我愛 Tuscany

點解：其實好簡單D人質素同羅馬差好遠。

我地經常去（其實系想搬去）的地方系一個偏僻小鎮。但個鎮都屬於旅遊區，因為 Michelangelo 的出生地同故居博物館都系果到。

一個好簡單的例子。

呢個聖誕認真唔 like

前提：公主爹生日系聖誕正日（25號！！）

由舊年聖誕正日系踏出溫達老豆屋企門口，我老公已經牙痛甘聲話 － 以後我生日唔同Eu 家過⋯⋯ 我已經話，你想俾老爺奶奶斬你咩？？？佢答：我受夠，一年比一年無隱。25號唔想見到巴渣（無追開呢個連續劇的朋友唔明唔該睇舊 post －如果系有養狗的朋友一定會憎佢同溫達老豆 － 一個開波子，但狗糧系1歐元1Kg 罐頭的人渣）

無知與無家教⋯⋯繼續

今日早上⋯⋯星期日，9點幾先起身，
落樓開花園個窗閘，煮咖啡－公主系到等食，
2黑走左落樓下解決大小（早上落樓第一件事情，唔好問點解，睡房2個廁所系日間佢地唔會去⋯⋯只會夜晚先用⋯⋯）
一個正常到唔正常的早上⋯⋯

土煞12月！

2009年終于過去，連最后一個月都唔系過的非常平安。
同阿妹申公主同英雄由12月開始，兩個都有D嘢唔妥，
最后換獸醫，公司要我用公司提供的 laptop 左邊的肩膀的舊患又黎騷擾我，
跟住唔知道講開乜，講到屋企附近又動土，今次比較應，
因為出門口系天井到就見到部推土機
阿妹即刻話 - 風水上土煞呀！即刻搵料教我擺陣擋煞。
擺咗之後，又真系好似好少少。唔理系真定心理作用，
最緊要全家平安。

23日見新獸醫之后，做咗D test 到現在為止，
英雄好翻D，但胃口仲系麻麻。但慢慢恢復。
公主呢，等7號照心臟。

23日之前因為兩件寶貝唔舒服，搞到屋企兩只兩腳動物都心不在焉。
圣誕節雖然近，但情緒低落到水平線下……公司D PK 又系到搞搞震……，
非常懷疑原獸醫的診斷，
寫 mail 問一個羅馬英國人緬因貓 Main Coon 的 breeder 一D問題
同講咗原獸醫的診斷後，
佢都覺得原獸醫錯，甘當然我地想換獸醫，問有無好介紹。
佢將我地的問題轉發俾佢的獸醫，問接唔接。
新獸醫肯接之後將聯絡電話交俾我地預約，
星期一一早打電話，兩日都爆滿，得23日（星期三）早上有時間……
緬因貓的 Breeder 用得佢15年，應該無問題，
我地已經第二次換獸醫……之前果個唔夠3年，呢個都唔夠3年。
兼新獸醫接開出展的貓，應該知道我地的要求同期望。
個 breeder 點識得？系羅馬同英雄系臺上爭最后入圍的時候就系佢只貓。
後來見到佢原來系我地個 ring 到，抽煙的時候又818講下貓。
聽佢有口音，問佢應該唔系意大利人嗎？佢話佢系英國人，
我話，我終于可以唔用意大利文！用英文大家都舒服D、
原來佢系香港住過！所以大家親切感又多少少。佢好好人，好多難得的經驗分享。
所以我地感覺“走頭無路”要換獸醫的時候就 mail 咗佢。
佢本來想我地帶英雄公主去見獸醫的時候陪我地去，但時間夾唔到。
叫我地見完之後話佢知道情況如何。我地話英雄無乜問題，等舊獸醫另一個 test 翻，公主兩個 test 即日有，再一個系 DNA 等過年後先有。。佢安心好多。
之後，新年前有D報告出咗，打電話俾佢祝賀新年的時候話佢知道個進度，
英雄去咗 Torino 做的 DNA test 系 negative
佢好開心，仲問我地有無同新獸醫約幾時同公主照，佢都約差不多時間，
因為佢的貓女好似懷孕，要照照，如果可以我地到時系新獸醫到見。

23日見個新獸醫，我列咗公主同英雄用咗乜藥，
幾時出現D乜情況的清單。所有公主同英雄的驗血報告俾新獸醫，有噻日期
新獸醫話 Shirely （個 breeder) 介紹的同 Shirely 都差不多（即系點呢？D嘢太清楚？？唔似意大利人？—。— 但擺明我就唔系意大利人啦）
佢檢查噻公主D驗血報告同公主由頭到腳包括皮膚，呢樣真系未見過之前D獸醫檢查，話好懷疑D驗血報告系做俾人，唔系俾動物……所以要同公主抽血做 test，
佢唔系好相信公主真系果個問題，因為無辦法吻合（報告同病癥包括子宮發炎），但心臟有怪聲，先同公主抽血做 DNA 先如果唔系呢只病就要照心同子宮，問
1.佢出展唔出展。唔出展，
2.甘我系佢脖子下少少剃D毛抽得唔得。無問題。
3. 我帶佢去助手間房（應該系消毒咗的地方）抽血，你地要唔要參與。
唔參與，費事左頭左勢。
4分鐘，公主剃咗的地方其實唔系好顯眼，由后面如果佢擰轉頭就會明顯。無搞到成身火酒味翻來。新獸醫話，佢好乖喲（我心埝因為你系獸醫唔系評判……兼因為我唔在場佢驚到唔識郁）。

到今日為止，兩件的血液、便便同尿尿（凈英雄）全部都系 negative，剛收到公主系 Padova 做的 DNA test 完全證明原獸醫錯到好離譜！！好在因為公主真正病因唔系呢個問題，佢用間 lab 有問題，兼一直都“醫錯病”！！叫好彩，如果傳染咗俾英雄，因為佢話唔會傳染…… 系我地自己發現原來系可以……所以未換獸醫之前抽血即刻做 DNA test，公主就等搵到新獸醫先處理，如果英雄本來無事但因為佢 not well informated 而出問題，我要佢俾死更難受！將會進行法律行動。

現在公主食得、瞓得，一切正常，無任何異狀，雖然自己系一間房到，英雄公主爹夜晚陪佢瞓，日間，用公司部 PK laptop 就我系佢房陪佢半日，其余時間要安撫英雄，佢可能因為粒“無厘頭”杜蟲藥搞到佢腸同肚痛，腸應該無問題，但可能因為便秘帶來 hairball problem 仲未清到，所以胃口差，等多幾日佢食只 cream 如何。公主健康算系良好。等7號可能知道多少少佢乜問題。

仲有，新獸醫診金好平……睇兩個花成1.5個鐘頭，40歐元含稅連英雄的便便同抽血！！其他 test 另計，但收費都叫平。特別系 FIV 同 FeLV 可以話全城最平。如果系收容所的貓狗，獸醫俾七折，包括驗血驗乜乜乜物都七折。仲有D result 好快，即日或隔日有（原本的要等2、3 日，真系等得黎死咗都有之），雖然打電話問比較辛苦，因為佢好忙，系診斷途中都要自己接電話。但有收據呢樣嘢系最好，唔需要問，俾錢之前張單已經系我面前。仲唔一定要俾現金，收信用卡同提款卡！呢樣好，唔系下下要搵地方又唔知道要幾多襟幾多。後來搵資料（因為想告之前個獸醫）張獸醫收據除咗系稅務上要求外，系醫學責任。如果無，即個獸醫唔愿意負責！！呢樣嘢，唔知道系咪所有國家通行，請各自修行。意大利的姐妹們，如果寵物需要有麻醉的，甚至系最普通的洗牙都好，做之前，獸醫一定會俾張同意書你簽，睇清楚先簽，唔俾的就帶寵物走，搵另一個獸醫，系做完之後，甚至未俾錢之前，一定要有獸醫抬頭有蓋章的收據，寫明做咗乜，無論系手術或只是診斷應該要俾你。特別系手術，需要麻醉的情況一定要收據，有乜冬瓜豆腐，你可以告到個獸醫除牌。

因為23日我地都鎮定少少之後，就發現我要開工整餅……
鄰居德國佬已經送咗D曲奇餅過黎，隔離阿太又一個餅，
唔回禮都好，我都想整D餅俾屋企人。
之前一個星期有少少時間就已經整好D dough
所以做的時候就唔需要太多時間。

因為時間關系，心情問題，
整唔到好似2008年甘大場面同大量的餅。
突然埝到不如整 3D 餅，
無餅模，求其搵張牛油紙剪個樹型，
篤4個洞 mark 位（兩個筍位的之間，一定要有個空間留俾發大咗之後的餅，如果唔系就企唔到四平八穩）要邊到開個入筍位
所以棵樹系90度一凹一凸入筍就企得到。
D chess board 就系之前個星期
為咗令自己分心唔好埝甘多的時候迫自己整定。
如果唔系成日偷偷喊，我真系會發神經。

D樹搞掂之後就用 royal icing 扮靚，
連整色整水都無，白色就上。
整埋個低座，都系果舊 dough 圓形一個就算。
用 royal icing ”茨“棵樹系上面。灑糖粉，擺好D chess board 包，
最鐘意就系，無嘢余下，全棵樹除咗塊膠同粒星唔食得之外。

9棵，老爺奶奶，小狼老豆、小狼、小琪、溫達老豆（其實唔系好想俾佢，因為佢又衰2嘢，1，24日吧渣要帶埋個女去佢阿姨到過，唔放溫達老豆，45年來第一次佢24日晚上無同老爺奶奶過，第二嘢，奶奶生日唔系意大利……個女掉底俾吧渣阿姨個 baby sitter 湊8日，奶奶當然“鵝”到反轉，點可能個女8個月，唔帶埋佢系身邊但掉底俾 baby sitter 噶？？）4個鄰居分噻，自己無留。

回應系，好好味，收貨。


圣誕節我老公生日，應佢要求……又系檸檬批一個。所以無影相。

26日無好似往年甘去奶奶到午飯，因為要陪下兩件毛球，2個半日唔系屋企，
佢地都未復原，奶奶都明白，
見到我好似鬼甘款（雖然平時都相去不遠，但無甘離譜）
所以都無“鵝”，雖然知道佢唔系好開心，所以27日補翻，佢又開心翻。

1月3日奶奶生日，去外面的餐廳慶祝，無理由奶奶生日仲要佢煮呀嘛……
雖然系佢請客……
奶奶一言“邊個系到，想黎就黎，生日就系果日，唔會等人”就明白
雖然佢話愛D仔，明白D仔難為之處，但心底都想自己生日D仔系身邊共享。
因為溫達老豆之前話，等佢翻來先慶祝，奶奶唔肯，唔等佢。
一如以往，老爺奶奶生日我一定整餅。今年唔整Casatta，
換下，因為小狼同小琪都唔鐘意甜的 Ricotta，
問咗小狼老豆，佢兩個蘋果同梨食唔食？……
小琪蘋果會食下，小狼就乜水果都唔食，除咗檸檬批個 lemon crud 系佢第一次鐘意食的水果 cream。
甘呀，整老友教的蘋果批啰，唔想又檸檬，雖然個檸檬批好受歡迎，
但唔好獨孤一味呀化，雖然都系近，換個餡都好過無新意。

個批白色…… 生日點都要“寫”下嘢。
就用咗D曲奇餅余下唔知道可以做乜好的 dough
用老爺俾我套模最細果個cut咗成40 plus 塊出黎。
D字系用整浸 rum 的 cherry 時候的糖漿，
寫咗之後灑顏色糖。
D花呢，因為奶奶鐘意花，所以用 butter cream
整。因為亂咗成個月，屋企紅色的食用色素干咗都唔知道…… 本來系可以用 strawberry 整色整水，但奶奶對 strawberry 過敏 ，最後，好彩屋企一定有 cherry 果醬，雖然無系紅，系紫紅色，有D顏色就 ok，因為埝住，如果小狼同小琪真系唔鐘意食蘋果，有D cream 佢地應該會食D Cream.

 D 花仔，好多謝老友寄俾我D嘴，
好正，34朵花搞到我手痛，
因為我慌死個 butter cream 會太軟，
雖然天氣凍，開車去餐廳要1個鐘頭，
車入面有暖氣，
我驚佢捱唔到，所以打到佢好“實”
唔會到時塌就無眼睇。好在到場都無塌到。

奶奶見到個餅，好開心，眼有淚光。小狼老豆攞起D花，你真好心機。
我鐘意整，但我要搵人幫我食先得啵。全部都話，你放馬過黎啦，我地多多都食得！
原來無吧渣的時候，大家都會開心同輕松D…… 英雄公主爹模仿吧渣的口吻的時候，大家的表情都系“我頂佢唔住”大家大笑，…… 連一年都見佢唔超過3次的小狼同小琪都唔鐘意佢……無得救。

結果，除咗小狼最後留底D蘋果（個底同個面佢就食咗），佢見到個餅的時候問我入面系乜，我話你食咗先試一口，如果唔系你連試都唔試，如果真系唔鐘意就唔好食，挑起你鐘意的先食啦，我整定D cream 就系驚你唔鐘意食，佢真系甘都食得出系水果。反而小琪好鐘意，仲再添，我話……其實有提子干，佢呆咗，因為佢系唔食提子干。我話好少，可能食唔出，兼D肉桂味蓋咗，原來佢連肉桂都唔鐘意，但唔話佢知道佢就食噻。當然老爺奶奶都再添，D cream 大家都隊噻俾小狼，佢話D cream 好正，我話……你食唔出有 cherry？ 佢眼都大埋！下有咩？？但甘好味，唔似啵！甘果醬有幾多水果味丫…… 小狼老豆同佢兩個仔女講，阿嬸（唉，唔認老到唔得）圣誕節特登問我你兩個乜唔食，特別整到你兩個都會食噶。奶奶聽到，走過黎我到，抱住我，系我耳邊講，“我真系好彩，好多謝，你真系好用心思整個餅，我知道你好愛護我地一家。”

一個餅，唔可以全部人都會食或鐘意食，就得一個就唔到7個，除咗個檸檬批，但圣誕剛整咗……我驚佢地會厭倦。但奶奶的生日餅，過去的經驗話我知道，如果唔系全家都鐘意，大家可以分享，佢有D遺憾，今年，我想佢再開心D，雖然唔系佢最鐘意的 Casatta 但全部人都分享佢的生日餅，兼佢都好鐘意呢個批，我覺得佢比舊年開心好多，溫達老豆唔系到的遺憾都無埋，無期望無失望系真的。我做多少少工夫又點話，我自己過癮一下，幫D新噴嘴開光，唔好埝太多公主同英雄可能會出現的問題，最后其實問題系…… 個獸醫，唔系佢兩個。兼小狼一個的口味容易照顧。甜到嘔的就可以搞掂佢。甘佢都唔會覺得唔開心，被逼食D對佢黎講難食到死的嘢，但又有甜品食喔，無需要叫多個甜品甘異相。

老友系法國的老友，你唔會孤獨，我一定會支持你

老友系法國的老友話，如果有新聞話有人用機關槍掃警察局，果個人一定系佢。
我聽到的時候話，老友，話俾你法國的老友聽，佢一定唔會系一個人去掃。
英雄公主娘一定系佢旁邊…… 今日英雄公主娘會加多句，
老友的老友，英雄公主娘會系你旁邊攞住的唔單只系機關槍……大炮、火箭炮都出埋！
我張居留證差不多到期，需要更新，好，無問題，雖然之前已經困難，
但最后都交咗張 form 搞掂，點知道，其實都唔明白，我更新 jee
點解又要我 show 張結婚證書？？ 所以交的時候無張結婚證書的副本。唔系我埝住唔交，系基本上成份嘢連要交幾多張相都無寫…… 系東抄西抄先知道大概要D乜。

掛號信寫要我今日10：36帶同欠缺的文件去我所住果區的警察總部交翻份結婚證書的副本同要影相（都唔知道做乜要再影……—、—）
英雄公主爹好醒目地陪我去，本來我唔想佢曬一日假期陪我去，
但佢甘堅持……話驚到時我會出事~~

今日10：15到警察局…… 點解整居留證果個門口好似無開……
唔通改咗個入口？
入到警察局詢問處，得一個警察，旁邊排護照的就人山人海。
我有預約（email 同掛號信）問應該去邊處呢？
哦，唔開，無人開工所以唔開，你要等到星期六，但最好都系打個電話睇下佢地開唔開
呢到系咪警察局？系，果邊應該系入境處啦，點可以話唔開就唔開咖！
無……佢地4個人都病曬，全部都病到星期六……（艾滋病呀？！）
我已經開始系到用英文粗口系到系甘鬧，
英雄公主爹就唯有擾亂警察哥哥的視線，
佢真系驚我會柄個警察…… 因為我系到鬧，（意大利文）我有交稅，我老公都有交稅，我地兩個都要返工，今日特登請咗一日假黎交嘢，有曬預約你地班PK 全部病？！
個警察答：系，你地講得好有道理…… 之后好無奈甘一句 :Italia
yes, it's worst than a third world country!
英雄公主爹即刻推我面向門口…… 問個警察甘星期六要翻黎攞預約？
個警察可能聽唔明我講乜掛，因為英文……
佢話，你最好都系打電話問其實佢地點安排。
因為一日佢地發40個預約，由尋日開始到星期六應該一個有成200個預約……
如果你星期六黎到佢地都仲病（我想究竟邊到可以買到手榴彈）
可能仲要再等，你最好都系星期六打電話睇下有無人聽先再問下點。

老友系法國的老友，你唔會孤獨，我系意大利同日可以用所有的武器對住警察局掃。只要你出聲，我一定會同你一齊去掃。

吧渣真聰明

好耐無寫下D屋企八卦嘢。

剛剛老友系巴黎學成之后黎探我，唔知道系咪好耐無人同我用廣東話講嘢，佢一到，我就好似機關槍甘“訴”足2日吧渣D衰嘢。甘都系時候交代下呢位仁姐做咗D乜。

吧渣最近同溫達老豆生咗個女，懷孕期間成日話頭暈生熱，成日睇醫生，次次落樓唔見幾百至幾千歐羅但好奇怪次次都會話花咗幾多錢但醫乜呢？唔知道。開刀生，又話日日住院費1650歐羅，全部都系私家醫院（呢到叫診所）生同睇醫生。小樓子話呢個真系“金菠蘿”甘又系，人家有錢點花都得 gee。我又唔系管佢D數，理鬼佢。但最唔順眼系佢成日系到系到話唔食肉，奶奶同溫達老豆成日就叫佢食，因為醫生話唔食個 BB 唔會健康，但死都唔食，要人求佢甘款，但求都唔肯食，我覺得，作為一個阿媽，真系愛個BB會做一切，要食最唔鐘意食的嘢都會搵辦法，夾住個鼻都會吞咗佢。話自己唔舒服之后果日就走咗去海外旅行……哦，甘即系假咖？

生咗之后，老爺奶奶想抱下又話唔好整醒佢，所以2個月見咗 N 次，兩老都未抱過個孫。

大概情況系甘，點解可以“訴” 機關槍訴足2日。如果大家有睇開我寫屋企D八卦嘢（關系）就知道早前大概一年左右，溫達老豆問英雄公主爹（當時仲未有英雄，所以叫公主爹）點解我甘怪，唔同人講嘢。事件發展到上個月，老爺問英雄公主爹，阿娘系咪有嘢唔妥，好似唔同吧渣講嘢，系英雄公主娘有問題，定系我同吧渣之間有爭執？…… 點解會甘問，因為溫達老豆問老爺，老爺再問英雄公主爹……問到甘遙遠……其實之前未問到呢個 point 老爺已經問過一次系咪我有問題。不過，相信老爺奶奶都系有眼，發現系我凈唔同吧渣講嘢，個女出世都唔去睇。

最后，最近的一個星期日，去老爺奶奶屋企食午飯，小狼老豆，小狼小琪都系到，到小狼老豆佢地3個走咗之后，玩“圓桌會議”講呢單嘢，意大利人家庭關系非常重要，所以要搞到甘嚴重。其實事態唔系好嚴重 jee。但我唔高興在點解要搞到大家都甘麻煩？老爺奶奶第一句問我，系咪佢兩老開罪我？！下？！無嘢呀化？？老爺奶奶，你兩個點會呀？老爺奶奶松一口氣，問甘你系咪同吧渣有嘢唔妥，點解你唔同佢講嘢？哇！正點到。我話好簡單，第一我唔鐘意同D虛假的人講嘢，系公司我可能無辦法，閃唔切就逼住要面對，但我翻到屋企就唔會理；第二，我唔鐘意同D唔識得尊重人的人講嘢，唔尊重我已經唔會理，唔尊重老人家死罪。老爺奶奶叫我舉例…… 當然一籮隨手都可以。吧渣中曬呢兩個條件，所以我唔鐘意同佢講嘢。老爺奶奶都明白，佢地話吧渣依家連個女都唔喂（下2個月都未夠），話上次奶奶去睇，個女喊，奶奶問吧渣個女做乜喊，如果想人抱就唔好抱，但吧渣個答案系個女餓，甘奶奶好自然問，甘餓就自然要喂，吧渣解釋，唔可能個個鐘頭甘喂……2個月已經無奶，個女 出世已經underweight，2個月都仲 underweight，你又唔喂，甘唔好同奶奶喊苦。又話吧渣成日扭轉兩老講D嘢話俾溫達老豆聽，溫達老豆打電話問老爺奶奶，兩老又唔夠膽照直講，免佢兩個吵嘴。

佢的叫我睇在佢地份上同佢講嘢，佢地唔想見唔到個孫女。我話 no way，我依家同佢 say hi and say bye 已經俾足面， 多D我都唔會做。老爺奶奶繼續鵝鵝鵝足我一個鐘頭，我話 I will not surround。我同老爺奶奶講，好簡單，吧渣成日擺到自己系公主一樣的貴格，將所有人降低身份，隨便佢，我屋企夠有只公主要我服侍，仲有英雄呢，我唔得閑捧住佢，我又唔系要同佢住，我又唔需要靠佢，我驚佢有牙咩？我仲多牙啦！老爺埝一埝，又系啵，佢要玩自成一格我無理由降格…… 你又講得幾有道理。但奶奶唔系好想放棄。最后，英雄公主爹最后都要出手打救我，話我已經好咗好多，之前連見都唔肯見，唔好再逼啦，佢打文化牌，兼英雄公主娘的世界只有黑同白，無灰色（讀書玩個98個灰tone 就有灰色）奶奶唯有接受最后的 say hi and say bye 結案。因為英雄公主爹講咗一句，如果吧渣逼到英雄公主娘甘埋身，我一定發爛咋同發癲，你地未見過英雄公主娘有幾恐怖，系一個一發不可收拾炸彈。所以有吧渣在場，佢一定要在場，費事佢真系撩起我把火，英雄公主爹就要負責滅火（拉開我）。

臨走，奶奶突然拋咗句嘢，話吧渣都唔知道系咪想個女早斷人奶，可以交俾人湊自己可以返工，但溫達老豆已經話叫佢唔好返工，佢又唔肯……我無出聲，佢生個女只系想綁住溫達老豆而已，點會真系湊女呀……唉，奶奶繼續，我唔會同佢湊咖，我都辛苦咗成30+年我同老爺都應該系享受余下的時光做自己鐘意做的嘢。雖然我都鐘意個孫但我唔可能日日湊。奶奶，你都幾挑通眼眉。跟手問咗老爺一句，老爺最近有無間溫達同吧渣只狗，老爺話唔覺眼，次次去都系鎖咗佢兩只系地底…… 我話之前吧渣日日又攬又嘴兩只狗咖，依家甘gee？老爺奶奶張口互望……無言，我目標達到。

接下的我無講俾老爺奶奶聽，其實我心知肚明，我唔同吧渣講嘢，對我完全無影響，對佢亦無影響，佢又唔會食唔安，坐唔落，橫豎我系佢心目中只系一個“低等人家”，我唔俾佢踩仲有大把人咖，佢成日以為自己好聰明，以為我聽唔明系到任佢儒辱，懵柄我就算聽唔明，但我睇得通，我唔出聲 jee，到發現我唔同佢講嘢先知道我原來系明，甘又點，其實大家生活河水不犯井水，一年都見唔多過4次，做乜搞到甘煩要搵人拉翻D關系？佢連對手個底（我）都未清楚就去到甘盡，吧渣真聰明咖 jee。佢兩條縮骨精，估都估到想做乜，我地同溫達老豆住得近，之前溫達老豆成日周圍飛的時候，系我地去喂溫達同死咗的莉亞。之前吧渣問我教唔教佢英文，當時話有時間先啦…… 如意算盤 - 想我免費湊女，因為系低等“仆役”工作當然系英雄公主娘做咖啦，因為磨骨粉D甘工作當然系只有好似吧渣阿婆屋企個工人做，英雄公主娘同我阿婆屋企個工人無乜分別 jee……同我死開，想我免費教個女英文，成日有人打電話黎求教，因為呢區得我一個教兼好彩我D學生都系由唔合格變優良翻黎（因為怕我柄），但我都無時間教，今年推咗唔知道幾多個……有時間我系要收錢雖然唔多，我點都要收，因為我有付出，兼我系用心教，唔系誤人子弟，我D學生見翻我都好開心，呢樣系我的回報，所以吧渣唔該行開，因為我見到你我只會嘔吐。講開，吧渣未浦頭之前，溫達老豆無甘縮骨，以前佢搵我幫手都會俾錢就算唔多都會俾……

我唔同吧渣講嘢，原因好簡單，如果我低頭，我只系鼓勵佢更蟹，到時大家更無日安寧。佢知道老爺奶奶疼我，所以講到好似系我唔妥兩老，等兩老擔心，都好絕，估計甘會逼到我。估唔到我會坦白成甘攤開曬我D原則講，我又甘企硬，英雄公主爹幫埋我，佢未遇上過亞洲對手，以為同意大利D對手差不多或更低，呢樣最錯，好似老友講，佢朋友個法國老爺講，中國人好深，好難睇得通。依家佢攞住張皇牌系手，所以老爺奶奶都要屈服。我條頸硬過鑽石所以我話唔講就唔講，一系開口就要佢死，呢樣有少少腦都應該知道我對住佢開口通常都無乜好說話出（如果大家記得上一次講佢個女13歲教育方案，我只系一句就全場鴉雀無聲果一幕）。請自由選擇點到即止定玩爆大鑊。我情愿爆鋪勁，玩大佢，但我驚老爺奶奶受唔起，所以 say hi and say bye 就收工。

2008年 阿茂雙周第一擊 - 圣誕快樂

第一樣嘢，有太陽，所以公主娘心情好翻，
咳嗽仲有少少，不過影響唔大
多謝各位姐妹關心，送翻D心意俾大家
預祝各位圣誕（唔理系唔系白色）快樂，甜甜蜜蜜，
心心相印！
呢批系公主娘改版夾心餅。

原本個食譜系 shoft bread，不過太多牛油……
圣誕節已經甘多嘢要食，呢D送俾人的曲奇餅就唔好甘油啰
仲有我手多，加咗D香橙皮落去。

材料：
100g 牛油
130g 糖（公主娘偷工減料怕太甜所以用120g）
1只雞蛋
香草1茶匙
甜品用發粉（可能系soda powder 掛）1茶匙（注意：呢樣系公主娘加落去，原來食譜都系無…… 我系咪好手多）
200g 面粉
少許鹽
香橙皮果醬同幼白糖隨量
我呢個份量做咗29件

做法：
1.Cream 牛油同糖，cream 到滑
2.雞蛋、香橙皮和香草入 1中。
3.鹽、發粉、和面粉拌勻倒入1和2的混合中。
用膠刀拌勻。
將一半面團放在牛油紙上，再鋪上另一張牛油紙滾成3mm的面餅
繼續將另一半的面團重復。（如果你個雪柜比較細，可能要分成3次）
將面餅放入雪柜15分鐘或以上
我呢……好節儉，所以15分鐘就“吸"模，將個負形 recycle 成為多1個面餅
如果唔玩 recycle 就可以雪1個鐘頭先吸"模。
記得要”吸“雙數，一半中間開個心，我無心形模，個心系用刀自己雕。

未入烤箱的面餅就留系雪柜，如果唔系會烤的時候變形。
烤箱180°C 15分鐘
出爐小心用刀挑起D餅，唔系會癡底。待涼。
（我連個烤盤都無落牛油同面粉，正！）
面撒上幼白糖，個低反轉，面向烤盤過面搽上果醬之后貼個面上去。
注意，咪貪心搽太多果醬。

場面好似好偉大…… 我都唔知道做乜會搞成甘……

俾我只手指你睇下一只圣誕襪有幾大
熊仔同圣誕襪子都系甘高，系肥仔咗少少



原本食譜系…… 3打8件……我整下整下都已經覺得，
點可能得44件甘少……
到扮靚的時候（上 royal icing)數220件
如果計埋D唔靚仔俾我”飛走“同公主爹試味（佢試咗一打……）有成250多件。
都唔知道系咪我節儉，recycle 咗之后，
同我個模比較細（我鐘意D嘢精致小巧）所以搞成甘……

餅身材料：(呢個又系個烤盤唔駛落牛油或面粉直接擺上去就可以入爐）
750g 面粉
3 茶匙 baking powder
1 茶匙 鹽
400g 糖（當然我又少咗…… 用咗350g)
300g 牛油
2只雞蛋
2 茶匙香草
檸檬皮（又系我手多）1茶匙

餅做法
1. Cream 糖和牛油到滑
2. 加雞蛋和香草和檸檬皮落1.
其他材料拌勻放入1和2的混合中
用手指尖搓成滑的面團。
將一小部分面團放在牛油紙上，再鋪上另一張牛油紙滾成理想厚度的面餅（我今次應該系6mm 到7mm高）
將面餅放入雪柜冰20分鐘或以上
（我第一次冰咗佢地4個鐘頭，不過發現10分鐘其實都可以）
之后”吸“好就擺上烤盤
烤箱溫度180°C 8-10分鐘

扮靚
Royal icing
又系公主娘亂黎（偷工減料）之作
原本系500g 幼白糖加2只雞蛋白，1茶匙檸檬汁
我估我唔需要用到甘多所以當一半，
理論上系250g 幼白糖1只雞蛋白同半茶匙檸檬汁
當我開咗一包125g 幼白糖……哇要唔要甘多糖呀……
再睇下有人話原來檸檬汁的作用系硬化D icing。
甘我咪用咗125g  幼白糖1只雞蛋白同1茶匙檸檬汁
用機打到佢企身，不過打到甘上下，我覺得好似都好水汪汪，
我都驚驚地佢到時唔定型唔干咪死火。
所以最后系加咗40g 白糖，就似樣勒。

扮靚的時候系用個最細的噴嘴，勾咗想要的外形之后就添好。
如果未用的 icing 就密封放入雪柜。用的時候拌勻就可以用。
當D icing 未干的時候，就放D七彩糖上去（小朋友鐘意有顏色的嘢嘛）
甘就會癡住。我晾咗佢地5、6個鐘頭左右就可以收入樽。

整餅最大的挑戰系 - 公主系到搞搞震！
佢鐘意香草、鐘意牛油、鐘意坐廚房！！
我整的時候還好，因為有香橙同檸檬可以擺到成枱都系
公主就無機會啦，點知道佢走去搞我D面餅……
好彩俾我發現，但佢點可以忍住呼吸，越過檸檬同香橙的防線
走到甘近！！ 唔通D牛油真系甘吸引！！

晾的時候D餅要系柜入面，搵位都搞咗我半個鐘頭。

我妹問我系咪攞去賣…… 整甘多做乜。我唔系想整甘多咖！
今年我要回禮嘛，鄰居德國佬年年都送包自制（當然系親子）曲奇餅，
我地D客，我地都無送過嘢。
今年就想送D餅回德國佬同其他鄰居（希望佢地嘈少D）
仲有其他朋友同獸醫老友（系呀，公主現任御醫依家系我地老友同公主爹的波友）。

德國佬昨日已經搶閘成功，送咗包餅……
佢系我呢到D鄰居中最可以”吹水“的一個，其他兩句我就借乜盾……
因為我同德國佬的意大利文都系”海軍斗水兵“，
佢唔會講羅馬方言同俚語，
所以我唔會懵盛盛唔識得反應。
可一吹1個鐘頭（系花園或系我或佢屋企門口）
吹乜，天文地利、經濟、宗教信仰、政治、健康、家庭教育……
連藝術、市場學都可以講兩嘴。
同佢吹水用意大利文的時候，
我會覺得系咪自己今早用咗本意大利文字典做早餐？！
今年D餅都系因為埝起呢個好鄰居引發的 idea ，所以減少整蛋糕，
整D曲奇餅俾街坊同公主爹的屋企人（做乜突然甘生外）
因為溫達老豆啰，因為吧渣啰，吧渣有咗嘛，
佢仲好高興有咗3星期已經話俾奶奶知。
佢有咗1個月就向我地宣布…… 同個肚講，叫叔叔，叫嬸嬸啦。
奶奶當然就開始緊張佢，老爺，有D好似知唔以對甘款。
之后日日都有電話俾吧渣。

溫達老豆同吧渣成日同奶奶講話我古怪。
所以奶奶有壓力俾我。上次我拒絕咗去大學教英文，
佢之后就系甘問我發生乜事，話之前都有教過，
教得好所以大學今年叫你教，有乜唔妥，你系咪唔開心，
點唔妥邊度唔妥……

我無唔妥，我唔去教，因為我會超額，我之前去教的時候未有翻譯份合約系身，
唔系俾好多稅，但加埋依家我分合約同D freelance 超額
俾多D稅，搵到都蓋唔翻，仲得果一堂，時間有唔就，明年又唔知道有無得教，
甘咪唔教啰。但奶奶總系覺得唔系好放心，驚我自閉、離群……
點解我知道佢甘同奶奶講過我古怪？
因為溫達老豆系問公主爹先，話覺得我好古怪……
公主爹當然知道我做乜，
無點答佢，系話我公司忙多嘢做就算。
之后就輪到奶奶問公主爹做乜我甘古怪……
話溫達老豆同吧渣覺得我好古怪（我有段時間無見奶奶）
哇……多謝啵。免費廣告呀！
我最唔鐘意系搞到奶奶擔心埋D唔存在的嘢，
唔系甘呀化……
我唔鐘意同你兩件吹水，唔鐘意見你地，唔等于我自閉jee……
公主娘系 EQ 零蛋（絕對唔會抗拒呢個零蛋，我系怕乜認）
我唔系好social 亦系真。
我唔鐘意就唔會去同佢無啦啦巴結，無甘好閑情……
兩只狗又搞唔掂，依家有個細路，仲要系意外無 plan，
連自己做人老豆都無心理準備就要生，
果件又話要結婚，呢件又唔肯，去到奶奶到……扮可憐（我可憐奶奶無日安寧）
懷胎3個月都未夠就為個細路將來13歲點家教系全家人面前嘈……
奶奶突然問我覺得將來個細路應該點教……甘無里頭……點答呀，
我求其一句……間屋連BB 房同樓梯欄桿都無，整咗呢D眼前嘢先啦。
全場靜默1分鐘，溫達老豆同吧渣兩個 O 嘴,
之后奶奶話系啵，要整曬呢D嘢先
……幣……我都未系最心底果句就已經可以全場靜默1分鐘……

甘話俾大家知道我心底個句：
如果個細路出到世，你兩個仲系埋一齊先算啦，
你個女出到世，唔系白癡有病先好開始埝多少少教育的問題。
依家要大家甘費腦筋做乜 jee，
我覺得如果要唔好教到個細路好似你兩個甘差品，
我相信唔可以由你兩個教。其實最好你就系唔好生，
吧渣你埝住生都系想綁住個佬，你以為你個女系張王牌，
到時可以用個女扮可憐去奶奶到，由奶奶俾壓力溫達老豆，
溫達老豆就系貪好玩，
橫豎唔結婚又唔會有手尾，玩下可防jee。
奶奶有奶奶鵝同擔心，你繼續去做花花公子也。
個細路將來同你只狗無乜分別，都系寵物，
求其有嘢唔理系咪垃圾都俾佢食就得。
有時間就自己去買車、買衫旅行泡妞去。到時掉底俾奶奶湊啰。

我出咗口果句系最短，又唔違背良心（其實都有少少）的話已經可以叫人靜默。
甘系咪叫古怪呢…… 如果我真系古怪，我就乜都唔理將最心底個句講出黎。
要我忍住唔講真心話，其實我覺得好委屈，甘我不如唔好講嘢好過。
我會覺得好少少。
公主爹知道我唔開心所以都系避開下唔需要我去面對佢地甘多。

我一于同公主爹齊齊扮星星，閃呀！閃呀！不過24、25、26都閃唔出樣……
果幾日要扮聾啞盲，所以蛋糕就唔整甘多1個俾公主爹生日就算。
事前就系呢D曲奇餅頂檔。

我無浸親，仲系到……

系懶、忙、所以無時間上來寫兩句。
羅馬系甘落雨…… 心情都唔會好，做乜都好似唔想做，特別系洗衫，
攞住堆衫擺入洗衣機就已經要埝……D衫之后晾去邊
無論系個洗衣籃定系個洗衣機同晾衣架都已經全院滿座，
洗又唔系，唔洗就更唔掂
日日都黑無乜陽光，好似無乜日夜之分。
我地系市郊海拔220米的斜坡上，
所以羅馬大水浸同我地無乜特別關系。
公主爹上星期仲病鬼埋系屋企，真系小病是福，
甘就唔洗塞6個鐘頭車都唔到公司。

話甘快12月，圣誕已經逼近，有乜做咗……
好唔愿意甘求其擺好咗棵圣誕樹，
禮物……未買，前個星期六就系因為去商場，
公主爹同我兩個都感染感冒病咗。
所以埝起要去行街，去人多的地方買禮物真系怕怕。
公主爹俾我份圣誕禮物就已經系網上訂咗（我指定，費事佢買錯）。
另外一份12月4日同5日已經“搞掂”埋。
因為系一個課程（唔好埝錯，唔系意大利文）得益唔少，
認識咗好多有趣的人物同新嘢。

我俾公主爹果份呢……
我叫去自己上網買，橫豎兩個人都系一個戶口，佢買俾我又好
我買俾佢又好，D錢根本分唔到系邊個到出……
都無乜分別，就自己搞掂算
分別系佢可以無上限同好自由甘買，唔駛問我。

老爺今年的生日蛋糕 - 好檸的 delizia al limone

公主爹老豆 - 我老爺，屋企人除咗奶奶（奶奶系叫佢個名），兩個孫叫佢做 Nonno 之外，
都系叫佢做 Boss，點解…… 唔知道啵，
佢唔鐘意D仔叫佢做 babo 鐘意佢地叫佢做 Boss，
我系跟公主爹叫老爺做 Boss，
叫奶奶做 Mamma。
所以老爺個生日蛋糕系寫 Boss
我之前問老爺鐘意食乜甜品，佢話無乜所謂，系好食的甜品都會鐘意
不過我知道老爺鐘意檸檬（唔系粵語殘片個演員），鐘意檸檬的黃色，
鐘意檸檬味的餅干，屋企棵果樹系檸檬樹，連送俾溫達老豆屋企入伙棵樹都系檸檬。
所以搵咗個檸檬到唔可以再檸檬的蛋糕食譜做佢70大壽的蛋糕。

我整呢個 delizia al limone （英文應該叫 Lemon delight）的時候，
其實無話俾奶奶知道，奶奶前1日已經訂咗另外一個蛋糕，
所以老爺生日搞到成枱都系蛋糕

個原來食譜系意大利文，
呢到用我的低能翻譯俾大家睇下，
咪以為個蛋糕系一件過 mono piece
其實系12個 muffin size 蛋糕仔做餅，
上面全部都系 cream （因為老爺同奶奶都鐘意食 cream)
所以重手D都無問題。

蛋糕材料：
150克砂糖，2只雞蛋，1個檸檬（皮和檸檬汁），90克牛油（室溫放軟），100克麵粉，50克薯粉，1湯匙甜品用的發粉。
原本食譜系將所有材料撈埋就可以入烤箱180°C 15分鐘
我覺得好似會發得麻麻，所以系將牛油搓入麵粉同薯粉到，將蛋黃同蛋白分開，蛋白加糖打到企身，先撈埋如已經涂上牛油同麵粉的 muffin 盤到。
效果唔錯（因為無得比較，第一次做系甘上下）
蛋糕成品放涼待用。

糖漿（用黎浸蛋糕用）
100克砂糖，100克水，1個大檸檬的皮，煮滾，放涼前將檸檬皮除掉。
完全冷卻后，加50克 Limoncello 拌勻。

但蛋糕同糖漿都冷卻后，用糖漿淋上蛋糕上。我將D蛋糕仔放入個筲箕到先淋糖漿，漏出黎的糖漿再淋落蛋糕到直至所有糖漿都俾蛋糕吸收為止。

將預備好的蛋糕排放好，每一個中間都有空間，等D cream fill in the blank。

Cream
500ml 鮮奶，2只蛋黃，150克砂糖，60克麵粉，30克薯粉，一個檸檬的皮。
以上材料拌勻，煮滾收慢火直至少許糊狀，離火待涼。200克奶油打至企身拌入已經冷卻的成品到，再放上蛋糕上。

我煮個 cream 杰少少，可以蓋到見唔到原來系12個蛋糕仔

整 cream 有兩個蛋白多出黎，我甘超級節儉一定會好好利用，就將D蛋白加糖，
打到企身，噴好D裝飾 整 Meringa，不過無”局“到好硬身，因為老爺奶奶D牙唔系甘好，所以有造型唔會變形就收火。


個蛋糕系10人分量，但食咗好豐富的午餐后，2個甜品一定有余。
奶奶話老爺得閑就攞只勺子去雪柜偷檸檬 cream 食 第二日
個蛋糕系個雪柜到消失咗，但只碟仲系雪柜到……

家貓街貓

前日系郁記到睇到Mel R 去咗 我都好唔開心，
雖然我未摸過 Mel R，未同佢玩過，
佢更加唔知道我系乜水，不過郁記一直都有寫同post佢由細細貓到去果日的照片，
好似我系睇住佢大甘，所以睇到佢甘離開，雖然未至于坐系地下喊，
不過一直睇就一直喊……
郁記有講過歐洲人對養貓狗的概念同我地好唔同。
貓狗地系系屋企外走動，有提供糧草同水，唔會入屋企，
我通常都覺得甘同“街貓‘無乜分別。我地唔同意甘叫養貓。
各人有各人意見點養自己的貓，我地無權利去插手人家點養。
自由系街上走動的代價就系危機…… 而且唔單系自己的貓，連人家的貓都會有危機.

系街上自由走動的貓，可以話”幾“幸福，
如果個”主人”系負責的話……
點叫負責，絕育其一，
健康方面，每年都要打針同做好多防疫。
要知道貓群中有好多傳染病，媒體可以包括：血液同排泄物、寄生蟲。
貓系有地盤主義的動物，好多時都會因為地盤而打架，
排泄物同時系劃分地盤的主要“工具”，
所以系街上自由走動的貓只都會好容易患病。
傳染病當中最恐怖的系 FIV, FeLV、FIP 呢幾種病毒，亦稱為貓的艾滋病。
感染的貓如果發病可以系1個月內死亡，無任何醫療方法。只有預防疫苗。
病癥如果無發病只能夠驗血鑒定。由呢幾種病毒可以引發其他的病。
如果要打預防疫苗，要先驗血，驗血一次通常要50歐元，
好多人就會因為甘而唔會做任何嘢，因為“貓之嘛……有9條命，唔洗甘緊張“的態度。

絕育除了系控制”貓口“之外，亦同時減低傳染病散播，
我日日都見到附近好多街貓，只只都又瘦又細，有D無咗只眼，
有d 斷腳，但我唔夠膽帶翻屋企，因為佢地系有人養！！！
同時我都唔知道佢地有無病同寄生蟲，好驚會傳染俾公主就大鑊。

現在的街貓好多都面對路面的交通。意外傷亡好高，以前系農莊，
D貓可以系農莊內自由自在，因為唔會有甘多車，遠離其他的貓，
但貓現在的生活環境唔系系農莊，日日都會見到好多120km/hr 的車！
同狗打架…… 亦系另一種無可避免的危機。
如果系自己的貓，請將佢變成家貓。遠離危機。
如自家家居環境唔許可，請唔好養貓，養貓系一種責任，唔系一種玩具。
唔系因為要教小朋友要有愛心的”教科書“。

點解甘勞氣，除咗因為見 Mel R 去咗之外，
公主最近幾個月都唔可以去花園玩。點解？
因為D無知的人，話自己養貓，可以連喂都唔喂，自己放假1個月，
去第二到度假，就掉底2只貓周圍走。
兩只貓自己搵食，搵貓砂。甘的主人，我唔相信呢兩只貓有打預防疫苗。
呢兩只可憐的貓走到系我花園開大細！我地花園唔系甘容易可以入，
但呢兩只貓就爬過4幅2米高圍欄走到我屋企個花園搞搞震。
夜晚有幾次見到佢地系我地花園到過夜……
公主當然就發曬爛渣…… 但又唔出得去！

后來同鄰居2貓太太講開，佢自己都有兩只家貓，
佢仲慘，唔單系佢屋企花園大小，偷佢只狗D 糧食，
兩只貓整爛個蚊窗3次，破門入屋搗亂，系人家屋企同人家的貓開片！
2貓太太去同呢兩只貓的主人鄰居“理論”，
已經唔要求賠償（3個蚊窗共210歐元，同自己只2只貓的醫藥費）
只系要求唔好俾兩只貓出外，請系自家屋企內養貓。
結論，該位缺德主人話：我唔得閑理甘多動物，養貓系甘咖啦，我唔俾佢地入屋咖，
整污垢個地板（下，甘你只狗又可以入屋？？！）
我好多嘢做，2只貓系我兩個仔，你要理論同佢地講，
下…… 你2位公子得3歲同5歲，
系呀，兩只貓系佢地咖，我都要教育下一代愛護動物。（真唔明原來甘叫愛護動物）
2貓太太好激氣，我都愛貓，但你甘唔叫養貓，
下次我見到佢兩只黎我屋企搗亂，我會打電話報警叫人黎帶走佢地。
缺德的主人仲好理直氣壯甘話，你依家恐嚇呀……

本來我聽到甘，想去鏟人，不過2貓太太拉住我，
我系意大利人呢位缺德的太太都可以甘對我，
你系亞洲人樣，仲要呢到得你一個，太容易認啦，無謂冶麻煩啦。
我好慶，意大利人無知到甘程度簡直難以想象，仲要甘反咬人，簡直過分。
兩只貓無罪，搞到佢兩只要自生自滅就系D甘無知的人。
我同情兩只貓，不過我更加同情公主依家連自己個花園都唔可以去玩，
This is an abuse!!
激死我啦！！

預祝中秋節快樂，人月兩團圓（加公主娘懶 blog 罪證……1次過3篇！）

自制月餅，祝各位姐妹（兄弟）中秋節人月兩團圓
甘買得到綠豆就會身痕發豆芽
仲有我地契仔照片！

終于有日俾我逼到公主爹同我落羅馬買中國材料整月餅，
不過條友話唔知道點渣車到間中國超級市場！（吹漲…… 唔想去就系甘講）
最后系話去 Castroni 本來好擔心，因為系間鋪頭個網站到見唔到有煉奶呢樣嘢。
已經打定輸數要用淡奶，連淡奶做冰皮的食譜到搵定，點知道出乎意料之外，佢地有煉奶！其實都明白公主爹點解唔肯落中國超級市場…… 之前見我買d 嘢品質可以嚇到佢目定口呆 ，D嘢系食落肚，當然佢會相信意大利人開的國際食品店多過中國人gee。

糯米粉（泰國），本來的材料入面系有占米粉，
不過得"farina di riso"(米粉……無指明系乜米）
公主爹話甘試下啦。
下……唔好食賴你咖！



煉奶！
所有材料都齊，就可以開工整冰皮。
材料好似系李錦記到刮翻來……唔系好記得
抄書抄到唔知道系邊到抄翻來……糯米粉 20 克，粘米粉 20 克，特幼糖霜 20 克，麵粉 10 克，鮮奶 100克，煉奶 20 克，油 18 克

將所有乾料過篩，加入鮮奶、煉奶及油拌勻成糊狀，用大火蒸30分鐘，   取出待涼。

呢個分量系夠整6個迷你月餅

豆沙，請點擊這里看原本食譜

我貪心，整紅豆同綠豆，跟住……
唔記得影好多相！！








豆泥過濾之后……


豆沙，之后先加糖煮……
不過唔記得影個冰皮蒸好個樣，因為對手太 sticky!!


個月餅模系上次返香港系山海街買，
用之前要用油浸，撒上白鑊炒過的糯米粉，就容易脫模。
將豆沙（當然咸蛋黃唔會少得，不過得3個蛋黃，所以得6個月餅有蛋黃…… 都話我懶到出汁……）放入冰皮搓成小圓球之后放入撒了糯米粉的餅模到壓平，輕敲餅模就成事！

就甘樣…… 雪凍，再整咗10個用糯米茲食譜扮冰皮（因為奶奶同有d 朋友對牛奶過敏……所以整定D無奶冰皮，就變成糯米茲皮）今年中秋有月餅！

















有綠豆當然唔會少得去發豆芽啦
發咗4日咋！
用洗沙律個兜，系最懶的方法！！




第二日個樣




第四日已經食得嚕











Leone!獅子，系公主爹個契仔，系獸醫屋企 n 甘多只貓之中最得我地心，
不過佢最近搵到個新屋企，所以下星期就去新家嚕…… 唔舍得，不過都系為佢好。

 

放假，放假，公主娘都放假！

第一次放暑假…… 點解？
暑假期間，唔系搬屋（系呀，2年都系暑假系屋企打包呀！）
就系好似舊年甘，
留返個假到10月先翻香港。
今年，終于放返個星期啰！一定要離開部電腦！
呢個星期唔去人家個 blog 到吹水，無新post，所以留言無辦法回復。
放完翻來再8過

好友寄來的滿載童年感覺的小包裹

好友寄來的滿載童年感覺的小包裹，
張相影得非常差，
因為公主系到左頭左勢要去樣樣聞下，
所以打開個郵包之后，好快手，將所有寶貝系甘衣放平就影
仲要一只手系甘撥開公主，一只手快快甘影。

好多謝系歐洲的呢位好友 非常感動。
個郵包遲咗成個星期先到，其實本來唔知道好友擺甘多嘢系入面。
影相的時候，都未拆開所有細包，
左邊最上的系辣椒腐乳，下面系一只皮蛋同一支潤手霜。
印度咖喱、冬菇、元貝，另外兩包大家都睇到系乜，所以唔賣廣告。
之前仲有一包冬陰功…… 同皮蛋，都仲唔舍得食。
呢份心意比任何嘢都貴重，

我覺得自己好幸福，這幾年系網上認識咗好多“夫人”
有見過面，亦有 e-mail 、書信來往，亦有只到 blog 吹水，
不過這些友誼非常寶貴，雖然萍水相逢但可以交心，噓寒問暖不斷，
我亦從各位夫人身上學到好多新的事物，
（特別系煮飯…… 發現原來我系煮中菜的低能兒）
這些情誼難能可貴。

星期五的午餐，就系白飯撈腐乳，由我地搬咗黎呢到之后，
公主爹的中午飯唔可以返屋企食，所以我中午飯好少開爐火。
公主D飯又唔洗煮…… 所以一個人就懶煮
星期五破例，因為公主爹唔會鐘意”Formaggio cinese"
所以心埝，我自己獨自享受。

熱騰騰的白飯加在腐乳上，那種香味，勾起系我婆婆的飯香的回憶。
婆婆最鐘意系用腐乳餸飯。果刻感覺好似回到童年時代。
好友多謝你的愛心郵包。

講到呢到，我又要鏟人！！
郵局…… 個郵包遲咗好耐先到，仲要擺咗系我屋企條樓梯到就走咗去。
上次我有封信俾人開咗，仲以為系海關開添，
原來唔系凈我一家人系甘，公主爹同其他4家人傾開，
唔只系德國佬（上次有講過話佢D郵包經常都唔系到屋企），
其他幾家人的電費單、煤氣費、電話費單都有被人開過！
仲要所有單都過期先到屋企。
我地比較好彩，系一封信俾人開過jee。
不過D單遲過到期先到就經常發生。
所以，再搵多幾家人齊齊去郵局投訴同理論。

一件唔知道好嬲定好笑的事

無相睇…… 今早煮咖啡果陣已經同自己講，
呢件事實在要寫上 blog 同人分享。
我想睇（無得聽……）下大家的意見，我成日懷疑系咪因為自己老餅
（話時話都已經3字頭最后一個生日都過咗），
所以現今世代D人做嘢，我會睇唔過眼。
如果有睇開我 blog 的人都會發現我只會間中鬧下意大利，
我通常都系去人家屋企（blog)“唱衰”意大利。
今次事件，我唔知道系意大利先系甘定全球效應……
事發日期：早2日前，時間上午
認識我的人都知道我系成日唔開手機，不過早2日就突然心血來潮要開下。
因為都成2個星期都無開，唔知道會唔會好似上次甘“爆”機。
一開就有人打電話黎…… 唔系呀化
睇個電話號碼 02？？ 米蘭打黎？我唔識得人系米蘭咖啵（依家有 Allie啦 ）
甘都會接 gee，平時就由得佢啰。
對方系個意大利女人（定女孩……）問我系咪 Axxxx Lxx
甘我問佢邊位，因為叫得到我英文名都無幾多人，個A字頭名都無用甘多年……
佢話系某公司的招聘部，佢有客戶（名牌手袋）
需要搵懂得廣東話、普通話做 help desk。
我問佢系邊到攞到我資料…… 無答我 繼續一輪嘴甘講解工作內容……
講到甘上下，發現我唔出聲，當然，你都唔答我系邊到搵到我個CV，
我唔 cup 線咪已經叫好修養。
問我有無興趣做…… 下？ 甘你就想我答你？
我話我有合約系身，暫時未考慮轉工住，佢又一輪嘴甘講，
話其實份工唔系甘難做，可以同我依家果份唔沖突……
點解我好似對住個 sales 多D甘ge?
工作時間系晚上11：00至翌日8：00？？？ 因為電話來自中國。
一晚有1至2通電話甘 jee。可以有電話先起身聽，
公司提供電腦同電話……
甘如果我做即系我唔洗瞓啦？電腦我有，仲有4 部添，你咪俾我！
我唔要甘多責任！電話我屋企夠有洛！
講完又講…… 都仲唔明我唔想理佢……甘推法都仲推唔走
我話你不如 email 俾我睇，我同老公傾咗先啦。
跟住問我識得其他識講廣東話同普通話的朋友嗎？
因為系需要2個人，甘可能有朋友有興趣做啵。改口話你 mail D嘢睇咗先啦。

Mail 內容
公司的客人名稱：某名牌手袋店
工作內容： helpdesk
工作時間改咗，凌晨2：00至翌日11：00
星期一至星期五的工作，本來系7日，所以需要搵2個人輪……
地點系屋企，呢到就無寫器材系咪公司提供，
需要去 Napoli 受訓2/3日費用由公司全包。
呢樣比較奇怪……個系統甘復雜要2、3日甘多時間……

雖然當 part time 的收入我唔介意，不過夜晚，仲要打電話到屋企，
公主爹無覺好瞓，對家庭生活影響甘大，仲要對自己健康影響甘大……
一系當全職， part time 就無謂，不過系咪我真系可以做，
呢個問題比較大。我一聽系電話 helpdesk  已經無乜興趣……
聽電話-睇我成日刪電話就知道我唔鐘意講電話，
helpdesk，我甘脾氣，問多兩句就會鬧人
不過話要搵多過一個人，可能其他姐妹會有興趣。

大家有無留意，分人工點？無寫，甘你叫人考慮D乜呢？？？
份工擺明系無前途，意大利D工通常都唔會同你講前途……
無 planning 就系甘。無前途就要錢途咖啦？

公主爹睇完封 mail 話，佢唔想我落答，不過如果我想做佢都唔會鵝我。
我話如果價錢超吸引可以當正職又另計，
心目中有個底價，如果唔到就唔洗埝。
就寫 mail 問，講到依家，其實月薪如何，
合約如何？payment 如何？

封 mail 發咗唔夠20分鐘…… 有電話……
真衰，唔記得刪電話添，又要接電話，又系個位女士。
意大利人系咪真系甘鐘意講嘢，唔識得寫咖咩？
又唔系要佢寫英文！點解系都要電話？？
一開口已經話其實每通電話都系大概15分鐘咖咋
我都無問你呢樣嘢，自己鬼拍后尾”撍“
我都費事話佢…… 乜你估我可以有電話入先開電腦咩？
我就算開咗部電腦系到等，瞓到懵下懵下甘點做 helpdesk!!
15分鐘同8個鐘頭其實無分別…… 仲要唔知道幾時會有電話入，
話最多2通，有無保證先……

甘我問合約如何，佢又無直接答我，反而問我個 payment 想知乜，
公司點付款？轉賬定支票定現金。
呆咗一嘢，轉賬每月30日。哦，甘月薪呢？
終于好唔愿意甘答600歐元…… 哦甘我埝埝先啦（個心已經話系甘先唔洗埝）
唔記得問系稅前定稅后添……
佢仲唔放過我，繼續游說…… 我話我要開工，我會回電郵。
大概都知道差不多資料，就 forward 咗俾個朋友，
睇下佢有無興趣，剛好 kit 又見到果位朋友 online，
請 kit 做傳送，話咗D大概俾果位朋友知道。
朋友話星期日應該先睇到所有嘢先回復。

尋日開機，已經見到果間公司個 mail 問我埝成點……
甘急呀……洗唔洗甘呀……
回咗佢話我同屋企人商議后，決定唔接受呢份工作，
不過我知道你搵人搵得急所以已經問緊朋友，如果朋友有興趣，
會同佢聯絡。


對方回我…… 我真系唔知道想笑好定想喊好。
對方寫：“份工挑戰性幾高唔系人人都可以接受
不過多謝你幫我發俾你朋友，甘你朋友識得廣東話同普通話嗎？
識得用電腦嗎？”
下！好似唔系對我有幾多挑戰性啵…… 對搵人果個挑戰性高咋嘛
當然，份月薪唔系人人都可以接受（如我者）
我咪之前系電話話過啰！無聽書，又要我寫 mail
回佢，朋友懂電腦廣東話普通話。

看官以為完事嗎？我都以為完事咖啦
點知到…… 中午又一封……
又系呢間公司，寫：我下星期放假，唔該叫你朋友聯絡我同事xxx @xxx.com啦

有病呀？我好心幫你搵人，當然如果朋友系需要份工，我都系幫朋友 jee。
但系果佢公司方面黎講，乜我有義務要做聯絡咩？？好似奉旨甘！
想唔鬧人唔帶腦做嘢都唔得！
一樣嘢分幾次做，可能你唔覺得花時間，因為你公司俾錢你做嘢，
不過你好花我時間啵，我D時間你俾我咩？

各位姐妹（弟兄…… 唔知道有無，到依家留言的都系得姐妹）覺得點？
D人系咪好過分呢？系意大利先系甘，定系全球效應？

懶蟲公主娘出來啰！

剛剛想起……原來成個月都無寫呢到添！！
又系一次過補，不過補得個小小，因為呢個月實在太多嘢發生咗……


6 月中
呢個系…… Millefogli alla crema chantilly，系我同公主爹相識7周年紀念日的蛋糕……

原來同公主爹相識7年，甘耐咩？好似真系唔覺得時間過做甘多添。
我地相識個日系我生日前一日，我生日果日公主爹就第一次打電話俾我
我通常自己生日都唔會做D乜，不過系相識周年嘛……咪整個蛋糕啰，
呢個 Millefogli 其實系試版，等公主爹生日再整果真版
佢生日已經講開，呢個如果我整到就最好，
有無見過人的生日愿望系個老婆識得整某個蛋糕做明年的生日蛋糕？？

個蛋糕如果用懶人酥皮其實非常簡單，不過公主娘就系甘麻乜煩，
乜都要自己落手整先過癮（因為鐘意玩jee）個酥皮系最麻煩的部分，
因為要3塊，所以之前個日就要整定。

呢個已經唔系 stage 1
系已經疊咗3次之后的成品。
發現個酥皮一直都要夠凍，
加冰水同份量可以令酥皮的效果相差好遠。
個食譜話雪1個鐘頭，
最后我系3個都雪超過12 個鐘頭！！

到用的時候先再搓成所需形狀，
酥皮大概2、3mm厚

出爐咯！呢個系用A牌子牛油整

左邊果個系 B牌子牛油整
所以公主爹生日果個要買 A 牌子牛油

Crema chantilly 其實無乜難度，
都系一個字“凍”所以連D未打的 cream 都掉咗如雪柜，
雪咗成2日先打佢
甘就好快打得佢興起，
不過D 草莓就樣衰咗……
本來想落咖，點知拎出雪柜先發現發霉……
都好，發呀，發呀！
甘就用D可以系個柜到搵到的嘢放落D cream 到，咪有系個包朱古力粒。

公主爹見到的時候非常開心，不過我就覺得好似有D唔妥，好似太多 cream...
個食譜無寫D酥皮要幾大，凈系話3塊，600ml cream。公主爹話系甘咖系甘咖
后來先知道原來D cream 太多！！系因為公主爹鐘意食cream 所以我落多咗佢話系甘樣

7月頭同中
紅事vs白事

公主爹由細玩到大的老友結婚，
公主爹做證婚人，
我就幫對新人設計邀請卡。
因為佢地系教堂結婚，
所以一年前已經開始籌備
我張卡來來回回都改咗成3個月
4月尾先印到出來（中途D激死人D嘢唔講喇，系間死人印刷公司系到搞搞鎮）
婚禮系7月12日，之前仲要攞埋公主爹D data 去登記。所以個準新郎一直都不停甘同公主爹講，你咪唔黎呀，你唔到，我地連婚都結唔成咖！！

點知道公主爹的大姑媽系7月8日過身…… 甘…… 白撞紅，
等我仲鬼甘神心甘問小怪會唔會唔好，最后娘親話姑媽唔系甘親，
都可以，唔會沖先安心D。
意大利葬禮2、3日就可以搞掂…… 樣樣都慢過香港，得呢樣嘢快成甘。
7月10日早上出殯。
之前果晚，公主爹仲話因為我同大姑媽其實可以話無見過，
我見到佢的時候已經系植物人，所以可以當唔識，可以唔去，
因為公主爹想系葬禮之后直接返公司，唔想走多轉車我返屋企。
我話唔系甘好，我唔想逼公主爹帶我去，雖然我系想見二姑媽，
因為二姑媽一直都照顧大姑媽，同我都有傾下，所以我都好擔心佢同老爺，
有時呢D嘢系精神上的支持好重要。
同時我擔心吧渣會出現，到時公主爹唔知道將塊面擺去邊！
公主爹話，點會呀？佢同溫達老豆都分手甘耐。
我話你依家可以唔信我，到聽日你就知道。
我叫佢打電話問老爺奶奶，如果我唔出現系咪唔好先。
佢好兜圈甘話，葬禮之后想直接返工司，甘公主娘可以點呢？
老爺話，佢車我返屋企…… 甘即系話，我要現身啦。

教堂10點開始，我地15分鐘前到達。
溫達老豆未見到。入咗教堂之后，因為我個位系中間，前面系快云石對正門口，
所以有人出入我系睇到個影，因為溫達老豆仲未到，
奶奶叫我見到就話俾老爺知道。
大概5分鐘，有人入，不過去埋左邊…… 甘鬼鼠，
眼尾睄到系…… 吧渣，我話比公主爹知道，佢簡直就系甘樣：
最衰我之前無同佢打賭，如果唔系，我就肥妹啰！
差不多一半溫達老豆先到，我話俾老爺聽，佢轉頭叫溫達老豆行前D……

老爺都 ok 果日精神都可以，二姑媽就喊都唔知道自己做緊乜……
佢兩姐妹無結婚，一直相依為命……
Mass 完咗之后，我同公主爹扶著二姑媽離開教堂，
準備去墳場，吧渣就走埋黎慰問二姑媽，
二姑媽其實都唔記得佢系邊個，因為見過1次甘大把。
不過二姑媽無問，因為唔好意思…… 不過吧渣就系甘話系幾時見過，
仲話二姑媽果個圣誕整D嘢好好味…… 我見到公主爹反眼
我唔會出聲多把嘴，最后吧渣放過二姑媽……
二姑媽坐我地車去墳場，中間問……頭先個個其實系邊個
公主爹答…… 無呀，頭先邊果呀？ 二姑媽就話，甘無嘢勒
自己神經錯亂添 我真系頂佢地唔順……

系墳場之后我同奶奶陪住二姑媽，
公主爹、小狼老豆、溫達老豆同老爺同其他親戚搞埋D手尾。
奶奶話好彩吧渣無跟埋黎，我當然唔出聲，笑下就算。
唉…… 女人做到甘厚面皮做乜丫。
回程時，公主爹問我點解會知道吧渣會出現。
好簡單，因為我知道佢系乜嘢人，
雖然俾溫達老豆頓佢冬菇保持朋友關系，不過經常都借機會出現咖啦。
前年，因為莉亞去咗，俾到個位佢上返女朋友。
依家大姑媽去，仲唔見到個好機會上返個位？
不過今次應該唔靈驗啰。因為無奶奶幫嘴。不過點都要試咖啦。

紅事
7月12日10點鐘出發。新人依家系 Michealangelo 的出生地住。
離羅馬250公里。2個鐘頭車，出發前，先去超級市場買D嘢同水先。
差不多13：00 先到，因為星期六比較多車。
先到酒店換衫沖涼，因為熱到嘔！！我重要化妝…… 真討厭……
最憎D嘢癡住塊面！連中午飯都系系車到餅干搞掂！

3：00 到新郎屋企，之后所有新郎的家人同朋友齊齊去教堂
間教堂老甘遠，原來系新娘領洗的教堂
間教堂好細，親友眾多企到出曬門口。
不過對新人非常開心。任務完成！！
出黎之后，因為太熱，我同公主爹企埋系一個角落的樹蔭下。
新娘的媽媽走過來，話，你一定系整邀請卡個位設計師喇！
呢到全場得你一個系亞洲人樣，所以好容易認。
新外母非常高興甘擁抱我，話好高興認識我！其實幾感動
之后去婚宴，系一個戶外場地，布置幾靚咖
（無帶相機，因為知道有2個專業攝影師，所以費事啦）
餐飯…… 由7：30食到半夜！！！
因為個廚房唔系果到，所以上菜非常慢…… 慢同慢
每道菜中間隔成半個鐘頭！！想死，好彩同臺D人都幾有趣，
唔系死得仲快，我本來問公主爹有唔可能早少少走
佢話，唔好睇，因為佢系證婚人，要等到完場先走得
入黑，戶外，凍到我死死下
之后到切蛋糕啦，我可以走啦！！！ 已經半夜15分離開。
返到酒店，公主爹話，想依家起行！下？你得唔得咖？
掛住公主嘛…… 你唔掛住咩？系我好掛住公主……但半夜三更，
你頂得住先好啵。如果瞓得過3個鐘頭，日頭開仲辛苦
得咖啦，沖涼落妝，2：30離開酒店。
夜晚開車有個好處，唔熱同無乜車。不過搵 Autogrill 就要成20公里之后先有。
隊咗2杯咖啡繼續黑夜飛車！4：30 到屋企！
公主見到我地，系甘gru gru gru gru 非常開心，不過果頭就系到喊
二人一貓齊齊上床瞓到星期日中午。

7月中，令我非常開心的事！

葡萄牙好友，真有我心，
我只系口痕爆咗出黎我鐘意食皮蛋。
就寄咗4只俾我啦！！
好感動，一直都唔舍得食，
不過又唔可以擺到佢地唔食得咖。
最后都系開咗只做涼拌。
爆香蒜頭，加醬油，放涼再加麻油。
我驚公主爹怕陣味，所以連皮蛋都煎咗先。將D醬油放上面入雪柜
等佢凍  好好味呀！
公主爹…… 食咗一塊就話……咪搞我。
你唔欣賞仲好，我可以獨吞！仲可以煮D公主爹一定唔會食的嘢。
皮蛋粥！！ D咸蛋到8月1日就可以用，整咸蛋皮蛋粥！！！ 正呀……