一件唔知道好嬲定好笑的事

無相睇…… 今早煮咖啡果陣已經同自己講，
呢件事實在要寫上 blog 同人分享。
我想睇（無得聽……）下大家的意見，我成日懷疑系咪因為自己老餅
（話時話都已經3字頭最后一個生日都過咗），
所以現今世代D人做嘢，我會睇唔過眼。
如果有睇開我 blog 的人都會發現我只會間中鬧下意大利，
我通常都系去人家屋企（blog)“唱衰”意大利。
今次事件，我唔知道系意大利先系甘定全球效應……
事發日期：早2日前，時間上午
認識我的人都知道我系成日唔開手機，不過早2日就突然心血來潮要開下。
因為都成2個星期都無開，唔知道會唔會好似上次甘“爆”機。
一開就有人打電話黎…… 唔系呀化
睇個電話號碼 02？？ 米蘭打黎？我唔識得人系米蘭咖啵（依家有 Allie啦 ）
甘都會接 gee，平時就由得佢啰。
對方系個意大利女人（定女孩……）問我系咪 Axxxx Lxx
甘我問佢邊位，因為叫得到我英文名都無幾多人，個A字頭名都無用甘多年……
佢話系某公司的招聘部，佢有客戶（名牌手袋）
需要搵懂得廣東話、普通話做 help desk。
我問佢系邊到攞到我資料…… 無答我 繼續一輪嘴甘講解工作內容……
講到甘上下，發現我唔出聲，當然，你都唔答我系邊到搵到我個CV，
我唔 cup 線咪已經叫好修養。
問我有無興趣做…… 下？ 甘你就想我答你？
我話我有合約系身，暫時未考慮轉工住，佢又一輪嘴甘講，
話其實份工唔系甘難做，可以同我依家果份唔沖突……
點解我好似對住個 sales 多D甘ge?
工作時間系晚上11：00至翌日8：00？？？ 因為電話來自中國。
一晚有1至2通電話甘 jee。可以有電話先起身聽，
公司提供電腦同電話……
甘如果我做即系我唔洗瞓啦？電腦我有，仲有4 部添，你咪俾我！
我唔要甘多責任！電話我屋企夠有洛！
講完又講…… 都仲唔明我唔想理佢……甘推法都仲推唔走
我話你不如 email 俾我睇，我同老公傾咗先啦。
跟住問我識得其他識講廣東話同普通話的朋友嗎？
因為系需要2個人，甘可能有朋友有興趣做啵。改口話你 mail D嘢睇咗先啦。

Mail 內容
公司的客人名稱：某名牌手袋店
工作內容： helpdesk
工作時間改咗，凌晨2：00至翌日11：00
星期一至星期五的工作，本來系7日，所以需要搵2個人輪……
地點系屋企，呢到就無寫器材系咪公司提供，
需要去 Napoli 受訓2/3日費用由公司全包。
呢樣比較奇怪……個系統甘復雜要2、3日甘多時間……

雖然當 part time 的收入我唔介意，不過夜晚，仲要打電話到屋企，
公主爹無覺好瞓，對家庭生活影響甘大，仲要對自己健康影響甘大……
一系當全職， part time 就無謂，不過系咪我真系可以做，
呢個問題比較大。我一聽系電話 helpdesk  已經無乜興趣……
聽電話-睇我成日刪電話就知道我唔鐘意講電話，
helpdesk，我甘脾氣，問多兩句就會鬧人
不過話要搵多過一個人，可能其他姐妹會有興趣。

大家有無留意，分人工點？無寫，甘你叫人考慮D乜呢？？？
份工擺明系無前途，意大利D工通常都唔會同你講前途……
無 planning 就系甘。無前途就要錢途咖啦？

公主爹睇完封 mail 話，佢唔想我落答，不過如果我想做佢都唔會鵝我。
我話如果價錢超吸引可以當正職又另計，
心目中有個底價，如果唔到就唔洗埝。
就寫 mail 問，講到依家，其實月薪如何，
合約如何？payment 如何？

封 mail 發咗唔夠20分鐘…… 有電話……
真衰，唔記得刪電話添，又要接電話，又系個位女士。
意大利人系咪真系甘鐘意講嘢，唔識得寫咖咩？
又唔系要佢寫英文！點解系都要電話？？
一開口已經話其實每通電話都系大概15分鐘咖咋
我都無問你呢樣嘢，自己鬼拍后尾”撍“
我都費事話佢…… 乜你估我可以有電話入先開電腦咩？
我就算開咗部電腦系到等，瞓到懵下懵下甘點做 helpdesk!!
15分鐘同8個鐘頭其實無分別…… 仲要唔知道幾時會有電話入，
話最多2通，有無保證先……

甘我問合約如何，佢又無直接答我，反而問我個 payment 想知乜，
公司點付款？轉賬定支票定現金。
呆咗一嘢，轉賬每月30日。哦，甘月薪呢？
終于好唔愿意甘答600歐元…… 哦甘我埝埝先啦（個心已經話系甘先唔洗埝）
唔記得問系稅前定稅后添……
佢仲唔放過我，繼續游說…… 我話我要開工，我會回電郵。
大概都知道差不多資料，就 forward 咗俾個朋友，
睇下佢有無興趣，剛好 kit 又見到果位朋友 online，
請 kit 做傳送，話咗D大概俾果位朋友知道。
朋友話星期日應該先睇到所有嘢先回復。

尋日開機，已經見到果間公司個 mail 問我埝成點……
甘急呀……洗唔洗甘呀……
回咗佢話我同屋企人商議后，決定唔接受呢份工作，
不過我知道你搵人搵得急所以已經問緊朋友，如果朋友有興趣，
會同佢聯絡。


對方回我…… 我真系唔知道想笑好定想喊好。
對方寫：“份工挑戰性幾高唔系人人都可以接受
不過多謝你幫我發俾你朋友，甘你朋友識得廣東話同普通話嗎？
識得用電腦嗎？”
下！好似唔系對我有幾多挑戰性啵…… 對搵人果個挑戰性高咋嘛
當然，份月薪唔系人人都可以接受（如我者）
我咪之前系電話話過啰！無聽書，又要我寫 mail
回佢，朋友懂電腦廣東話普通話。

看官以為完事嗎？我都以為完事咖啦
點知到…… 中午又一封……
又系呢間公司，寫：我下星期放假，唔該叫你朋友聯絡我同事xxx @xxx.com啦

有病呀？我好心幫你搵人，當然如果朋友系需要份工，我都系幫朋友 jee。
但系果佢公司方面黎講，乜我有義務要做聯絡咩？？好似奉旨甘！
想唔鬧人唔帶腦做嘢都唔得！
一樣嘢分幾次做，可能你唔覺得花時間，因為你公司俾錢你做嘢，
不過你好花我時間啵，我D時間你俾我咩？

各位姐妹（弟兄…… 唔知道有無，到依家留言的都系得姐妹）覺得點？
D人系咪好過分呢？系意大利先系甘，定系全球效應？

懶蟲公主娘出來啰！

剛剛想起……原來成個月都無寫呢到添！！
又系一次過補，不過補得個小小，因為呢個月實在太多嘢發生咗……


6 月中
呢個系…… Millefogli alla crema chantilly，系我同公主爹相識7周年紀念日的蛋糕……

原來同公主爹相識7年，甘耐咩？好似真系唔覺得時間過做甘多添。
我地相識個日系我生日前一日，我生日果日公主爹就第一次打電話俾我
我通常自己生日都唔會做D乜，不過系相識周年嘛……咪整個蛋糕啰，
呢個 Millefogli 其實系試版，等公主爹生日再整果真版
佢生日已經講開，呢個如果我整到就最好，
有無見過人的生日愿望系個老婆識得整某個蛋糕做明年的生日蛋糕？？

個蛋糕如果用懶人酥皮其實非常簡單，不過公主娘就系甘麻乜煩，
乜都要自己落手整先過癮（因為鐘意玩jee）個酥皮系最麻煩的部分，
因為要3塊，所以之前個日就要整定。

呢個已經唔系 stage 1
系已經疊咗3次之后的成品。
發現個酥皮一直都要夠凍，
加冰水同份量可以令酥皮的效果相差好遠。
個食譜話雪1個鐘頭，
最后我系3個都雪超過12 個鐘頭！！

到用的時候先再搓成所需形狀，
酥皮大概2、3mm厚

出爐咯！呢個系用A牌子牛油整

左邊果個系 B牌子牛油整
所以公主爹生日果個要買 A 牌子牛油

Crema chantilly 其實無乜難度，
都系一個字“凍”所以連D未打的 cream 都掉咗如雪柜，
雪咗成2日先打佢
甘就好快打得佢興起，
不過D 草莓就樣衰咗……
本來想落咖，點知拎出雪柜先發現發霉……
都好，發呀，發呀！
甘就用D可以系個柜到搵到的嘢放落D cream 到，咪有系個包朱古力粒。

公主爹見到的時候非常開心，不過我就覺得好似有D唔妥，好似太多 cream...
個食譜無寫D酥皮要幾大，凈系話3塊，600ml cream。公主爹話系甘咖系甘咖
后來先知道原來D cream 太多！！系因為公主爹鐘意食cream 所以我落多咗佢話系甘樣

7月頭同中
紅事vs白事

公主爹由細玩到大的老友結婚，
公主爹做證婚人，
我就幫對新人設計邀請卡。
因為佢地系教堂結婚，
所以一年前已經開始籌備
我張卡來來回回都改咗成3個月
4月尾先印到出來（中途D激死人D嘢唔講喇，系間死人印刷公司系到搞搞鎮）
婚禮系7月12日，之前仲要攞埋公主爹D data 去登記。所以個準新郎一直都不停甘同公主爹講，你咪唔黎呀，你唔到，我地連婚都結唔成咖！！

點知道公主爹的大姑媽系7月8日過身…… 甘…… 白撞紅，
等我仲鬼甘神心甘問小怪會唔會唔好，最后娘親話姑媽唔系甘親，
都可以，唔會沖先安心D。
意大利葬禮2、3日就可以搞掂…… 樣樣都慢過香港，得呢樣嘢快成甘。
7月10日早上出殯。
之前果晚，公主爹仲話因為我同大姑媽其實可以話無見過，
我見到佢的時候已經系植物人，所以可以當唔識，可以唔去，
因為公主爹想系葬禮之后直接返公司，唔想走多轉車我返屋企。
我話唔系甘好，我唔想逼公主爹帶我去，雖然我系想見二姑媽，
因為二姑媽一直都照顧大姑媽，同我都有傾下，所以我都好擔心佢同老爺，
有時呢D嘢系精神上的支持好重要。
同時我擔心吧渣會出現，到時公主爹唔知道將塊面擺去邊！
公主爹話，點會呀？佢同溫達老豆都分手甘耐。
我話你依家可以唔信我，到聽日你就知道。
我叫佢打電話問老爺奶奶，如果我唔出現系咪唔好先。
佢好兜圈甘話，葬禮之后想直接返工司，甘公主娘可以點呢？
老爺話，佢車我返屋企…… 甘即系話，我要現身啦。

教堂10點開始，我地15分鐘前到達。
溫達老豆未見到。入咗教堂之后，因為我個位系中間，前面系快云石對正門口，
所以有人出入我系睇到個影，因為溫達老豆仲未到，
奶奶叫我見到就話俾老爺知道。
大概5分鐘，有人入，不過去埋左邊…… 甘鬼鼠，
眼尾睄到系…… 吧渣，我話比公主爹知道，佢簡直就系甘樣：
最衰我之前無同佢打賭，如果唔系，我就肥妹啰！
差不多一半溫達老豆先到，我話俾老爺聽，佢轉頭叫溫達老豆行前D……

老爺都 ok 果日精神都可以，二姑媽就喊都唔知道自己做緊乜……
佢兩姐妹無結婚，一直相依為命……
Mass 完咗之后，我同公主爹扶著二姑媽離開教堂，
準備去墳場，吧渣就走埋黎慰問二姑媽，
二姑媽其實都唔記得佢系邊個，因為見過1次甘大把。
不過二姑媽無問，因為唔好意思…… 不過吧渣就系甘話系幾時見過，
仲話二姑媽果個圣誕整D嘢好好味…… 我見到公主爹反眼
我唔會出聲多把嘴，最后吧渣放過二姑媽……
二姑媽坐我地車去墳場，中間問……頭先個個其實系邊個
公主爹答…… 無呀，頭先邊果呀？ 二姑媽就話，甘無嘢勒
自己神經錯亂添 我真系頂佢地唔順……

系墳場之后我同奶奶陪住二姑媽，
公主爹、小狼老豆、溫達老豆同老爺同其他親戚搞埋D手尾。
奶奶話好彩吧渣無跟埋黎，我當然唔出聲，笑下就算。
唉…… 女人做到甘厚面皮做乜丫。
回程時，公主爹問我點解會知道吧渣會出現。
好簡單，因為我知道佢系乜嘢人，
雖然俾溫達老豆頓佢冬菇保持朋友關系，不過經常都借機會出現咖啦。
前年，因為莉亞去咗，俾到個位佢上返女朋友。
依家大姑媽去，仲唔見到個好機會上返個位？
不過今次應該唔靈驗啰。因為無奶奶幫嘴。不過點都要試咖啦。

紅事
7月12日10點鐘出發。新人依家系 Michealangelo 的出生地住。
離羅馬250公里。2個鐘頭車，出發前，先去超級市場買D嘢同水先。
差不多13：00 先到，因為星期六比較多車。
先到酒店換衫沖涼，因為熱到嘔！！我重要化妝…… 真討厭……
最憎D嘢癡住塊面！連中午飯都系系車到餅干搞掂！

3：00 到新郎屋企，之后所有新郎的家人同朋友齊齊去教堂
間教堂老甘遠，原來系新娘領洗的教堂
間教堂好細，親友眾多企到出曬門口。
不過對新人非常開心。任務完成！！
出黎之后，因為太熱，我同公主爹企埋系一個角落的樹蔭下。
新娘的媽媽走過來，話，你一定系整邀請卡個位設計師喇！
呢到全場得你一個系亞洲人樣，所以好容易認。
新外母非常高興甘擁抱我，話好高興認識我！其實幾感動
之后去婚宴，系一個戶外場地，布置幾靚咖
（無帶相機，因為知道有2個專業攝影師，所以費事啦）
餐飯…… 由7：30食到半夜！！！
因為個廚房唔系果到，所以上菜非常慢…… 慢同慢
每道菜中間隔成半個鐘頭！！想死，好彩同臺D人都幾有趣，
唔系死得仲快，我本來問公主爹有唔可能早少少走
佢話，唔好睇，因為佢系證婚人，要等到完場先走得
入黑，戶外，凍到我死死下
之后到切蛋糕啦，我可以走啦！！！ 已經半夜15分離開。
返到酒店，公主爹話，想依家起行！下？你得唔得咖？
掛住公主嘛…… 你唔掛住咩？系我好掛住公主……但半夜三更，
你頂得住先好啵。如果瞓得過3個鐘頭，日頭開仲辛苦
得咖啦，沖涼落妝，2：30離開酒店。
夜晚開車有個好處，唔熱同無乜車。不過搵 Autogrill 就要成20公里之后先有。
隊咗2杯咖啡繼續黑夜飛車！4：30 到屋企！
公主見到我地，系甘gru gru gru gru 非常開心，不過果頭就系到喊
二人一貓齊齊上床瞓到星期日中午。

7月中，令我非常開心的事！

葡萄牙好友，真有我心，
我只系口痕爆咗出黎我鐘意食皮蛋。
就寄咗4只俾我啦！！
好感動，一直都唔舍得食，
不過又唔可以擺到佢地唔食得咖。
最后都系開咗只做涼拌。
爆香蒜頭，加醬油，放涼再加麻油。
我驚公主爹怕陣味，所以連皮蛋都煎咗先。將D醬油放上面入雪柜
等佢凍  好好味呀！
公主爹…… 食咗一塊就話……咪搞我。
你唔欣賞仲好，我可以獨吞！仲可以煮D公主爹一定唔會食的嘢。
皮蛋粥！！ D咸蛋到8月1日就可以用，整咸蛋皮蛋粥！！！ 正呀……

咸蛋的第一次

想整咸蛋好耐，之前同 Jessica 傾開，
佢大概話俾我知道點整，
因為都系口述，大概記得份量就整，
之后 Jessica 個 blog 全面介紹點整
http://jessc9.mysinablog.com/index.php?op=ViewArticle&articleId=1084094
先發現原來我聽漏做好多嘢

都已經整咗成3個星期先知道自己D鹽無煮溶 ，
仲要放系個陰涼的地方 
甘點算呀，拎出去曬太陽又好似唔系，最后……
繼續系果個角落頭擺咗成2個月……

開樽個日其實都幾驚，掩住個鼻，不過唔臭，
系個好開始，跟住就好驚甘掉只蛋落滾水到煮，
煮咗15分鐘，好驚青甘開殼，一直開一直聞系咪臭咗，
因為只蛋無用酒精消毒，仲要成2個幾月…… 好驚佢變咗臭蛋。
見到有少少黑色…… 系咪壞咗呢，之后有少少黃油出黎，
開埋個蛋黃，都好似一切正常！
攞咗一小塊蛋白，自己試咗先，夠咸呀！！！
跟住蛋黃，都幾似樣，雖然唔流油，不過下次就記得會擺佢去曬太陽

公主爹無食過咸蛋，我叫佢瞇埋眼，我擺一細快咸蛋白入佢口，
叫佢估下系乜，佢問我系咪蛋白，不過點解咸ge?！！
佢點知咖！！我仲以為佢會估唔到添！
不過個蛋黃就估唔到系乜
公主爹話好好味，之后知道系個只系幽陰角落頭個只蛋，個樣就系甘。
問我幾時再整，我話應該系7月尾整，因為想整月餅
佢就好開心，因為佢仲好懷念2001年我的月餅手信，
雖然當年個月餅系北京買（我系北京飛羅馬），無香港個D甘正，
不過佢都照單全收！

甘呢只咸蛋最后點煮，用咗黎炒菜，
當然如果有皮蛋仲正…… 不過已經好滿足。

結婚4周年……

甘就4年…… 唔系阿化……
好似都唔覺得甘耐甘，
不過公主都4歲，甘就系4年啦。
甘多年都周年紀念都無乜搞作，
今年本來都無，系完全無預備的條件之下，
突然身痕想整個蛋糕就唯有就地取材吧……
連出門口去買都懶…… 其實唔系想懶…… 有嘢賣個間超級市場要渣車先到，
所以疊埋心水玩無譜餅就算啰

打開個雪柜同個存放柜…… 牛油，牛奶、雞蛋，糖同D唔靚的杏，
又試下整酥皮啰，個酥皮系今次先松得起，雖然松唔到好高，
不過都系松起咗，好過之前個幾次，一 pet 嘢，硬過石頭。
今次好咗，可能系用冰水開，D牛油分開4份之后，
每一次用幾多系系雪柜到攞出黎用，
所以個皮一直都系好夠凍，因此而酥脆D，
下次整酥皮會再輕手D鹿個餅皮，應該會好D掛…… 試咗再話你知。
個餡系 castard cream，最容易的餡之一。
D杏，因為唔靚，擺咗成個星期都系硬曲曲，
仲開始發霉，干疵疵汁都無滴，仲酸都打震！
唯有開D糖水煮咗之后，做伴碟，同落咗D落個 cream 到整色整水。
無食譜…… 因為好求其見有乜就隊落去，見步行步之作，
唔難食，公主爹仲覺得好好食添 因為佢鐘意個酥皮，已經問我幾時再整……

其實我地無乜特別慶祝結婚周年，因為本來都唔埝住結婚，
我地一直都相信結婚之系一張紙的問題，
綁唔到兩個人的心，如果真系相愛，又唔想有下一代，
我地已經講好，等公主生，我地就可以抱孫，唔洗自己生
無乜特別理由要結婚，所以無打算過結婚……

幣在結婚之前搞咗好耐都搞唔出個居留證，
唔系政府個電腦有問題就系罷工…… 過曬期出唔到又要重新申請過……
1次都話吖，幣在已經第三次！最后個次激到我爆炸，
我去攞證個日，已經因為政府個 server 有問題，所以已經遲咗成個半月再去攞，
個證有效期系3個月……甘遲咗成個半月，攞到都只可以用個半月……
甘都系要去攞咖，去到等咗半日，竟然話我無俾2份文件，要我重新申請過！
我炳得佢少，我攞住我提交咗個2份文件的副本出黎，
話我系有交到，你地班友唔見咗我D文件，就咪屈我話我無交先得咖。
甘副本又唔承認…… 搵都懶去搵我個兩份文件去咗邊！
果下，好想手上有個個炸彈炸鬼咗佢地班 xyz，
煩都嘔泡，公主爹咪話，投降吧啦，結婚了事，大家都唔洗頭痕同激心。

結婚由開始整文件，排期到結婚個日，都唔夠4個月的事，
文件算非常暢順，香港的姐妹朋友大力幫忙之下，個寡婆證出得叫快，
英國領事館D效率當然比意大利好，建議如果想系意大利結婚，
嫁娶意大利人的港人朋友，如果可以攞 BNO 就用BNO，
英國領事館D速度同運作，加上對你的面口，都會好過中國領事館，
唔想受苦受難，就咪用個 SAR 結婚。

公主爹系意大利人，佢去意大利政府搞文件，快過我搞多多聲。
婚禮系類似大會堂之類到簽咗，所有禮堂同教堂（教堂仲煩，要成年咪玩）到8月
的期都已經派滿，我地6月結婚，搵到個禮堂，其實都幾好彩，
因為呢個堂叫做細，只可以容納30人，所以無乜人“口孔”，仲要6月6日，
同個魔鬼數字非常接近，所以更加有空檔。
無鮮花，禮服求其用條白色長裙就算，
本來再簡單D咖（2條友T-shirt 牛仔褲），不過為免奶奶同老爺覺得我地太過份，
因為佢地系證婚人，所以都系要有條白色裙頂頂，
公主爹就要老西出場，熱到佢屎屎下。
都系一家人（全體得7人，只限羅馬團）聚埋，系我地屋企食餐飯就算。

個居留證，結婚之后1個月就出到…… 仲要系5年期，之后再續系永久。
甘都系煩多1次甘大把。

因為個居留權而結婚，所以個周年唔系甘在意搞。
不過4年連個餅到都唔整好似過分咗少少，所以咪臨急臨忙整個頂住先啰。
晚餐都無乜特別搞作，禮物更加唔會買。有個餅算系甘咖喇
至理名言：浪漫通常都非常浪費。