毒奶事件引發的搞笑嘢

自從獸醫唔俾公主食貓餅之后，要有d淀粉質物體代替下，
雖然好多系網上的理論都系話貓系食肉獸，
唔應該俾淀粉質作為貓食。
我成日都系到話……系獸醫同網上言論之間選擇要信邊個的話。
我會選擇獸醫，有乜事，佢要負責，網上言論呢？有乜事系我自誤，仲害埋公主。
當然獸醫有指示系俾幾多分量，
所以系照到足黎俾。

淀粉質，本來獸醫叫我煮米飯咖……

公主呢……一直都唔鐘意食新鮮飯，所以就用嬰兒米粉，之后又有麥粉。

搞笑事件1，
公主系超級麻煩友，呢樣嘢唔系今日先知道。
有日發現D嬰兒麥粉已經食光。
其實已經搵咗幾日P字頭牌子的麥粉，不過搵唔到。
毒奶事件又甘熱，其實我都驚驚地d 嬰兒麥粉的品質可靠性……
所以又想試下俾住家米飯公主食。以前有飯，公主就已經唔理我。
聞2嘢就掉頭走 餓到佢屎屎下，情愿去舔墻同食自己的毛都唔肯掂兜飯
所以都系心大心細甘整咗兜飯加新鮮雞肉。因為系夜晚到天光個餐，
我見佢肯走埋個兜到食，于是就好安心甘安慰自己，
依家無貓餅，所以會食飯。就去瞓。
翌日5：45，公主如常甘系個鬧鐘響之前就黎抄醒我。
我仲以為佢食嘥d 飯，所以到5：45先搵我，如果唔系早在3：38就黎搵我攞食……
到走埋個貓飯碗到……全部白米飯都仲系到，不過D雞肉就已經食清光。
D白米飯系埋一邊，公主好有心機甘將D白米飯撥埋一面。
可能系要花時間將d 飯同雞肉分開，所以佢無3點幾黎叫醒我……
我望下公主，佢仲好得戚甘望住我，
”唔好埝住甘就可以逼我食埋D甘難食的白米飯……“ 真系吹波波。

搞笑事件2
由于公主同我d 白米飯玩”紅海“唯有要買麥粉佢食。
同公主爹去附近間 GS，點知到得 M 字頭只米粉。
公主爹話，甘俾公主試下啰，下，我已經話M字頭，公主唔要……（死未，連牌子都要指定……—。— 米粉就更加唔會要啦 
公主爹唔信邪，就買咗一盒，到屋企，我話，拿， 你睇住呀，
公主真系唔食M字頭的米粉…… 白米飯都仲可以撥開，
米粉無得撥開，就成兜貓糧都唔食
唯有開過兜無米粉的俾佢。公主爹話投降！聽日返屋企經過藥房買啰。

公主爹第二日放工，買咗1盒同1罐翻屋企。
1盒系P字頭的米粉，個罐系N字頭的”成長麥粉“！
連藥房都無最簡單的麥芬賣。公主爹話有，
當佢見識過公主唔要M字頭的嘢之后，就知道點都唔好買M字頭的嘢……
藥房凈見到有M字頭的麥芬，佢走去問藥劑師，
有無P字頭的麥芬，藥劑師話有M字頭個只的麥芬呀，
公主爹答，唔得，藥劑師就好有耐性甘話，其實都系一樣jee。
公主爹答，點會一樣，P字頭一定好D，因為我只貓唔食M字頭條 line，
凈系要P字頭……
公主爹個刻先發現自己甘講有D嘢唔妥……
因為個藥劑師忍笑忍得好辛苦，臉都紅嘥，好辛苦甘話P字頭有米粉，
轉頭之后（可能笑飽之后）問有無試過N字頭的成長麥粉？
公主爹話無啵，甘就兩樣都買咗翻屋企……
P字頭米粉都好啦，頂住先，N字頭的成長麥粉，我話唔得，
公主爹話你都未俾公主食你點知道唔得？下……N字頭重要成長，
雖然條 production line 可能唔同…… 不過就點都有D擔心，
攞上手睇下D成分，跟住話，你認為公主可以食牛奶、糖、香草嗎？
唔得，點可以俾公主食牛奶同糖咖，我話你自己睇，有牛奶、糖同香草，點俾佢食。
公主爹話甘呀，聽日翻藥房換，我已經問，要唔要我去換，
唔系又會笑死個藥劑師，公主爹話唔洗，
費事因為系佢買但我攞去換會唔換。
公主爹攞住罐麥粉去藥房，藥劑師先開聲，
你只貓話唔得呀？……
公主爹都唔覺得有乜問題，仲好自然甘答，
都無開罐麥芬，不過我老婆話唔成份有牛奶，成貓唔食得牛奶，會拉肚子。
藥劑師埝咗一嘢，話我知道邊個系你老婆喇，
系咪，成日攞住獸醫處方單黎買寵物藥物個位中國面孔的太太。
公主爹話，系啰成區得公主娘一個系亞洲樣咋嘛
（所以我都系咪行差踏錯，實在太容易俾人點相）。
我相信…… 呢次事件之后，我地兩個一定成為本區最出名的“貓癡”

p.s 我同公主爹無一齊去藥房，所以d 人好大可能唔知道我地兩個系兩公婆。
我攞住獸醫的處方藥單系 jerry 的，因為系羅馬搵唔到，反而呢間藥店貨源充足。
講開 Jerry，依家好咗好多，不過D上次剃咗D毛都仲未長出黎（差不多成4個月……）不過食量都可以 瘦咗不過 fit 咗。希望天氣凍D佢D毛會長得快d ,圣誕節就可以影翻張相。

第一次炆羊肉……

無相睇，因為炆完都系黑色一煲嘢……
點影都唔會靚字仔。
我呢世人都成四張黎緊…… 都系第一次煮羊肉。
真系做到老學到老。

無啦啦煮乜鬼羊肉……
事原早輪發現我呢個“超級寒冰掌掌門人”手掌同腳掌都不停出汗，
而手腳都系一樣全年凍冰冰
（夏天，公主爹同公主就好鐘意我，當我系人型冰機）

出汗出到成個 keyboard 都濕曬……
連日來，公主爹發現呢個情況無改善，話要逼我食牛排！！ 
我就拖咗好耐都無買，成日都有借口無買到
到星期六佢已經發火，拖咗我去肉店，發現有羊肉，
判我極刑 - 要我食羊肉！！ 就買咗返黎喇，
之后點煮好…… 我點知道？？！
突然佢想起同番茄哥系香港食果餐飯有羊肉煲，
佢覺得好味，D“蘇”味又唔強，問我識唔識整……
屋企乜鬼亞洲食才都無，全部都系小怪上次帶過黎，我一直都唔舍得用的材料。
點算……
系網上搵咗D料，不過仲系唔知道點入手（其實咪有系到拖）
跟住同小怪傾開，小怪話都系時候我要食翻D甘嘢，
之后我問點整好，小怪就俾咗娘親同我講。
娘親話我屋企百無 不過秘技系用酒可以去“蘇”味。
娘親教咗我飛水，之后點煮，甘就膽粗粗整。
飛完水之后，分咗一份俾公主（煮完佢一定唔可以食，所以分開煮俾佢食）
之后就攞咗我至愛的冬菇、竹笙同紅蘿卜加 Lauro 同紅酒炆，
隨手落咗D紀子落去……
（所以你可以想象煲嘢系黑色多，點影都系一 pat ）
正一中西合璧……
屋企連沙煲都無，都系用鋼煲炆咗2個鐘。
"蘇“味無乜，甘都可以OK……
公主個份再用清水煮咗幾分鐘就得喇。
我都系試下俾公主咋，平時D貓糧有羊，佢都唔要。
呢次返而同我清嘥，照鏡！

其實食過陣，公主爹睇唔到我系挑鬼走咗D羊肉，
凈系食咗兩舊仔，因為我連D冬菇都剪細件，同羊肉差不多大細。
甘大家都系黑色的時候，就唔覺得我系獨吞嘥D冬菇喇！

鵪鶉的同學

鵪鶉 好耐下之前有講過，成07年的8月的事啰！

呢輪又身痕走去經常光顧果間寵物店到搜刮新嘢。
同一個牌子，有純兔肉！

當然就趁手買咗啦。我俾兔肉問題煩擾咗都幾耐。
我唔知系我低能定真系太過唔多愿出街，所以好鬼孤陋寡聞，

郁記講佢系意大利時，去開個幾間超級市場都有凈兔脾賣。不過我就真系搵過4間超級市場都無。通常都系成只賣、半只或碎件。凈兔脾……無見過……

公主麻煩都嘔，鐘意食兔肉，不過如果系超級市場買果D碎件，通常都系原件“賣剩謝”之后，剁細拼細盒賣，當然就無原件或半賣甘新鮮，所以佢唔肯食……

半只，又太多，我同公主爹都唔系兔肉擁躉，間中都會食，不過次次公主都食唔到甘多。無理由夾硬要我地同佢分甘同味咖…… 其實一只兔脾的份量俾公主就夠食。分分鐘夠食2日添，不過第二日，公主就會厭…… 佢真系挑剔到無貓有 如果系屋企附近間肉店買，因為非常新鮮，第二日佢都會食…… 不過肉店就唔會凈賣一只兔脾俾我。

呢個另外頭痛咗好耐的問題！終于有呢盒純兔肉幫我搞掂

一盒115g 同鵪鶉一樣，比正常的罐頭大（一般罐頭系75g），價錢1.2歐元。

公主一聞到我開咋，就坐系佢張飯“膠地毯”（佢食飯個位，有兩張系Ikxx到買的兩張比一般餐桌用的膠墊大D，專俾寵物用的膠墊）等開餐。

我依家就可以安樂D，仲有多D時間做下其他嘢！（煮少1餐俾公主，可以節省我唔少時間）

公主4歲喇！

三條一，公主生日，
甘就已經4歲喇，

生日有乜好做……
咪大魚大肉一餐啰……
不過貓系食肉獸類，日日都系大魚大肉咖啦，
又唔可以局個蛋糕俾佢…… 甘……
又可以點慶祝公主生日呢？

公主爹同我兩條傻佬同傻婆，貢去超級市場，
睇下有乜俾公主做生日飯，
甘就買咗包煙三文魚啰，
一包，公主又食唔曬，甘我地兩個奴隸獸
就將其余整三文魚意大利面。

公主甘快就4歲，好似都唔多覺得時間過得甘快，不過又睇番下公主的體重同體長記錄，又真系依家先似返只挪威森林貓的成貓。

有人問過我，挪威森林貓有乜唔同，除咗系純種貓，貴過人之外……
有名你叫……系挪威森林黎的貓，（唔系村上春樹個個森林）
如果大概認識純種貓的朋友，可能會知道有其他幾種貓同挪威森林貓個樣好似，
例如： maine coon ,ragdoll同西伯利亞貓，就甘睇，唔太熟識的，其實好難分，可以話差不多一樣。
呢幾種都屬于“中長毛貓”，長毛貓得一個品種 - 波斯貓。

挪威森林貓同 Maine coon 、 西伯利亞 一樣都系"天然品種“ 即是本來就有，
唔系養殖人培養出黎的品種。Ragdoll 系屬于人工品種。

體型比其他幾種都細好小，不過呢好小就有好大分別，
體型大的貓種，都好容易有遺傳性心臟病， Maine coon 同 Ragdoll 的病例比較常見，挪威森林貓，反而無乜，雖然有學說話，Maine coon 系挪威森林貓的表親，系挪威越洋到咗北美之后同當地貓發展出的貓種。不過挪威森林貓的遺傳病例其實相對比其他純種貓少好多。

西伯利亞貓，如果唔系系西伯利亞出生，就無可以擁有呢個名，加上出口之后的貓，唔可以繁殖用。

挪威森林貓，本來就系北歐最凍的森林生活，
生活環境溫度：-8C至24C，同潮濕，所以羅馬夏天熱到公主攤系到。
冬天，公主就最高興，因為都系2、3度左右，系佢正常的溫度加上非常潮濕，
簡直系公主的喜訊，不過無乜雪，所以佢無得玩雪……。

甘西伯利亞貓都系好凍地方黎，甘有有乜無同呢？
挪威森林貓的特性 - 會換季，系貓都會換毛，不過系森林住，
又凍又濕，甘多毛，點搞？
挪威森林貓，有2層毛，好似系得呢種貓有甘特性（如果有錯，請提點，
我睇得唔夠多書），
系冬天就會有第二層好似羊毛甘樣的毛，系第一層毛下面生出黎，春天，呢層羊毛就會脫落，所以就系我同吸塵機最忙的日子。第一層毛，系有油面，好似鵝毛甘，系落雨同落雪個陣會”羨“水，甘就唔會”濕身“啦！加上挪威森林貓可以系樹上，頭向下俯沖落河足魚，所以第一層毛就的作用就更加更要，亦因為甘，挪威森林貓系幾高處都好，你都會見佢地好鬼大膽甘，個頭向地俯沖落黎。同其他雪地貓一樣，挪威森林貓腳板底有毛，剛剛好覆蓋住D肉，有人叫呢種做"snow shoes" 御寒之余，系雪地上走動可以好靈活唔會”羨“胎。條尾好似狐貍尾巴，瞓個陣就多件 ming 喇！

由于生活環境系甘難生存，所以性格就因此有唔同。
其實每種純種貓都有唔同性情，有D比較癡人，有D比較獨立外向。
公主為例，可以好癡人，亦非常獨立，但唔會孤立，同人與其他動物都可以相處，
除咗隔離屋pango 之外，唔知幾時開始，公主唔鐘意佢同其中一個細路（3個其中1個），其他細路，佢都會俾佢地摸，唯獨系呢個細路，不過有次我見到個細路系花園同pango 玩，一腳將個波用力踢向公主，所以可能系甘公主唔鐘意呢個細路，甘可憐的 pango 就受罪……

佢自己系花園玩耐咗，會系廚房個窗到望下我地做緊乜，如果唔見有人影，佢就會翻入黎”搵人“，入屋會打招呼（ao)無人理，佢就開始四圍搵，走上走落，搵到為止。

公主好多嘢講，一日唔停口，不過挪威森林貓叫聲唔系meow一聲兩聲，
好似唱歌多D 唔知點形容，等有機會，錄底公主把聲，聽就明。佢入邊間房都先打招呼，一日到黑，周屋走，當然就不停甘聽到佢”打招呼“……

挪威森林貓系本土環境中，要同狼”揮“過，要獵食，而呢D本能，點用于屋企，
甘就變成……鐘意玩，4歲貓都仲非常鐘意玩，勇敢依然……
乜都玩……最鐘意的玩具系酒塞，有時唔留意，就俾佢偷咗D酒塞去”鹿“，
仲鹿到我面前，要我扔出去俾佢追……吹漲（非常勇敢地挑戰我的忍耐極限）。

公主鐘意玩水……連自己個水兜都唔放過，有水就申只手落水，摸過之后，
系旁邊繞個圈，撥兩下個地下之后先飲。好似系野外，有水，飲之前要檢查清楚D水同附近環境無危險先飲一樣。當然，連廁所同廚房的水都成為佢玩的目標，所以屋企的浴室的門，一定要上鎖……佢識開門……唔鎖就會發現佢系浴缸同廁所玩水。廚房無辦法，open kitchen， 佢隨時都可以出入自如，不過鬧得佢多，依家都好少去玩廚房掂水龍頭。公主爹淋花，佢就最開心，追住D水柱玩到顛。

如果有留意　pet therapy，挪威森林貓系最常見的貓種之一，有人話好多有癌病的病人，系抱住呢種貓的時候，就會唔痛。而且性情溫順，受過訓練之后，系好多人都鐘意的”醫生“。

4歲，先有成貓型，唔系公主先系甘…… 挪威森林貓系生長得特別慢…… 4、5歲先定型，所以呢年睇下公主仲有無得長同重身就知道定型未。

新貓／狗罐頭

新上市的貓／狗都可以食　－　百分百鵪鶉!

鵪鶉 - 我之前要買返來煮給公主，不過要新鮮的都幾頭癢。因為平常都系一盒裝，4只……點食……我同啊公主爹都唔太好鵪鶉這家，好在附近剛開咗家肉店，可以買1只，不過唔經常有。上個星期去寵物店shopping見到呢盒新的，就買咗返來試試，公主肯食，仲好似幾鐘意！！！ 我們老懷安慰。最少我可以唔用日日去肉店問……只系買雞肉給公主的時候見到有先買：D 罐罐頭的肉系肉醬，通常公主都唔like，不過呢罐又食……貓系難以理解的動物（比女人更麻煩）……

有時間煮飯給公主了﹗

終于有時間煮飯給公主﹐煮一次一般可以給公主吃一個星期﹐到超級市場有“小公雞”賣﹐而且很新鮮﹐就買回來煮。幫隻雞煎皮去骨﹐把皮和骨頭放入水裡一起熬湯﹐水滾了一段時間後﹐收細火﹐儘量保持水電溫度在80C左右﹐把雞肉放入﹐在剛熟的時候就把肉取起﹐然後就撕細。再把肉入預先用熱水消毒過的樽裡(D樽是嬰兒菜的瓶子﹐鄰居有小寶寶﹐留了很多這些瓶子給我﹐)﹐再把雞湯倒入。就有5瓶肉了﹗足夠公主吃5日﹗旁邊那一瓶黑粉的是。。。骨頭﹐分5天在給肉的時候同時放上給公主吃﹗把煮過多骨頭放入烤箱烤干後﹐再蘑成粉。過程挺花功夫﹐不過為了公主的健康﹐花點時間又何妨﹖

不是中秋節

別搞錯這是咸蛋黃﹐這是公主的“常餐”﹗正常的時候(我有時間)﹐隻蛋是撈落公主的肉餐內﹐不過如果我沒有空檔﹐就煮一隻雞蛋給公主當晚餐(一個星期一次)。D蛋白去了那裡﹖公主不喜歡吃烚蛋白。。。所有D蛋白就去了少爺的肚子裡。隻蛋黃加油(麻油﹑橄欖油和三文魚油)﹐撈成醬狀﹐公主就很開心的幫我把盤子“洗”干淨。少爺也高高興興的跟公主分享同一隻蛋。我也很開心的看著他們吃。