加菲貓真貓版 - 奶奶家 Jerry

張相用手機影，所以麻麻地睇到 jerry 系“紅色”
所謂”紅色“Ginger 色系，
不過 Jerry 比較 cream colour D
如果再紅多少少就真系好似加菲貓，
特別系兩年前，佢肥仔到各肚腩癡住個地下。
貓癡肥其實都好常見，不過要救就要早，
好似Jerry 甘，依家已經算減得幾成功

上星期六去奶奶家，因為約咗奶奶同小琪（公主爹二哥個女女）齊齊做阿茂。
小琪突然問，jerry 有幾歲喇？
公主爹話8歲，我就望望佢，喂，你咪年年都話 jerry 得8歲先得咖！
你估真系年年18，永遠青春咩…… 我都聽佢話jerry 8歲咗x甘多年……
奶奶數數手指，阿 Jerry 原來已經12歲咖啦！
奶奶點解要數手指，因為 Jerry 系公主爹同溫達老豆（公主爹個大佬）加前任女友
送俾奶奶的生日禮物，甘奶奶就依家自己幾歲，減幾多歲個年有咗 Jerry 咪知啰。

Jerry 唔系純種貓，不過系2頭純種貓混出黎，
我懷疑溫達老豆同佢前任女友俾人老點，因為位太太話Ｊｅｒｒｙ　系波斯貓混出黎。
不過我點睇，都覺得，Ｊｅｒｒｙ　無波斯貓血統，系　Ｂｒｉｔｉｓｈ　ｓｈｏｒｔ　同歐洲種混的機會大好多。公主爹俾我成日同佢講貓經講得多，
睇多咗純種貓之后，都同意我的睇法，
脾氣同純種貓有分別，遲D再講有乜分別，不過點都系好貓一頭，
搞到老爺同奶奶爭jerry 寵。

大概2年前，又如常去奶奶屋企，發現jerry 有頭皮（我只能甘叫，貓全身都系毛，甘如果我叫身皮，恐怕大家都唔知我講乜），同毛色好暗……

我就問奶奶 Jerry 最近點，奶奶話Jerry 剛剛系獸醫到打咗每年的防疫針，
獸醫話 Jerry 幾健康，無乜問題，不過奶奶就為咗 Jerry 的頭皮同毛色，
唔系甘安樂，驚 Jerry 開始有病。問獸醫，獸醫話 Jerry 無事，
甘奶奶唯有信住獸醫講啰。

見奶奶唔安樂，Jerry 有唔系甘好樣，同癡肥，
我問奶奶，Jerry 呢半年好似肥得好快同好多。
奶奶呆一呆，系咩，唔覺啵，當然奶奶你日日都對住佢，
你點會覺得佢肥咗吖…… 不過又俾我講講，奶奶話，又系啵
Jerry　真系肥咗，之前都有個肚腩，不過唔會到地下……
個肚腩依家好似個地拖甘

點算呢，Ｊｅｒｒｙ　系咪有病阿！奶奶更加擔心……
我就問奶奶，你俾乜嘢 Jerry 食，
奶奶就打開 Jerry 個糧庫，我就睇睇有乜嘢解救。

第一樣，少貓餅，因為貓餅系最大的碳水化合物來源，
實施上，無大量的碳水化合物根本就做唔到貓餅。
大家都鐘意整餅，一定知點解。
Jerry　已經超過６歲，已經系　ｓｅｎｉｏｒ　貓
飲食其實已經要改變。普通成貓貓糧含的碳水化合物份量，
對年紀大的貓黎講實在太多，貓貓消化唔到，同吸收唔到，
又活動少咗，消耗唔到，所以就容易癡肥。
Jerry 習慣要有貓餅，就換成　senior 個種，
同換另一只牌子。因為間間廠的成分唔同，
有D系多好多好多碳水化合物，如果唔留意睇，
分分鐘唔知，因為睇住過一串長長的成分，好容易擾亂視線。

奶奶，呢只牌子的貓罐頭唔好俾 Jerry，呢只都系。
俾呢只，仲有我寫多另外兩個牌子俾奶奶。

奶奶望住我，點解？

好多貓罐頭的肉類的來源無寫得好清楚，
大大只寫住　ｃｏｎ　（ｗｉｔｈ）　牛肉，其實牛肉成分真正得個４％，
其他系叫肉同副產品，甘系乜肉同邊類型的副產品呢，邊個知？
蛋白質高唔等如可吸收的蛋白質高。
雞毛的蛋白質都好高咖，仲要系副產品的一種啵，不過食咗系吸收唔到個種，
要個消化系統做完一大餐之后，無用，真系運吉。
仲要系俾咗錢買，咪等于貼錢買難受（受個個系貓）？

我叫奶奶講，如果煮開魚同雞，
（奶奶年紀都一把，無謂要佢煩到好似我煮雞俾公主甘）
不妨留一塊無鹽油調味煮的俾　Ｊｅｒｒｙ　食啦。

奶奶就開始同　Ｊｅｒｒｙ　改牌子同買　ｓｅｎｉｏｒ　的貓糧，俾少一半貓餅 Jerry 食。
煮開雞，就蒸塊俾　Ｊｅｒｒｙ　，
Jerry 唔鐘意食熟牛肉，好間中，奶奶俾塊細細塊生的佢食。
幾個月之后，Ｊｅｒｒｙ　無用去頭皮洗頭水（Ｊｅｒｒｙ　１年沖１次涼，）之余，
都無沖過涼，毛色就恢復正常的光亮，無頭皮
瘦咗Ｄ，活躍咗，開始可以好似以前甘，跳到上廚房個柜頂，
奶奶非常高興。我都好高興，唔單只因為佢系 Jerry ，系家人，
我喜歡動物，見到動物受苦，或狀態唔好，我都會唔開心。
Jerry 本來就好可愛。
肥貓雖然令人感覺更可愛，圓錄錄，不過如果為佢健康著想，情愿佢瘦D。

依家 Jerry 無繼續肥，瘦就瘦唔到幾多，
絕咗育的貓，都系會肥Ｄ，
到甘上下，就提奶奶俾去毛糕 Jerry 食，
間中買D ”貓芝士“ 俾 Jerry 做 treats 
希望 Jerry 繼續健健康康開心陪伴兩老。

公主4歲喇！

三條一，公主生日，
甘就已經4歲喇，

生日有乜好做……
咪大魚大肉一餐啰……
不過貓系食肉獸類，日日都系大魚大肉咖啦，
又唔可以局個蛋糕俾佢…… 甘……
又可以點慶祝公主生日呢？

公主爹同我兩條傻佬同傻婆，貢去超級市場，
睇下有乜俾公主做生日飯，
甘就買咗包煙三文魚啰，
一包，公主又食唔曬，甘我地兩個奴隸獸
就將其余整三文魚意大利面。

公主甘快就4歲，好似都唔多覺得時間過得甘快，不過又睇番下公主的體重同體長記錄，又真系依家先似返只挪威森林貓的成貓。

有人問過我，挪威森林貓有乜唔同，除咗系純種貓，貴過人之外……
有名你叫……系挪威森林黎的貓，（唔系村上春樹個個森林）
如果大概認識純種貓的朋友，可能會知道有其他幾種貓同挪威森林貓個樣好似，
例如： maine coon ,ragdoll同西伯利亞貓，就甘睇，唔太熟識的，其實好難分，可以話差不多一樣。
呢幾種都屬于“中長毛貓”，長毛貓得一個品種 - 波斯貓。

挪威森林貓同 Maine coon 、 西伯利亞 一樣都系"天然品種“ 即是本來就有，
唔系養殖人培養出黎的品種。Ragdoll 系屬于人工品種。

體型比其他幾種都細好小，不過呢好小就有好大分別，
體型大的貓種，都好容易有遺傳性心臟病， Maine coon 同 Ragdoll 的病例比較常見，挪威森林貓，反而無乜，雖然有學說話，Maine coon 系挪威森林貓的表親，系挪威越洋到咗北美之后同當地貓發展出的貓種。不過挪威森林貓的遺傳病例其實相對比其他純種貓少好多。

西伯利亞貓，如果唔系系西伯利亞出生，就無可以擁有呢個名，加上出口之后的貓，唔可以繁殖用。

挪威森林貓，本來就系北歐最凍的森林生活，
生活環境溫度：-8C至24C，同潮濕，所以羅馬夏天熱到公主攤系到。
冬天，公主就最高興，因為都系2、3度左右，系佢正常的溫度加上非常潮濕，
簡直系公主的喜訊，不過無乜雪，所以佢無得玩雪……。

甘西伯利亞貓都系好凍地方黎，甘有有乜無同呢？
挪威森林貓的特性 - 會換季，系貓都會換毛，不過系森林住，
又凍又濕，甘多毛，點搞？
挪威森林貓，有2層毛，好似系得呢種貓有甘特性（如果有錯，請提點，
我睇得唔夠多書），
系冬天就會有第二層好似羊毛甘樣的毛，系第一層毛下面生出黎，春天，呢層羊毛就會脫落，所以就系我同吸塵機最忙的日子。第一層毛，系有油面，好似鵝毛甘，系落雨同落雪個陣會”羨“水，甘就唔會”濕身“啦！加上挪威森林貓可以系樹上，頭向下俯沖落河足魚，所以第一層毛就的作用就更加更要，亦因為甘，挪威森林貓系幾高處都好，你都會見佢地好鬼大膽甘，個頭向地俯沖落黎。同其他雪地貓一樣，挪威森林貓腳板底有毛，剛剛好覆蓋住D肉，有人叫呢種做"snow shoes" 御寒之余，系雪地上走動可以好靈活唔會”羨“胎。條尾好似狐貍尾巴，瞓個陣就多件 ming 喇！

由于生活環境系甘難生存，所以性格就因此有唔同。
其實每種純種貓都有唔同性情，有D比較癡人，有D比較獨立外向。
公主為例，可以好癡人，亦非常獨立，但唔會孤立，同人與其他動物都可以相處，
除咗隔離屋pango 之外，唔知幾時開始，公主唔鐘意佢同其中一個細路（3個其中1個），其他細路，佢都會俾佢地摸，唯獨系呢個細路，不過有次我見到個細路系花園同pango 玩，一腳將個波用力踢向公主，所以可能系甘公主唔鐘意呢個細路，甘可憐的 pango 就受罪……

佢自己系花園玩耐咗，會系廚房個窗到望下我地做緊乜，如果唔見有人影，佢就會翻入黎”搵人“，入屋會打招呼（ao)無人理，佢就開始四圍搵，走上走落，搵到為止。

公主好多嘢講，一日唔停口，不過挪威森林貓叫聲唔系meow一聲兩聲，
好似唱歌多D 唔知點形容，等有機會，錄底公主把聲，聽就明。佢入邊間房都先打招呼，一日到黑，周屋走，當然就不停甘聽到佢”打招呼“……

挪威森林貓系本土環境中，要同狼”揮“過，要獵食，而呢D本能，點用于屋企，
甘就變成……鐘意玩，4歲貓都仲非常鐘意玩，勇敢依然……
乜都玩……最鐘意的玩具系酒塞，有時唔留意，就俾佢偷咗D酒塞去”鹿“，
仲鹿到我面前，要我扔出去俾佢追……吹漲（非常勇敢地挑戰我的忍耐極限）。

公主鐘意玩水……連自己個水兜都唔放過，有水就申只手落水，摸過之后，
系旁邊繞個圈，撥兩下個地下之后先飲。好似系野外，有水，飲之前要檢查清楚D水同附近環境無危險先飲一樣。當然，連廁所同廚房的水都成為佢玩的目標，所以屋企的浴室的門，一定要上鎖……佢識開門……唔鎖就會發現佢系浴缸同廁所玩水。廚房無辦法，open kitchen， 佢隨時都可以出入自如，不過鬧得佢多，依家都好少去玩廚房掂水龍頭。公主爹淋花，佢就最開心，追住D水柱玩到顛。

如果有留意　pet therapy，挪威森林貓系最常見的貓種之一，有人話好多有癌病的病人，系抱住呢種貓的時候，就會唔痛。而且性情溫順，受過訓練之后，系好多人都鐘意的”醫生“。

4歲，先有成貓型，唔系公主先系甘…… 挪威森林貓系生長得特別慢…… 4、5歲先定型，所以呢年睇下公主仲有無得長同重身就知道定型未。

奶奶的生日蛋糕

今年奶奶生日正日，本來同奶奶做生日，
不過老爺奶奶個胃都唔系好舒服（系個胃定個心呢……）
所以乜都無做，最后到星期六
奶奶話今年都系唔做生日算……
不過我已經秘密地整咗個 La cassata siciliana 俾佢，
一直等佢做生日，甘，唯有星期六下午借話要去奶奶屋企附近買嘢，順手上佢屋企睇睇佢，先帶到個蛋糕去俾奶奶。

奶奶唔知道我整蛋糕，不過老爺就知道，系1號果日，仲俾咗一細舊仔marzipane 老爺食過，老爺初初睇到個陣唔知系乜，因為我烤杏仁時過多咗2分鐘，見都無變色，咪打成粉啰，點知……打咗出離系咖啡色…… 效果唔掂，不過奶奶生日前，已經黎唔切再買杏仁整過……唯有想到最后用Ｄ　glazing 掩蓋下應該都可以蒙混過關掛…… 老爺話好好味…… 我同老爺講，你咪安慰我啦…… 老爺話系好味嘛，比街買的多好多杏仁味，食得出系杏仁　。老爺問，”你系咪想整 La cassata siciliana 呢？“ 老爺，你點知咖 ？估到估到啦，俾奶奶的生日蛋糕有 marzipane，仲唔系你奶奶的至愛咩？

星期六下午去見奶奶，入到廚房，見到一束好靚的蘭花，”奶奶，邊個送咖？“ 奶奶含羞甘答，老爺尋日買俾我咖。之后，佢開個袋，見到個蛋糕，開心到流眼淚　，攞住個蛋糕走去俾老爺睇，”你睇，有寫住俾 mamma 咖！“ 攬住我，多謝多謝。剛剛好，小狼老豆系呢個時候，經過奶奶屋企（其實佢想黎見下奶奶，因為佢成個星期都陪對仔女，所以無時間黎睇奶奶），變咗一個無預約的生日會，大家高高興興，齊齊食蛋糕，大家都話個蛋糕樣樣都似模似樣，但就好似少咗Ｄ嘢，　因為個　pan di spanga 底太干，系咪無落 rum 酒…… rum 酒？個食譜無寫啵…… 我切個陣都覺得ok，不過可能過咗2、3日后，干咗…… 老爺就馬上找個食譜出黎，佢屋企成柜都系食譜，仲有一本1913年出版的食譜，好多菜色都已經失傳。系阿，真系漏咗D酒，不過唔系 rum，系M字頭（死火，又唔記得D名添）。

奶奶好高興，就話，不如黎緊個星期六，約埋侄女小琪（又系鐘意做甜品精）、我同奶奶系奶奶屋企整甜品。晚餐由老爺包辦，當然有小琪就唔會少得小狼同小狼老豆啦。當下，大家都系奶奶頭上（奶奶好矮，所以大家都可以見到佢頭頂）用眼睛打波斯密碼 - 咪提溫達老豆阿。好阿好阿，奶奶好開心，已經開始搵定D食譜，因為可能要預先買D特別的材料。奶奶成日話，”我最鐘意食甜品，不過就最懶整。“ 不過如果能令成家人系一齊過一日，佢一D都唔會懶。

公主都整餅？

 我整餅時，公主就最鐘意系

我望望佢，佢就扮無嘢，望下花園，佢最鐘意等我行開行埋個陣偷嘢食……

佢的詭計一直都唔派上用場，
就嬲嬲地會落地下，去望窗。

公主系到發白日夢：
出面系咪有好多小鳥飛過呢？
你唔俾我偷食，不如放我出去玩啦？滿足下我都好吖！
至多我好似今朝甘，凌空足只小鳥俾你吖，
不過今次你咪唔俾我帶只小鳥入屋啵，
我特登足黎送俾你，你咪唔領情啦！
上3次D壁虎你可能唔鐘意，所以唔俾我帶入屋，
其實我驚冬天凍嘛，帶壁虎先生一家移民入屋，
你又唔鐘意，搞到壁虎先生一家移民唔知去邊咯！
娘親，你好人啦……

公主娘：你咪扭轉D嘢黎講…… 壁虎先生一家怕咗你先移民咗詐……
你帶小鳥入屋？你咪盞嚇死佢！我放生佢個陣，你仲嬲緊我，放你出去玩，得，咪再足小鳥，同走去嚇隔離屋只狗 Pongo，仲有，仲有，咪走去另外個邊個欄桿到，用個口dam 起個網，用只手仔偷人D波仔返花園玩……

好阿，娘親，我舉腳發誓，

一定聽你話，你系咪依家俾我出花園玩阿？


依家？成20：00……甘黑，
聽日啦……

娘親你玩我！！

千年道行一朝喪！

我經常都好大大聲，好驕傲甘同人講，我同老爺奶奶關系好好。唔單系好好，老爺奶奶都好疼我，我都好愛惜兩老，我好幸運，大家文化背景差異甘大，能互相理解同體諒，能有甘好的關系，其實唔容易，而且公主爹系帶我見老爺奶奶前，都做咗好多事前功夫，所以關系十分良好。
千年道行一朝喪果個唔系我（要道行喪盡，難度都幾高咖）
事發日期 12月25日：

講講D背景先，如果唔系，其實都幾難明解

奶奶 - 年過70，一位一生貢獻教育的媽媽（奶奶系小學意大利文到教師），作育英才30年，對3個仔盡心盡力教導，一日三餐做足二十幾年，接送返學放學，努力工作同讀書，公主爹話我知，佢細細等奶奶以為佢瞓咗之后，佢就偷偷地爬起身，睇媽媽讀書。奶奶系一位好有教養的老太太。奶奶系那不勒斯人，同老爺結婚后，因為老爺的爸爸要舉家搬家到羅馬，奶奶就系60年代，離開佢屋企，父母、朋友家人、學生學校，隨夫家到羅馬。可以想象奶奶系一個意志堅強的女性同系一個虔誠的天主教徒。

老爺 - 剛剛70歲，一個無乜所謂的人，隨和到唔恨，愛惜3個仔，顧家，好老公同老豆，唯一缺點…… 太好動……你叫佢唔郁等于攞佢命！

兩老健康算唔錯，奶奶小毛病多，老爺07年發現有心臟病，所以要成日提佢唔可以操勞同千奇咪激氣…… 兩老依家攞退休金過活，呢幾年通貨膨脹得緊要，所以可以花的錢越來越少。三年前，老爺奶奶賣咗海邊的度假屋，幫補我地同溫達老豆的新居。

圣誕節，老爺奶奶非常忙碌的節日，佢地系由12月1日已經開始忙，忙買禮物，買圣誕飯菜。呢幾年，24日晚系食魚，25日午餐系肉，26日比較隨意。老爺奶奶比較專注系24 同25日果兩餐。老爺奶奶系5號已經開出菜單，今年2餐的所有，頭盤、主菜、等清單，打電話問嘥3個仔，有無意見？25日奶奶整橙汁鴨，有無問題啊？無人有異議喇，老爺奶奶就開始買菜…… 咪以為買菜好簡單……24日的海鮮，老爺奶奶系特登開車去咗  Abruzzo　(另一個省）買，話舊年系羅馬買到的貨色又貴又唔好，今年去老甘遠買…… 來回4個鐘車程，只是為咗一餐飯的2道菜。果日系10號…… 佢地驚太遲，買唔到好貨色。
之后，奶奶去訂鴨，20日就攞到喇，因為果日，老爺奶奶去菜市場買咗成15公斤的蔬菜水果（個市場比較近，都系羅馬入面）回程就順手攞只鴨返屋企開始腌……

為咗呢兩餐飯，當然花咗唔少錢，不過老爺奶奶都好樂意，仲有，佢地要買9個人的禮物，可以想象唔單系錢，仲有體力，果段時間，我地日日都要問住老爺身體如何，真系好驚佢頂唔住……

23日今年24 同 25日的飯局，移師去溫達老豆屋企，要帶的嘢太多，所以23日老爺奶奶開始搬咗部分的廚具去溫達老豆屋企，加上溫達老豆屋企間客房到寢具唔齊，奶奶就連寢具都自己帶過去。

24日
晚餐系老爺一手主理，老爺煮海鮮非常正！當晚就系3弟兄，老爺、奶奶同我共6個人，兩個侄子要同媽媽婆婆過，所以無出現（二佬小狼老豆同前妻離咗婚，兩個仔女，小狼16歲，小琪14歲），吧渣要同佢婆婆、阿姨過，所以之后返“屋企”先見到佢（唔記得講，9月左右佢搬咗黎同溫達老豆住，變成家中女主人）。餐桌擺設無乜，有4杯Ikex 的蠟燭，玻璃杯同膠碟，呢樣嘢比較奇怪，因為通常奶奶堅持系節日系唔會用膠碟，不過可能溫達老豆屋企無洗碗機（個烤箱同洗碗機話咗買好耐都唔見影）所以費事洗甘多嘢咪用膠碟呱。奶奶仲問我25日朝去我地屋企烤鴨可唔可以，我話當然無問題啦！不過奶奶又唔放心老爺一個系溫達老豆屋企炸蘑菇，所以最后同公主爹即場系網上搵咗個無系烤箱的食譜整鴨。洗碗過位系老爺，佢唔俾我洗，我最后都系系后面掩掩揚揚一輪之后，搶到個抹碗位。過咗半夜吧渣就返到黎喇。

25日開火事件
我 地到達的時候，老爺奶奶如常地系廚房忙到抽筋，我就問有乜可以幫手，奶奶叫我幫只鴨轉身，老爺就話佢自己搞得掂，有D奇怪，正常，吧渣都會系廚房咖，今日 唔見咗人，系客廳玩Wii。我就繼續系廚房幫下兩老，等小狼、小琪同小狼老豆都到，就煮頭盤，個醬系意大利腸熬到番茄醬，系奶奶的拿手好戲之一。搞掂之 后，上臺……我本來無留意張餐桌的擺設，膠杯同膠碟，連昨晚的蠟燭都無埋，系見到奶奶到餐桌的時候呆一呆先留意到有D唔同。
頭盤完就當然系主菜， 吧渣就問奶奶系咪用意大利腸整個醬咖，奶奶話系阿，有3條，甘吧渣就起身，上廚房攞咗一條腸返上餐桌自己食，奶奶望一望之后，就去廚房攞鴨落黎，跟住小狼 同小琪同佢地老豆都話，鴨其實麻麻，攞咗好細件試咗，不過頂唔住，所以放棄。跟住，吧渣話唔鐘意食鴨，連溫達老豆都話唔食，兩個連試都唔試，奶奶就對溫達 老豆講作句”依家你凈鐘意食大餐廳的大餐，屋企家常菜唔對你口味喇！“火藥味非常重，奶奶好少會甘樣，之后就同小狼老豆講，應該仲有意大利腸，攞俾兩個仔 女食吧，不過大家見狀，都唔敢郁…… 公主爹打完場，話鴨味唔系個個受得，不過多謝奶奶用心整…… 救唔到幾多，不過緩和一下氣氛。不過又奇怪，當場唔食的人唔凈溫達老豆吖，點解凈對佢開火？？
之后個日系到我地屋企食飯，吧渣就列張清單佢同溫達 老豆有乜唔食……其實好鬼煩，吧渣唔食 lasania 、炒飯同甜品…… 溫達老豆唔食lasania 同甜品…… 我已經唔系甘高興，我屋企唔系餐廳……乜依家搞到好似預先點菜…… 不過人家都開聲話唔食呢唔食路，做東道就自然會就下，點都系我老公的大佬，無謂因為煮多兩樣嘢搞到唔順超。之后同公主爹講，好少見奶奶甘火，公主爹話奶奶 夸張咗，唔食咪算啰。我就話有D嘢唔妥…… 公主爹話我多心 。我登奶奶傷心……一心一意做到最好，得唔到欣賞之余仲好似系佢做錯嘢甘，一盆冷水照頭淋…… 是日邊個洗碗？吧渣同溫達老豆……個組合有D怪，因為通常溫達老豆系唔洗碗，我又好如常地去幫忙啦，點知吧渣話唔洗，好我又唔會堅持，你又唔系老爺奶奶， 我唔會搶黎做，加上之前差不多成盤 profitol 都俾你吞咗，咪由得你同溫達老豆系廚房密傾。

26日奶奶的苦水噴泉
晨早，整面包，老爺奶奶最鐘意食面包，公主爹都好鐘意食屋企整的面包，所以早早起身就發面包啦。老爺奶奶到屋企，差不多12：30左右，剛剛個面包就出爐，老爺奶奶當然就系第一個試食,老爺問，系咪無落鹽呢，系阿！無鹽咖，老爺就呵呵，你奶奶最鐘意系無鹽面包。面包好好味，熱騰騰的面包系最好味，又切咗件食 我知道老爺鐘意食有鹽的面包，不過老爺有心臟病后，醫生話老爺要少鹽、少油、少勞動、少勞氣、戒煙、少咖啡…… 老爺成日話少咗好多人生樂趣，平時一個星期打2次網球，依家無得打…… 面包唔單系因為奶奶鐘意食無鹽，加上呢幾日的大魚大肉，其實都好多鹽，所以少一樣有鹽，就少一樣。奶奶當然就對各面包又愛又恨，因為唔可以未開餐就食甘多 面包，所以叫我收起，如果唔系，佢會忍唔住食太多。
吧渣同溫達老豆遲到，算啦……都知佢地系遲到怪物…… 入到屋，吧渣走過黎廚房，我就話又面包，要唔要D吖，當時只有我系到，甘佢就攞咗舊食，”無鹽咖，唔得啵“，乜嘢叫唔得？？？ 我凈系講咗句”奶奶同為老公鐘意食無鹽面包“ 之后笑一笑，佢就跟住話，”我都想自己整，不過要等1月有錢先買部面包機，甘你系點整面包咖？“，我咪答，“烤箱”，吧渣好無癮就走咗去客廳。
系之前個篇為寫咗佢趕住走同食咗D乜，所以呢到唔重復……
吧渣同溫達老豆走咗之后，老爺同公主爹系客廳玩哥爾夫球（電視游戲），難得老爺搵到D可以輕量運動的項目。我洗碗，奶奶就好細聲開始吐苦水，因為佢唔想老爺聽到…… 不過太細聲，我就話，奶奶，我地出去掉垃圾，一面行一面講吧。

苦水 -
老人家的苦水特別苦，特別系覺得奶奶受咗冤屈。25日開火只系好少的一部分，奶奶其實系嬲吧渣…… 不過因為佢系溫達老豆條菜，所以奶奶唔可以鬧佢，所以只能夠對溫達老豆開火。
苦水1：
25 日早，奶奶晨早系廚房整鴨，吧渣落樓（睡房系3樓，廚房同客房系2.5樓）就話，好香阿，好好味甘啵。奶奶個刻當然就好開心，覺得自己辛苦整都系好值得的 事情。到上餐桌先覺得俾吧渣玩，朝早花好香好正，點知一聲唔出，自己攞咗條腸食，系餐桌上話唔食鴨。覺得吧渣非常無教養同非常假。

苦水2：
吧渣經常請朋友返溫達老豆屋企食飯，張餐桌布置得好靚，仲特登成日花錢買碟買玻璃杯、買燭臺、買公仔配搭，每次都有主題！24日 晚，奶奶已經問溫達老豆攞D燭臺擺設，溫達老豆話唔知吧渣擺咗去邊……其實打開個柜就系曬到，不過奶奶當然唔會走去搞，點都系溫達老豆屋企。好喇，25 日，吧渣系屋企咖，點解上曬D膠碟同膠杯？系咪溫達老豆的屋企人就可以甘對待。奶奶要求唔系高，洗碗又唔一定系得吧渣，通常一家人食完飯，我同奶奶都會幫 手洗廚房。無擺設都算，不過膠碟同膠杯就真系過份咗。奶奶覺得吧渣當溫達老豆屋企人的地位好低，同自己唔爭氣，太依賴吧渣會擺設布置餐桌。

苦水3：
25日早，吧渣落樓，其實得條底褲同件薄T通屋走，奶奶唔出聲，佢住系到，系佢”屋企“佢點著衫，無得講……不過唔該用下個腦，老爺都系到咖……著成咖出現，博乜啊？奶奶系女人，不過唔該尊重自己尊重老人家，著返D嘢啦。

苦水4：
奶奶無講到好明，不過我知道呢件苦水其實最傷佢心…… 奶奶聽到吧渣同某人講電話，話溫達老豆今年俾佢的圣誕禮物系去都柏林旅游，30日出發1月6日返到羅馬。奶奶到25日先知佢地出游 佢兩個成日四圍旅游，本來系好普通的事，點解甘偷偷摸摸？因為奶奶系1月頭生日，佢地返黎已經過咗奶奶生日……我同公主爹好早就知道佢地去都柏林，不過溫 達老豆話去過周末，所以都無捻過奶奶生日佢唔系到。奶奶每年生日，唔一定正日做，不過都會系果個星期六或日做。能令奶奶最高興的事情，系一家人一齊，奶奶 的夢想系買間超級大屋，成家人一齊住…… 但溫達老豆系星期日晚到羅馬，甘已經等于今年唔同奶奶做生日。明知奶奶最憎人唔坦白，如果真系唔想同奶奶做生日，坦白D，搞到吧渣系奶奶面前講電話先俾奶 奶發現，咪攞黎衰……

苦水5：
老爺奶奶賣咗海濱度假屋，D錢”借“俾我地同溫達老豆新居用。當然上等之人，有借有還，老爺奶奶亦從來唔會攤大手板問攞翻錢，醒目，就會自己還。溫達老豆 今年同吧渣旅游唔知幾多次，因為吧渣鐘意……洗咗好多錢搞個花園、一部新跑車，吧渣都買咗好多嘢俾溫達老豆，包括一部剪草車（成1000歐元)做圣誕禮物，不過就無買樣非常緊要的嘢叫：洗衣機…… 甘點洗衫阿？老爺奶奶啰！老爺個個星期開車去溫達老豆屋企攞衫，次次一大堆，奶奶洗衫同涼衣服，奶奶洗衫好仔細，分顏色，分溫度洗，所以個堆衫洗4輪，奶 奶唔可以燙衫，會頭暈，所以干咗等老爺熨燙，燙完送翻溫達老豆屋企……吧渣做咗乜？咪就系乜都無做啰。奶奶估吧渣將佢自己D衫攞俾佢婆婆洗，…… 如事者，老爺奶奶幫溫達老豆洗咗3年衫……奶奶唔講都唔知道，原來溫達老豆到依家一毫子都無還過俾老爺奶奶，花錢系D唔等洗嘢上高，勞役兩個老人家…… 我覺得奶奶太好，如果唔想受就出聲，不過老爺系最疼溫達老豆，所以奶奶唔出聲，免溫達老豆分心工作，同老爺嘈家無寧日……
我地剛入伙時，未有洗衣機，奶奶叫我去佢屋企洗衫，因為干唔切，果日無得收，老爺話等干咗幫我收，點知佢燙埋送過黎我屋企。之后，我同老爺奶奶講我唔再攞衫去洗，我自己手洗，到有洗衣機。我唔想老爺奶奶辛苦，雖然佢地話無所謂，1次半次可以，不過就系洗咗個1次，老爺就同我燙曬D衫，勞煩佢地，我過意唔去，我仲年輕力壯，可以自己洗衫，雖然做多咗功夫，不過比勞煩佢地來得安樂。
奶奶部洗衣機舊年壞咗，我地出錢買個臺俾佢地，奶奶話，當時都有同溫達老豆講，不過佢無反應，反而系我地叫佢去睇要邊款，出錢買（唔系還俾佢地個筆，系額 外俾出黎）。奶奶一直都對呢兩件事個心一直有條刺…… 溫達老豆勞役咗奶奶部洗衣機甘耐，部機壞咗，吧渣攞咗返佢屋企洗咗1次甘大把就巴巴嗶嗶同人講，溫達老豆呢，部洗衣機佢有份用，不過要買部新的時候就咋唔 知。奶奶覺得，溫達老豆變咗，越同吧渣系一齊，就同奶奶的距離越遠 （呢樣比較大wok）。
吧渣令溫達老豆洗咗好多錢，成日系我同奶奶面前話溫達老豆買咗鉆石首飾俾佢，不過見我無乜反應，之后就唔再系我面前招搖，唉……吧渣，你想我俾個乜反應你吖…… 我都無鐘意首飾同鉆石，當然就無反應啦。奶奶其實看在眼里……

仲有苦水6、7、8 不過我同奶奶已經行咗去掉咗3次垃圾，已經令老爺懷疑，所以奶奶就話下次再吐過…… 苦水6大概系唔鐘意吧渣搬去同溫達老豆住，好似系因為無人話俾兩老知，系兩老自己發現…… 大概估到為何奶奶唔高興，不過等佢申好過我自己亂估。

奶奶吐咗D苦水后，有番D笑容，等兩老離開屋企后，我就同公主爹講，奶奶唔老黎吧渣…… 公主爹先恍然大悟,佢以為奶奶系嬲溫達老豆而已！之后將奶奶的苦水講俾佢聽，連公主爹都唔知道溫達老豆6號先返羅馬……同意奶奶嬲得有道理，甘呢年（吧渣同溫達老豆系返埋差不多一年）吧渣對奶奶的奉承，就甘一朝喪盡。

公主爹好陰濕甘笑我，吧渣失寵（其實差不多系俾奶奶判咗死刑），我應該好心涼。我唔系心涼，我系好高興！高興在原來我唔系心多，原來唔系因為我唔系意大利人所以會誤解身體語言同話中有骨，原來我觀人于微的能力仲系到。

新年大團圓

昨日好趕甘寫完之后先發現，
點解我整咗6個餅，得4個系個 blog 到咖？
因為漏咗個1月1日的 La babà ！

La babà 正常都唔系甘樣咖，不過新年嘛…… 整個“銅錢”樣，好意頭D甘啰。

不過31日太趕頭趕命去奶奶屋企食飯，所以個 baba' 其實發得唔夠盡，比預期中矮咗D，好彩唔難食

全程整甘多個甜品，都幾開心咖，因為奶奶系好鐘意食甜品，（除咗個麻煩的吧渣之外，其實個個都鐘意）奶奶從小就習慣每逢節日，佢爸爸都會特別買D甜品做節，久而久之，變成無甜品店節日系唔夠完美，奶奶會有D失落感。奶奶系呢個節日已經有好多失落的感覺，我的蛋糕甜品都可以做到安慰佢心靈，所以我都好樂意做”阿茂“