北京 - 大停車場

10月19日星期五
香港出發，買咗國航機票，不過到果陣有個重大發現！

咪以為你買貴D的港龍機票就系坐港龍飛機啵，我地到機場個陣發現，同一班機，其實系有港龍同國泰！不過架飛機系國航，當然D空姐都系國航咖啦！各位姐妹，當你訂去北京的機票時，如果你系買港龍，就要問清楚架飛機系咪港龍！如果唔系買貴咗好多咖啦！

我地間酒店系王府井，系市中心，我記得我以前住系朝陽最篤過頭，由機場返屋企要大概1個鐘左右，依家開埋5環，應該入市中心就算系塞車，都唔會要成2個鐘啦化…… 5點鐘落機，就已經好混亂下，落機就真系落架飛機系停機坪上高，已經有D凍，仲要等做成10分鐘先有架車黎，架車又上唔嘥甘多人，但好多都死逼上去，最后等到第二架黎我地先上（唔記得講，我地系4個人上北京，包括小樓子同娘親，所以行動唔可以太快速，娘親跟唔上之余，公主爹聞到D“北京味”死都唔會同佢地逼），好彩我地都系攞手提行李，省咗少少時間。好多人排隊等的士……北京到依家，都仲未有地鐵同火車由機場去市中心……心想……奧運點算？？上車之后……開始打電話搵D舊戰友，約到2個，另一個唔出得黎住，另一個仲系麗江，到我離開北京個日朝先到，都好啦，約7：30，應該無死人啦嘛……點知塞咗2個鐘頭車…… 車費120+人民幣，中途已經打電話俾戰友話會遲到，其實北京唔可以太遲吃飯，因為好多都收好早…… 碌到甘去check-in 個位姐姐黑口黑面，好負氣，已經想周佢個經理黎省，不過趕時間，唔時間同佢玩。上到房公主爹就話要唔要換房，因為系一對床唔系雙人床。好啦，落去換房，個位黑口黑面姐姐話，“你們是旅行社訂的房間，沒有的換”。想殺咗佢，公主爹問我佢講乜，當然就要我翻譯俾佢聽，因為個位姐姐系唔識英文……甘前線的工作人員都唔識英文……甘公主爹就問，我地系北京系咪得4晚系到，系就算吧啦。返房之后公主爹去沖個涼，我見仲有D時間，就同小樓子出去買水同D日用品。甘我一直系北京都系P記超級市場的忠實擁護者，當然會走返去中糧廣場個到買嘢啦。甘由王府井去中糧廣場坐的士，非常近，所以就去搭的士去……系酒店門口等的士都可以15分鐘都無一架，門房服務又唔好，條友唔知去咗邊，本來出酒店叫，不過D的士都唔停……最后有人到酒店先上到車。
仲要塞車……因為長安街系主要道路，所以如果系旁邊D路經過長安街，個交通燈停……5分鐘……車多（以前邊有甘多車咖），等咗成3次先到我地架車過（北京交通變得越來越唔掂）……同小樓子好似飛到甘落P記，（系地庫一層）。好快手甘買齊嘢，都唔洗10分鐘就可以走人。點知……無的士……街上D的士都唔停上客，已經覺得有D奇怪。最后系恒基旁邊間酒店（唔記得叫乜）個離開酒店門口個斜坡到有個好心的的士佬俾我地上。以為好啦，應該唔會遲大到！點知，都開唔夠100米，系火車站前就俾兩個公安停咗，罰咗的士佬1000人民幣！！！個的士佬叫我同個兩個便衣公安講我地系酒店上，我已經講到口水干，佢地話唔理……你地游客唔知規矩，依家系街上唔可以搭的士，要去酒店門口或商場門口有的士站先可以上車。我覺得好唔好意思阿的士佬被罰1000大元……仲有要我返轉頭去酒店門口個的士站到等過！！想死……唯有同小樓子抱著兩大袋走返轉頭等的士……當然我地就遲嘥大到……公主爹同娘親就好緊張，以為我地做乜，明明話好快返，點知都搞咗成粒鐘。趕頭趕命去赴約，還好，條死仔見到公主爹，就浦頭問要唔要的士。頭先又唔見你出黎問我！！

是日晚餐系“俏江南”，邊間……唔記得個地名，不過我就識去……因為戰友話系以前個客辦公樓附近，所以大概知道系邊，不過地名就真系唔記得……戰友們系我地去餐廳的途中打電話問我地有乜唔食同唔食得，佢地真系非常正！到個陣，呢兩個戰友已經老遠跑過來擁抱，周圍D服務生都眼甘甘，因為好少見中國女生有甘“激烈”的舉動，加上我地三個，年紀都唔細（唔記得交代，呢兩位戰友，一位系臺灣女生，另一位系北京的女生），個刻差D喊出黎，真系好似仿如隔世，（同班戰友系點關系，可以遲D再講）。介紹公主爹同我娘親俾佢地認識，佢地都好開心見到我“嫁得出”同個老公都“幾似樣”。我都好開心佢兩個都幾好，身體比以前好，精神比以前好，其中一個明年會出嫁！我地對對方的互相祝福，都一一實現

桌上有一支“長城”紅酒，公主爹以為已經系點咗，就開吧，后來先知道唔系，我系中國無飲過同買過紅酒，所以以為長城貴極有限，點知成300人民幣！我果陣無話俾公主爹聽，因為都開咗，無謂掃佢興。餐飯都OK （其實咪理我D食評，因為我好多嘢以前無食過，所以能夠比較的“基準”非常有限公司……）最高興系見到呢兩個戰友，佢地仲好熱心幫我睇甘短時間應該去邊，之前已經話我知，故宮個大殿裝修，好多正嘢無得睇，不過都值得一看。仲聯絡好架的士，可以等我地明日包8個鐘去長城，（不過當時仲未決定去邊段）同的士佬講好價錢，600人民幣8個鐘，貴咗好多，之前有個相熟的私家車師傅，紅旗車8個鐘都系450（雖然系4、5年前價，不過又漲得太離譜吧）……依家架大眾都要600。是但啦，夜嘛嘛，唔想再為個200人民幣勞煩大家。分手時大家都好唔舍得，不過約咗遲幾日去starbugs 再聚，當然要搵埋另外個個啦！到埋單個陣，兩個戰友點都唔收我地錢……我無佢兩個辦法，果刻醒起支貴到唔恨的長城，就更加覺得唔好意思……

返到酒店，問公主爹支紅酒點，佢話都幾好，我問佢支酒值幾多，最多8歐元……我話佢知要300人民幣時佢個樣系“”……叫佢下次咪亂甘開酒，要問咗價錢先好開。我去沖涼，不過發現間酒店有D好古怪的嘢系廁所，公主爹之前已經話間酒店有D古怪，不過個刻趕頭趕命無繼續研究。正常酒店浴室都有洗頭水、護髮素、肥皂，呢間多咗D“男/女性性事后清潔液”“性愛潤滑用品”，同“令沐浴更有情趣的“湯包”（湯包指泡浴）”。再睇睇個床頭，有兩包安全套，仲有張價錢表，每樣點收費。開電視，有廣告賣邊個酒店頻道有“激情”嘢睇……點解間酒店好似色情“架埗”。間酒店叫“臺灣飯店”，系金魚胡同，（王府井的旁街）大家如果下次去北京，唔想被人誤會，就千奇咪訂呢間。

第一日就甘……幾難令人有好印象……睇下第二日有無好轉……

香港我地黎啦（頭4日香港游記）！

香港頭4日
到香港個陣系6：00幾，黑到乜都睇唔到。講講好模糊甘過咗系香港頭個幾日……

10月15日
我地坐國泰直飛香港，班機本來唔錯咖，我地系窗邊3個人一排，公主爹從來未去過香港，所以塞咗佢坐窗邊，等佢有機會第一時間見到香港，我坐中間，不過最唔好彩的系……我隔離個位阿伯系臭狐貍，臭足我11個鐘。我地系羅馬時間12：45 分飛機，本來以為我地都可以瞓到一陣，不過就瞓唔到（太臭）…… 個位唔系好大，郁動唔可以太多，加上公主爹系一個“坐唔定”的家伙，雖然有電影同電視游戲俾佢玩，但都搞到佢好唔耐煩。

10月16日 再遇小樓子！
終于到啦！不過黑嘛嘛，公主爹開始懷疑佢俾我“賣豬仔”……吹漲…… 抵埗后，行入香港國際機場，佢就開始感覺“我無俾人賣豬仔”，香港國際機場比羅馬個個靚仔好多好多，一落機就有免費地圖，同落機前已經知道去邊到攞番D行李，對外國游客黎講，系好方便的事。我要跟所有其他游客隊，用護照過關。第一次感受到一個游客點睇香港。真系好好，俾我去過D國家都有效率同妥當。（弊……免費幫 HKTA賣咗個廣告添） 無show 香港機場D相俾大家睇，因為實在太熟口熟面。攞咗D行李后，因為太早，所以叫小樓子千奇咪黎機場，我地搭酒店穿梭車到酒店先見小樓子。

到旺角間酒店（九龍維景）都唔到8：00，我到resception 到問我地可唔可以放底D行李先，因為我記得check-in 系下午2：00。個resception 話即刻搵間房俾我地先，應該9：00就有可以啦。（服務態度香港至好！系羅馬你放底行李，到check-in 果陣自己抬件行李上房）甘，就等等啦，因為預約咗11：00系灣仔做身份證，仲有時間，加上我地都想沖個涼先。轉頭，就見到可愛的小樓子啦！每次見佢我都好開心，本來今次返香港系11月，系想同小樓子做生日，不過羅馬11月有事走唔開，所以就提早返黎，預先同小樓子做生日啰。小樓子一見我地，就開始系個包包入面攞曬D百寶出來喇 - 一張電話卡、我張信用卡、同最緊要 - 兩張八達通！9：00 有房喇，就快手快腳沖個涼，就出門去灣仔做身份證，因為時間關系，想到灣仔之前，已經去埋銀行做兌換港幣。

灣仔 - 我系網上預約咗，所以到個陣都無乜大問題，不過都幾多人做證，等scan 要15分鐘，公主爹問我點知道要15分鐘……有電子牌寫咖嘛……佢就已經好驚訝香港的服務喇……眼見好多做身份證的都唔系香港人，我估時間會比一般長，都要1個鐘先可以走人，為免昏昏入睡的公主爹系到等（驚佢會瞓著），所以小樓子就同佢去令公主爹精神一震的灣仔電腦廣場，期間仲帶咗佢去香港最出名的“茶餐廳”要做個“常餐”添。終于系12：30 搞掂埋個臨時身份證（果張紙）。約咗個系灣仔做嘢的好朋友午飯。公主爹第一次食點心，好奇怪地，佢唔似的好多鬼佬甘愛上點心 - 唔鐘意蝦餃個皮，不過鐘意食蘿卜糕同煎腸粉！本來想橫豎都系灣仔，意大利個領事辦事處都系附近，加上個日下午會開（得星期二同星期四下午會開）想去搞埋封向香港警察攞無犯罪記錄證明書，不過公主爹就快可以企系到都瞓得，甘就唯有打道回府（酒店），夜晚再同呢個好朋友吃飯啦。返到酒店，公主爹就已經爬上張床到，呼呼入睡，我同小樓子就去行我地最鐘意的超級市場街街，買咗D日用品，當然唔會少的我的至愛 - V他奶同益x多，仲有咖啡。
差不多4：30，拖咗公主爹去九龍塘的省善真堂，見我公公同婆婆。點知個出口改咗，我同小樓子都唔認得路，兜咗個好大的圈，行得都幾累人。公主爹第一次見道觀參拜，佢本來唔肯拜，不過我話，你入人家屋企，就一定要打招呼啦，你當打招呼就的咖喇，我都系甘安撫自己去拜，最后佢都有對每一個神像上香同鞠躬。佢對D神像同D金銀衣紙，好有興趣。佢覺得D神像做的好靚，不過當然我就唔俾佢影相。
夜晚就去做旺角“朗豪坊”上面間酒店到自助餐。之前，公主爹問：點解我地好似進入除咗出入酒店果段路，同系灣仔電腦中心之外，都好似成日系地底同室內……第一日之嘛……俾D耐性啦，聽日帶你上地面哈……個自助餐非常唔錯，魚生非常正、壽司都好正、意大利的cheese 都有水準、仲有好多特色嘢同個好掂的朱古力泉，公主爹叫多咗一杯紅酒，我地4個人都系1450港幣（1頭約360港幣）。非常滿足。公主爹知道成餐都系一頭少過36歐，就話抵阿！抵阿！我個女朋友其實系病緊，不過死頂陪我地，所以走個陣，因為唔同路，小樓子反而可以陪多佢一陣，所以就小樓子送咗佢上車先。我地就返酒店。

10月17日（香港真系慢D都俾人鬧！）
叫咗小樓子唔好出黎，免得小樓子悶，加上夜晚都會去小樓子屋企。等我去做意大利領事館搞掂D嘢先見面，中途就打過電話問候自助餐女朋友，點知佢病到唔返得工，我就“鵝”佢去睇醫生。

到中環廣場的意大利領事辦事處，當然就先 scan 過個袋（點都好過中國領事館），辦公室細細，不過無人，走到柜臺，位女士本來用英文問我地有乜事，不過公主爹就已經流咗D意大利文出黎，個位女士就話：”啊！我記得啦，你寫過mail 黎問！“公主爹簡直就感動到震，系意大利點會有呢種事發生！好快手地就手寫咗封所謂“要求信”俾領事辦事處，要求發封要求香港警察發無犯罪記錄證明書。我多口問，如果我要翻譯張出世紙，要多少銀兩？位女士問我張出世紙去做香港法院做咗證明未？做咗啦（因為時間關系，小樓子已經晨早已經去咗香港法院搞掂咗）我就攞出黎啦，果封俾香港警察的信都搞掂埋俾咗我，甘就同我講，可以幫我做翻譯份出世紙，加上香港警察的證明書系會返領事辦事處，所以可以幫我翻譯埋。兩份翻譯，收費 433港幣！當然就做啦！我系羅馬問，一份翻譯已經80歐元！兩份就已經要160歐元（港幣差不多1700），仲要我郵遞過去郵遞返，我唔信意大利的郵政服務（經常寄失），如果我系意大利向香港警察申請無犯罪記錄證明書，仲要返多一份系羅馬的指紋翻譯，又多70歐元的成本，已經返到黎香港，就最好一氣呵成。翻譯張出世紙要3、4日左右，不過張證明書要等香港警察，所以到走個陣都應該未有。公主爹驚嘆，乜連系香港的意大利領事辦事處都效率高甘多，系羅馬，做差不多的嘢都要成2、3個禮拜。

跟住，就去香港警察總處搞個無犯罪記錄證明書。不過我帶錯路……行錯咗去灣仔警處。公主爹當然有D怨言，不過都無反面。終于到香港警察總處，其實個到系……差不多到的金鐘的灣仔……新的大樓，都幾靚仔。公主爹好懷疑甘問，呢到真系警察總處，點解好似商業辦公大樓多D啵……你咪攞羅馬D警察局黎比啦！上到去，因為無預約，所以有D擔心聽日要走多次過黎，點知又幾好彩，無人。攞咗個號碼，都唔到2秒就叫做我去，公主爹就坐系到等。我做緊個陣，有另一位職員問幫我做緊果位姐姐，個鬼佬系咪做證咖，我就答，系我老公，佢等我，甘佢就笑笑口甘走開咗。完之后，要落兩層樓交錢，之后要返上黎攞指紋。我同公主爹落去交錢個陣（港幣165）就好興奮甘同我講，“香港真系慢D都俾人鬧！”我話“系吖，我同你講過，小樓子都同你講過吖”但系，道聽圖說點都唔親眼見甘有震撼感！佢話我做緊果陣，有個男孩子，好似唔知要點攞個號碼，就系佢猶豫之際，入面有個職業系個咪到叫，雖然公主爹唔識廣東話，不過見人家的表情就知道佢俾人鬧佢慢。交完錢，上返樓上攞指紋，又系放底張form 就叫我，當然公主爹就繼續好仰慕香港的效率喇。搞掂咯！走人，去邊到好呢。差不多午飯時間，早上系酒店的早餐都食得好夠，未餓，當然就唔會去同人爭位食飯，所以就帶公主爹去咗Pacific Place 都逛街。公主爹問：香港有幾多個shopping mall， 好似我地去到邊都有？幾多個……我唔識數啵……有地鐵站就有shopping mall，呢個答案已經令公主爹目瞪口呆，唔怪的香港系購物天堂。去Cit_ S_ _ 下面個超級市場，就當然會睇睇意大利的貨品價格，其實同系羅馬一樣……有D仲平D添……公主爹就當然打開眼界，因為羅馬D超級市場，其實無甘國際化，乜國家的嘢都有D。佢就開始有好多奇想。
之后就返酒店，抬件大行李去下一間酒店（系北京返黎之后唔系同一間酒店）到行李存放，因為橫豎都要去交錢，想凈系攞件手提行李上北京，就先抬咗去青衣先再去小樓子屋企搞掂佢個防毒。點解會搵間系青衣的酒店，原因系想近小樓子多D，小樓子系住系“山卡啦”，唔想佢成日騰到老遠，所以就搵咗青衣呢間酒店啰。不過唔知果日唔乜講廣東話，到酒店個陣，我講廣東話同個接待員講個陣，佢面容有D扭曲，黎理解我系到講乜……我都知我好耐唔講廣東話，所以表達上一定會有問題（小樓子經常笑我，其實我的廣東話系香港個陣都唔系好得去邊……）不過都幾順利，D職員都好有禮貌，間酒店好新，其實系個住宅區入面，見到有個商場。已經安心好多。但由于時間關系，要趕去小樓子屋企，所以就走人。
小樓子屋企真系幾山卡啦，可能我地無搭巴士，坐火車，所以就兜遠路，不過驚會塞車，所以最后都系兜下好過塞。到個陣，小樓子就已經攞做我地兩張八達通去增值。上到樓上，就見到娘親喇。娘親第一次見公主爹，大家都有D緊張。不過都好快無乜嘢，因為公主爹已經見到部電腦，就一支箭甘去咗部電腦前面。我好耐無見我娘親，不過大家其實都無乜嘢講。都系”鵝“佢要多D運動同小心飲食。當時娘親沖咗杯”龍珠“，公主爹就好鐘意！又愛上中國茶。我系第一次間公主爹會自動要多杯茶！仲唔止一杯！
搞到甘上下，都系時間晚飯，小樓子訂咗深井裕記燒鵝。唔知大家知唔知道：意大利人系唔食鵝咖。不過我老點公主爹話系鴨，所以佢就唔在意。仲有魷魚、菜同（唔記得有多碟定得甘多……）。上菜大家就粥粥飯飯。公主爹愛上白米飯……唔重要粥。佢第一次同中國人食晚飯，就鬧笑話。佢好似自助餐甘，將所有想要D餸夾到自己碟到，我娘親就覺得好奇怪，問我屋企系咪唔住中國菜。我話系啊，得我兩個，所以都系煮意大利菜多，最多煮果樣中國菜咪叫：炒飯啰。我就同公主爹講，唔系甘同中國人吃飯咖。佢有D覺得唔好意思，不過凡事都有第一次，依家知道就得啦。之后……佢好開心甘食”鴨“不過就問，點解香港D”鴨“甘大。果刻無答佢……費事佢無食欲，佢最鐘意系梅子醬，鐘意到攞黎撈飯。我娘親就笑公主爹，好似個小朋友一樣。當然就唔洗講，呢餐都好正啦！仲幾實惠添。出黎發現有好多間燒鵝，不過都系假嘢，如果唔熟識香港的朋友去深井，記得唔好去大街上果幾間，正宗個間唔系系路邊咖！之后就話俾公主爹聽”鵝“同”鴨“的故事，佢話只要唔好話俾mamma地知就的喇。佢覺得鵝同鴨分別不大，食唔出，凈知道，燒鵝好好味。

10月18日（計劃趕不上變化）本來有好好的計劃去游博物館。先去到香港科學館或香港歷史博物館，下午去志蓮凈苑（鉆石山）之后西貢食海鮮（預約咗班朋友）。弊在公主娘記錯系星期二D博物館先關門都關門……去到模門叮……唯有帶公主爹游小輪河。游尖沙咀同中環，行咗個圈，之后就約小樓子系酒店見，大家的是日午餐系 - 包包，公主爹愛上菠蘿包、腸仔包……等港式面包，加上我同小樓子對午餐的要求一向都唔乜。所以大家就好開心”整多個包“。小樓子好精靈地想起志蓮凈苑好似好早關門，就好快地去查查，好彩佢提起，收4：30。已經2：00，去到都唔乜時間游。大家都好坳腳等6；00去西貢的時候，就突然想起不如去太空館啦！
小樓子一路去太空館的時候，就不停甘搵點由尖沙咀去西貢的路程。好感動，連甘小的事情，小樓子都照顧周到……到太空館，我地坐巴士，終于有一日公主爹系地面走動，不過佢又開始懷念香港地鐵。
到太空館當然就要睇天幕電影，剛剛個套系有關恐龍，效果其實非常唔錯，有時覺得條恐龍系自己上面走過，有時又會好似俾條恐龍吞咗！個3D效果系好正。不過有冷場。就系冷場之際，就發現公主爹瞓著咗……因為我都差D瞓咗……為免瞓著就四圍望先知佢瞓咗zzzz。太空館其實好多嘢都舊，應該要更新更新，就更有吸引力。原來小樓子都系第一次去太空館。都好，無悶親佢！
之后系尖沙咀行咗半個鐘左右，不過實在太多人，差不多行唔郁。之后就落地鐵去旺角再坐紅色小巴去西貢。
紅色小巴好快，當然個司機旁邊個咪鏢是裝假狗，明明過咗100好多啦，都仲顯示70…… 6：30就已經到咗西貢，公主爹就見到D魚缸又好感興趣地影啊影。果日系清明前日，好多人，我D 朋友都遲曬大到，因為地鐵上唔到、塞車等。我地約系全記，不過有2間，所以有朋友都搵錯地方。到咗另一間之后又打電話黎話見唔到唔我地。到成8：00 先到齊人點菜，俾預期中遲好多，已經擔心小樓子要好夜先到屋企，聽朝又要早起去機場到北京。朋友們其實都唔互相認識。不過都系好友，有2個中、小學同學，有廣告學院時的同學，依家系插畫家，仲有系一位攝影師，就想一齊高興一下，如果我唔系香港，佢地都可以互相聯絡同有乜事都可以有人幫拖。本來系好高興再見到我的朋友。不過今次再遇，警醒咗我一樣嘢，返省自己的改變，朋友們的變化，多或少……同公主爹原來同我的朋友，有好多的文化差異，只是我一直無機會見到甘深入的案例（會開另一個topic 再講）。唔知系咪對全記有太帶期望，所以有D失望，我好多朋友都知道我以前一直都系素食，到我系上海時開始改變飲食習慣，不過就好少人知道我其實系”有殼海鮮過敏“。所以魚系我最安全的海鮮，魷魚都可以，不過蝦、龍蝦同帶子都與我無緣。所以我唔可以話D嘢令我失望，不過問公主爹同小樓子就知道D食物水準失望。龍蝦伊面好麻麻、鮑魚唔琳、蝦ok，條魚（我唯一可以食）可以，都幾新鮮。椒鹽瀨尿蝦可以……（資料來源：小樓子同公主爹）。跟一眾朋友分手之后有下文…… 不過暫時唔系呢到寫。
小樓子到成凌晨先到屋企。大家都要大覺瞓因為，清明節上北京！

出發前一D開心事

系10月10日朝，終于就攞返公主爹個護照加簽證，差不多中午之后就去見心靈湯 Grace 同傳說中的CeCe 加偉大的Marco!我系第一次見 Grace,電話就通過，不過真人就系第一次，事原：偉大的Marco 要到羅馬公干，Grace 就有機會同Cece 一齊黎。早幾日通知咗我，好彩系我臨去香港前果個星期，如果唔系，又走失個機會。Cece 好可愛，不過我仲未病好（仲有10%左右），所以唔敢太近佢，驚會轉染到佢同媽媽病，我就真系唔安樂……好少見甘細個BB 成日笑，我會感覺到 Cece 會系一個好幸福的小朋友 跟住個幾日，就系屋企趕“工”交公司D翻譯數，好彩臨行前，做夠本，仲有余數等我返黎可以幫補下個約（11月）的數。

嚇病記（下集）

唔好意思，甘遲先上返來，由于”度假“后有太多善后工作要處理（特別是工作上的麻煩事），今時今日都仲未upload D相片…… 不過想開始寫寫， 如果唔系，就懶根繼續生就會寫唔出嘢……
上文提要，我返香港同上北京之前病咗一餐，事由”羅馬的中國領事館“ 開始，要返到黎，無穿無爛先敢大大聲聲講出黎發生咗乜嘢，搞到”嚇病“……

一直對中國的領事館無乜好感，可能系系北京的時候，已經”見識“過D官點對香港人，所以就更加有顧忌。
今次去領事館，系因為公主爹要上北京，所以一定要攞個簽證。9月27日其實已經特登上羅馬的中國領事館個網站到睇睇邊日佢地開始十一放假，甘好自然地就寫10月1日到3日。甘又好自然地9月28日（星期五）就快快手手走去搞個簽證，個日公主爹仲特登請咗日假去搞。點知我地架車差不多到門口，有兩個好心的同胞系路上（可能見到都系同胞）就大大聲聲喊我，話領事館今日休息，唔系阿化……明明寫10月1日到3日放假，今日先28日……點知到門口，真系無開，連張紙都無。公主爹唯有按鈴問辦簽證要點搞，條友仲搞笑，話”你10月3日早打電話黎問開唔開啦，我唔知道啵……“吹漲……
10月3日，我無打電話去問，由于屋企離領事館遠，所以就一路坐車就一路打電話去問，點知個電話唔通，另一條線仲無埋……公主爹就好擔心我白走，我話，點都要試試，如果唔系就去香港先搞個簽證，佢又唔放心，甘就唯有我去辦啦，公主爹就要返工，所以半路就分道揚鑣，我自己去領事館。
去到門口，其實原來有2個門口……個”靚仔“門口系唔會開咖！旁邊有個”窿“型的門口，我見到有人出入，就走去過邊，費事按鐘問。門口個到有張告示，不過的中文……28日到10月2日休息，你班XX就咪叫人10月3日早打電話問啦！一入到去，凈見到好多中國人，得個兩個柜位，想問都唔知點問，因為太多人打嘥蛇餅又亂……兩個柜位做乜嘢？凈知道唔系做簽證個咯！因為寫住其他嘢，但中國D嘢，點知到吖……因為成日都無邏輯……唯有逼過去，問個位同志可唔可以俾我發問一個問題甘大把，還好，個位小姐俾話唔所謂，但同時佢又問個職員嘢，甘其實系咪俾我問咖？唔知，唯有硬住面皮大聲D問啦。個職員……其實如果佢唔系系個琉璃罩入面，都唔知道佢系職員，因為無牌，又無制服，無識別咖，我仲開始懷疑，究竟系咪領事館呢？因為我入到呢到，都無見過有守衛或者警衛啵，支中國旗呢？是但啦，問咗先，個答案系幾好笑咖。”辦簽證？意大利護照嘛……您見到哪條隊沒有中國人的就是了！“哦……甘我去排，咪要笠住個頭？如果唔系下一個黎問，見到我排隊，咪以為個條唔系做簽證？！
搵到條好多”鬼“的隊，最后個個系位意大利女士，我就問佢”請問系咪排做簽證要排呢到啊？“佢有D詫異甘答我，”系啊，你要做簽證？“我話系幫我老公做，我老公系意大利人，佢就笑笑口喇。我又見到佢手上個張 form 同我系網上down 落黎個張唔同樣，就多口問佢，點解佢張 form 同我手上個張唔同，佢問我攞我個張黎睇睇，”啊，你呢張系網上down 落黎的舊form，9月1日，佢地改咗張form 阿，不過佢地無系網上發張新form,你快D去前面（有成30個人排緊）攞張新form 填咗先啦。佢地系9月1日起價添，加成倍，搶錢。“ 甘我就走去攞張新form 填啦，填到最后，要申請人簽名，如果唔系要寫系邊個代辦，系呢個時候，就又麻煩個位意大利女士，“請問，呢欄點填呢？”佢就細細聲同我講，“你扮你老公個簽名就得咖啦，佢地唔對護照個簽名咖，我地旅行社都系冒每個客簽名咖，無辦法啦，如果唔系，攞唔到個簽證咖” 甘都得！我唔想嘥幾個鐘頭來回攞公主爹個簽名，唯有“冒簽”啦，好有犯罪感，好似小學生冒家長簽名feel……
排咗差不多2個鐘，突然有個阿伯攞住個黑色的垃圾袋好急地走黎走去，突然間個腦有個神經病的問題，我自己問自己，如果個個袋入面系炸彈，會唔會一鑊熟！因為到現時為止，真系無見到1個守衛，又無人檢查過每一個入黎的人，同佢地帶D嘢…… 果刻，我心跳的好快，加上入面好多人同好熱（其實有D臭添），開始覺得喉嚨有D熱同漲……就系呢個時候，有人系后堂大叫！叫停咗個個攞住垃圾袋阿伯！個阿伯拎轉頭，笑笑口，話要攞D制服去洗……原來個阿伯系守衛……班守衛無干凈制服所以……我見唔到有守衛……最精彩的部分依然在后……
差不多凈番10個人左右就到我，比較可以睇得清楚D間做簽證的“大廳”。兩個柜員系入口左邊，其中一個仲要負責收錢……右邊有一張長桌子，大概1米8 左右，有個意大利阿伯坐系個到，中間的空間就系用黎排隊，但最令我注意的系，個意大利阿伯旁邊堆滿咗好多passport（大大話話都有成好幾百本），大部分都系紅色，不過間中有D其他顏色，好似系……美國passport 啵。個阿伯間唔中會走開，跟住有另外一個意大利阿伯問佢，“我上個禮拜做個D搞掂未？”果個阿伯答“你自己去搵啦，我唔覺眼啵”……跟住……另外果阿伯就開始系個對passport 里面搵！個堆passport 系做中國簽證咖！！！你唔好話俾我知，乜人走過多可以搵佢要搵個本passport!!!我接受唔到呢個“事實”。有時個阿伯走開，我都見到有人自己去個堆passport 到搵。跟住……果個意大利阿伯問我，“你系咪個人申請中國簽證啊？”我答“系意大利護照個人申請”，佢叫我過去佢個張長桌到，攞住本passport，個張申請表同個張旅行社的預訂單開始工作，“你要快證定普通？”，我答“普通得啦”，跟住俾張收據我，“你下個星期三返黎，去交30歐元費用就可以攞個簽證喇”，……佢系大使館職員黎咖！！！佢就將公主爹本passport 疊上個堆passport山上。“下一個，你系咪個人申請中國簽證啊？”，我望住堆passport 好驚會唔見咗阿公主爹個passport，好驚好驚，果個阿伯見我未走又問我”有乜問題啊？做完喇，你走得咖喇“……我全身僵硬，依然好驚好驚，我突然好唔舍得公主爹本passport，但我又唔可以攞返……唯有求神拜佛千奇咪唔見，仲要搞掂個簽證……
就甘樣，嚇咗一大餐……返到屋企就發燒……

多謝各位姐妹問候，我返到羅馬之前都唔想“揚”出呢件“恐怖”事件，系中國工作幾年后，我會警惕呢方面的事情，好驚系出入同系內地會有危險，所以到依家先寫。加上公主爹已經決定唔會去中國大陸，所以就可以好開懷同大家分享。如果是中國的同志看到這篇筆記，請不要誤會我“貶”中國，我只是感覺到中國要改善的實在太多。領事館在外地，在外國人眼中的一個標準，如果不希望外國人看扁中國，請由領事館開始做起。一切所做的“表面功夫”例如，多多規范入境和加簽證價錢（意大利護照6個月內一次入境簽證由16歐元加到30歐元）只會令人反感，只會令人想起，明年奧運，中國趁火打劫……