嘈到死，但果日，好奇怪……無聲，上樓上搵下先。

入到睡房抬頭一望……
英雄你玩乜呀……駛唔駛上到甘高呀，
佢由個蚊窗到爬咗上窗到。
好在果日無開到個鐵花，唔系佢甘重
一定整爛個蚊窗鹿咗落樓下。
佢仲好淡定甘系個窗門上玩平衡木向我方向行。

我問佢：你想點呀？（佢唔識得廣東話…… 所以系英文）
佢就望下我，好似話，：點落黎呀阿娘？
阿娘：我唔會上黎救你，你要自己埝辦法落黎。
見佢好似唔系好有信心跳落地，因為個窗門會郁，
我走埋去扶住個窗門，
阿娘：OK, go 指住張床
佢聽到阿娘俾口令 go 佢就跳落床到。

挪威森林貓其實系幾高都夠膽跳落地。
所以我知道佢系夠膽自己跳落黎，
不過佢知道個窗門會郁，所以有D擔心。

我從來都無埝到佢可以自己爬到上去，
所以一直都好放心打開個窗門，
但至此之后……
如果開窗，睡房門都要關埋，
免佢又爬上去，如果佢等唔到我到，
心急或好勝自己跳落黎，個窗門會 fa 到佢，
甘的意外，當然唔想啦。

公主英雄新照片

久違的公主單人照片，呢張系剛買的新 matt 同水兜與食物兜。
其實想買個泉水式，但好驚英雄玩水搞到漏電…… 
所以都系等佢再大D先埝。話甘快，英雄已經6個月大。

上次寫少咗樣嘢，凈系掛住寫佢D牙…… 英雄5個月開始學“同人講嘢”。
系，同“人” 唔系同貓，佢俾公主遲好多同“人”講嘢。
同貓講貓話，同人當然系講“貓人話”貓同貓之間其實多數用身體語言、氣味、同“留言” 即系貓爪痕跡，通常都系遠距離就可以溝通。
如果要用到聲音，發聲時貓的口系會展開。
同人講嘢，唔系所有貓都會發展一套同人類溝通的貓語言。發聲的時候個口系合埋。同發出呼嚕聲唔同。最容易系同你打招呼，入屋叫人。
英雄因為一直都有公主同佢一齊，所以佢基本上唔點同人講嘢……
加上佢郁下條尾我地就知道佢想點，所以佢發展呢套語言遲公主成2個月。
最初佢同我講嘢都系開口（都唔知道佢系咪當我系貓……）但5月開始就有D無開口的語言出現。
到現在6個月，套語言都未發展得好好，無公主甘完整。可能男孩子的語言天份普遍俾女孩子低呢？

就甘睇佢一個好似好細件頭…… 都系俾公主系佢旁邊的時候對比一下就知道。

真系搞到同公主甘高甘大……佢仲有排可以大，可以大成點？估計會有8kg （同佢老豆一樣）或甚至更大……

英雄同公主近況

明日英雄足6個月大（我寫好之后睇下，明日5月28日，都好似系我自己的舊歷生日啵……端午節……系小樓子講定我知道，但無乜記性……求其啦）……依家先貼佢5個月大的相，希望大家唔好見怪
俾張公主同英雄的合照大家睇下先。唔好以為英雄仲好細件頭，公主系四腳企系到。英雄呢就坐系到，仲要dup 底咗少少個頭。睇下一張水平拍的就清楚D我想講乜。

睇清楚D未呢？




英雄究竟有幾大（以下全部都系5個月大的，明日6個月會再影之后再 update)

無得比較，都幾難估計……

有英雄公主爹俾大家有D概念英雄有幾大份。




呢張…… 有人可能會覺得嘔心，所以可以唔睇，但好少機會會見到貓換牙。
幼貓3-6個月會換牙，但唔系好似人甘掉咗系原本個位到生。
恒齒會系乳齒旁邊生，張像睇得最清楚系犬齒（上顎 ）
其他就同乳齒平排（內面）生所以好難影，果段時間日日睇英雄D牙就好似睇鯊魚個口一樣 （成口牙）

多謝郁記提點，最后系部 DS 到搵到個 micro 功能。
但最后都系一手影，因為英雄公主爹唔得閑理我……
我日日都對英雄俾佢睇D牙都睇到佢怕鬼咗我。

我日日睇，系想等乳齒掉下可以收起。
但搵唔到？！ 我成日聽到英雄系到磨牙（依家無嚕，因為出齊曬）我懷疑佢吞曬D牙落肚
公主出牙的時候無影，但都系……搵唔到D牙，但佢無英雄甘離譜，磨牙磨到嘈醒我。