2008年 阿茂雙周第一擊 - 圣誕快樂

第一樣嘢，有太陽，所以公主娘心情好翻，
咳嗽仲有少少，不過影響唔大
多謝各位姐妹關心，送翻D心意俾大家
預祝各位圣誕（唔理系唔系白色）快樂，甜甜蜜蜜，
心心相印！
呢批系公主娘改版夾心餅。

原本個食譜系 shoft bread，不過太多牛油……
圣誕節已經甘多嘢要食，呢D送俾人的曲奇餅就唔好甘油啰
仲有我手多，加咗D香橙皮落去。

材料：
100g 牛油
130g 糖（公主娘偷工減料怕太甜所以用120g）
1只雞蛋
香草1茶匙
甜品用發粉（可能系soda powder 掛）1茶匙（注意：呢樣系公主娘加落去，原來食譜都系無…… 我系咪好手多）
200g 面粉
少許鹽
香橙皮果醬同幼白糖隨量
我呢個份量做咗29件

做法：
1.Cream 牛油同糖，cream 到滑
2.雞蛋、香橙皮和香草入 1中。
3.鹽、發粉、和面粉拌勻倒入1和2的混合中。
用膠刀拌勻。
將一半面團放在牛油紙上，再鋪上另一張牛油紙滾成3mm的面餅
繼續將另一半的面團重復。（如果你個雪柜比較細，可能要分成3次）
將面餅放入雪柜15分鐘或以上
我呢……好節儉，所以15分鐘就“吸"模，將個負形 recycle 成為多1個面餅
如果唔玩 recycle 就可以雪1個鐘頭先吸"模。
記得要”吸“雙數，一半中間開個心，我無心形模，個心系用刀自己雕。

未入烤箱的面餅就留系雪柜，如果唔系會烤的時候變形。
烤箱180°C 15分鐘
出爐小心用刀挑起D餅，唔系會癡底。待涼。
（我連個烤盤都無落牛油同面粉，正！）
面撒上幼白糖，個低反轉，面向烤盤過面搽上果醬之后貼個面上去。
注意，咪貪心搽太多果醬。

場面好似好偉大…… 我都唔知道做乜會搞成甘……

俾我只手指你睇下一只圣誕襪有幾大
熊仔同圣誕襪子都系甘高，系肥仔咗少少



原本食譜系…… 3打8件……我整下整下都已經覺得，
點可能得44件甘少……
到扮靚的時候（上 royal icing)數220件
如果計埋D唔靚仔俾我”飛走“同公主爹試味（佢試咗一打……）有成250多件。
都唔知道系咪我節儉，recycle 咗之后，
同我個模比較細（我鐘意D嘢精致小巧）所以搞成甘……

餅身材料：(呢個又系個烤盤唔駛落牛油或面粉直接擺上去就可以入爐）
750g 面粉
3 茶匙 baking powder
1 茶匙 鹽
400g 糖（當然我又少咗…… 用咗350g)
300g 牛油
2只雞蛋
2 茶匙香草
檸檬皮（又系我手多）1茶匙

餅做法
1. Cream 糖和牛油到滑
2. 加雞蛋和香草和檸檬皮落1.
其他材料拌勻放入1和2的混合中
用手指尖搓成滑的面團。
將一小部分面團放在牛油紙上，再鋪上另一張牛油紙滾成理想厚度的面餅（我今次應該系6mm 到7mm高）
將面餅放入雪柜冰20分鐘或以上
（我第一次冰咗佢地4個鐘頭，不過發現10分鐘其實都可以）
之后”吸“好就擺上烤盤
烤箱溫度180°C 8-10分鐘

扮靚
Royal icing
又系公主娘亂黎（偷工減料）之作
原本系500g 幼白糖加2只雞蛋白，1茶匙檸檬汁
我估我唔需要用到甘多所以當一半，
理論上系250g 幼白糖1只雞蛋白同半茶匙檸檬汁
當我開咗一包125g 幼白糖……哇要唔要甘多糖呀……
再睇下有人話原來檸檬汁的作用系硬化D icing。
甘我咪用咗125g  幼白糖1只雞蛋白同1茶匙檸檬汁
用機打到佢企身，不過打到甘上下，我覺得好似都好水汪汪，
我都驚驚地佢到時唔定型唔干咪死火。
所以最后系加咗40g 白糖，就似樣勒。

扮靚的時候系用個最細的噴嘴，勾咗想要的外形之后就添好。
如果未用的 icing 就密封放入雪柜。用的時候拌勻就可以用。
當D icing 未干的時候，就放D七彩糖上去（小朋友鐘意有顏色的嘢嘛）
甘就會癡住。我晾咗佢地5、6個鐘頭左右就可以收入樽。

整餅最大的挑戰系 - 公主系到搞搞震！
佢鐘意香草、鐘意牛油、鐘意坐廚房！！
我整的時候還好，因為有香橙同檸檬可以擺到成枱都系
公主就無機會啦，點知道佢走去搞我D面餅……
好彩俾我發現，但佢點可以忍住呼吸，越過檸檬同香橙的防線
走到甘近！！ 唔通D牛油真系甘吸引！！

晾的時候D餅要系柜入面，搵位都搞咗我半個鐘頭。

我妹問我系咪攞去賣…… 整甘多做乜。我唔系想整甘多咖！
今年我要回禮嘛，鄰居德國佬年年都送包自制（當然系親子）曲奇餅，
我地D客，我地都無送過嘢。
今年就想送D餅回德國佬同其他鄰居（希望佢地嘈少D）
仲有其他朋友同獸醫老友（系呀，公主現任御醫依家系我地老友同公主爹的波友）。

德國佬昨日已經搶閘成功，送咗包餅……
佢系我呢到D鄰居中最可以”吹水“的一個，其他兩句我就借乜盾……
因為我同德國佬的意大利文都系”海軍斗水兵“，
佢唔會講羅馬方言同俚語，
所以我唔會懵盛盛唔識得反應。
可一吹1個鐘頭（系花園或系我或佢屋企門口）
吹乜，天文地利、經濟、宗教信仰、政治、健康、家庭教育……
連藝術、市場學都可以講兩嘴。
同佢吹水用意大利文的時候，
我會覺得系咪自己今早用咗本意大利文字典做早餐？！
今年D餅都系因為埝起呢個好鄰居引發的 idea ，所以減少整蛋糕，
整D曲奇餅俾街坊同公主爹的屋企人（做乜突然甘生外）
因為溫達老豆啰，因為吧渣啰，吧渣有咗嘛，
佢仲好高興有咗3星期已經話俾奶奶知。
佢有咗1個月就向我地宣布…… 同個肚講，叫叔叔，叫嬸嬸啦。
奶奶當然就開始緊張佢，老爺，有D好似知唔以對甘款。
之后日日都有電話俾吧渣。

溫達老豆同吧渣成日同奶奶講話我古怪。
所以奶奶有壓力俾我。上次我拒絕咗去大學教英文，
佢之后就系甘問我發生乜事，話之前都有教過，
教得好所以大學今年叫你教，有乜唔妥，你系咪唔開心，
點唔妥邊度唔妥……

我無唔妥，我唔去教，因為我會超額，我之前去教的時候未有翻譯份合約系身，
唔系俾好多稅，但加埋依家我分合約同D freelance 超額
俾多D稅，搵到都蓋唔翻，仲得果一堂，時間有唔就，明年又唔知道有無得教，
甘咪唔教啰。但奶奶總系覺得唔系好放心，驚我自閉、離群……
點解我知道佢甘同奶奶講過我古怪？
因為溫達老豆系問公主爹先，話覺得我好古怪……
公主爹當然知道我做乜，
無點答佢，系話我公司忙多嘢做就算。
之后就輪到奶奶問公主爹做乜我甘古怪……
話溫達老豆同吧渣覺得我好古怪（我有段時間無見奶奶）
哇……多謝啵。免費廣告呀！
我最唔鐘意系搞到奶奶擔心埋D唔存在的嘢，
唔系甘呀化……
我唔鐘意同你兩件吹水，唔鐘意見你地，唔等于我自閉jee……
公主娘系 EQ 零蛋（絕對唔會抗拒呢個零蛋，我系怕乜認）
我唔系好social 亦系真。
我唔鐘意就唔會去同佢無啦啦巴結，無甘好閑情……
兩只狗又搞唔掂，依家有個細路，仲要系意外無 plan，
連自己做人老豆都無心理準備就要生，
果件又話要結婚，呢件又唔肯，去到奶奶到……扮可憐（我可憐奶奶無日安寧）
懷胎3個月都未夠就為個細路將來13歲點家教系全家人面前嘈……
奶奶突然問我覺得將來個細路應該點教……甘無里頭……點答呀，
我求其一句……間屋連BB 房同樓梯欄桿都無，整咗呢D眼前嘢先啦。
全場靜默1分鐘，溫達老豆同吧渣兩個 O 嘴,
之后奶奶話系啵，要整曬呢D嘢先
……幣……我都未系最心底果句就已經可以全場靜默1分鐘……

甘話俾大家知道我心底個句：
如果個細路出到世，你兩個仲系埋一齊先算啦，
你個女出到世，唔系白癡有病先好開始埝多少少教育的問題。
依家要大家甘費腦筋做乜 jee，
我覺得如果要唔好教到個細路好似你兩個甘差品，
我相信唔可以由你兩個教。其實最好你就系唔好生，
吧渣你埝住生都系想綁住個佬，你以為你個女系張王牌，
到時可以用個女扮可憐去奶奶到，由奶奶俾壓力溫達老豆，
溫達老豆就系貪好玩，
橫豎唔結婚又唔會有手尾，玩下可防jee。
奶奶有奶奶鵝同擔心，你繼續去做花花公子也。
個細路將來同你只狗無乜分別，都系寵物，
求其有嘢唔理系咪垃圾都俾佢食就得。
有時間就自己去買車、買衫旅行泡妞去。到時掉底俾奶奶湊啰。

我出咗口果句系最短，又唔違背良心（其實都有少少）的話已經可以叫人靜默。
甘系咪叫古怪呢…… 如果我真系古怪，我就乜都唔理將最心底個句講出黎。
要我忍住唔講真心話，其實我覺得好委屈，甘我不如唔好講嘢好過。
我會覺得好少少。
公主爹知道我唔開心所以都系避開下唔需要我去面對佢地甘多。

我一于同公主爹齊齊扮星星，閃呀！閃呀！不過24、25、26都閃唔出樣……
果幾日要扮聾啞盲，所以蛋糕就唔整甘多1個俾公主爹生日就算。
事前就系呢D曲奇餅頂檔。

我無浸親，仲系到……

系懶、忙、所以無時間上來寫兩句。
羅馬系甘落雨…… 心情都唔會好，做乜都好似唔想做，特別系洗衫，
攞住堆衫擺入洗衣機就已經要埝……D衫之后晾去邊
無論系個洗衣籃定系個洗衣機同晾衣架都已經全院滿座，
洗又唔系，唔洗就更唔掂
日日都黑無乜陽光，好似無乜日夜之分。
我地系市郊海拔220米的斜坡上，
所以羅馬大水浸同我地無乜特別關系。
公主爹上星期仲病鬼埋系屋企，真系小病是福，
甘就唔洗塞6個鐘頭車都唔到公司。

話甘快12月，圣誕已經逼近，有乜做咗……
好唔愿意甘求其擺好咗棵圣誕樹，
禮物……未買，前個星期六就系因為去商場，
公主爹同我兩個都感染感冒病咗。
所以埝起要去行街，去人多的地方買禮物真系怕怕。
公主爹俾我份圣誕禮物就已經系網上訂咗（我指定，費事佢買錯）。
另外一份12月4日同5日已經“搞掂”埋。
因為系一個課程（唔好埝錯，唔系意大利文）得益唔少，
認識咗好多有趣的人物同新嘢。

我俾公主爹果份呢……
我叫去自己上網買，橫豎兩個人都系一個戶口，佢買俾我又好
我買俾佢又好，D錢根本分唔到系邊個到出……
都無乜分別，就自己搞掂算
分別系佢可以無上限同好自由甘買，唔駛問我。

貓爪熱

昨日睇香港東方日報的網上新聞，發現有“貓爪熱”的報道……寫到好嚴重，
追查一下，臺灣亦有個案，奇怪在好似D報道得一部分，唔夠深入，
想理解多D呢種病毒，開始系網上搵呢種由貓傳染人的文件，
用“巴東氏桿菌”去搵……得個吉，因為都幾夜，所以埝住今日先去刮過。
今早開 messenger 見到阿葡萄牙老友，同佢講開，
話我用個中文病毒名搵唔到個英文名，
老友好快就幫我去搵，真好，兩三下手勢就搵到維基的英文版本（cat scratch fever)！ 抵贊加抵嘴
因為搵到個英文病名，連病毒名都有 - Bartonella henselae，
就容易D搵更專業的文章，
系另一個獸醫的文章網站有更深入的介紹
維基的中文版本欠奉，意大利文版本亦無英文版本甘詳盡。
如果有興趣可以去參考獸醫的文章。我只略翻譯一部分，如果需要更詳盡的翻譯，請留言。

由于帶有這種病毒 Bartonella henselae 的貓可能沒有任何病癥，如果懷疑自己的貓受到感染，可以要求獸醫做血液檢查 Bartonella testing 多種測試中比較可靠的檢查，哪種測試請跟獸醫研究。（這樣這么重要的部分報紙無寫……）。

一般家貓，如果一直有管理跳蚤，沒有在街上跟其他的貓接觸，感染率非常底。這種病毒在貓群中由跳蚤傳染。貓傳人的機會只有：

1.被帶有病毒的貓咬或爪傷
2.沒有愈合的傷口被有帶有病毒的貓舔過。

所以盡量避免逗弄街上的貓，容易受這病毒感染的貓只主要為幼貓（又另一重要事項沒有報道）加上幼貓愛玩，弄傷而受感染的機會比較高。貓只不無故爪或咬人。多為意外或人為事故。

如果不幸被貓咬傷或爪傷（特別是街貓，由于欠缺跳蚤的治理，感染機會高），立即用清水和肥皂清理和消毒，如7至12日出現紅腫、腫塊或水泡，立即求醫。如不醫理，可能在一至三周后，在傷處附近出現淋巴結核，腫塊會持續數周至數月，患者同時可能會有感冒的病癥，如，頭疼、發熱、疲累、肌肉酸痛、無胃口等等。大部分的患者可以于數周痊愈。只有5%至15%的個案才會發展成為心臟、腦部、眼睛、腸臟的嚴重引發病癥 - 如被爪傷或咬傷的患者本身的免疫能力較低（如患有癌病，艾滋病，正接受藥物、荷爾蒙或病毒治療而減低免疫能力的人士，或接受內臟移植后的人士）容易引起并更嚴重感染。

如早在出現感冒相同病癥或更早醫治，只需服用抗生素便可。

希望不要因為報紙或網上的報道不詳盡而拋棄自己的貓。我不明白為什么東方日報跑去訪問名人紅星而不是跟獸醫采訪更詳細的資料 ，獸醫的采訪只有兩三句而已！！！反而明星的報道是兩三篇！

新玩具 + 公主近照

公主、公主娘同公主爹全家的新“玩具”
其實系家具多D……
本來呢，金融海嘯之后，應該要緊手少少，
唔好亂花錢……，不過公主個原本個磨爪器

因為公主體重回復到應有的重量（差不多5.1Kg ，11磅多少少）個磨爪器開始承受唔起佢，
有幾次的驚險鏡頭出現之后，一定要短時間內換咗佢……
買材料系最花時間，亦搵唔到合用，因為部分連接的部件已經損耗情況嚴重，
坊間見到合心水的叫價600歐元 系到積極搵錢買新的磨爪器（臺灣好像叫貓樹、磨爪臺）的時候，俾我發現一個歐洲的寵物用品網站，非常大，仲好平！我地睇到個臺600歐元，系網上賣96歐元！ 唔……系……呀……化！

真人真事，公主爹先睇清楚間公司的來路，確定系一間超級大的公司，先進行購物，當然心水系個間96歐元，但入到個甘開心的 地方，點會唔四圍望下先得咖，甘就睇中咗臺再大D，169歐元（你睇我地幾折墮……）因為橫豎都已經有個 budget 我地已經到一半，甘就松手少少啦……

間公司系德國公司（已經比較可信，如果系意大利公司就唔洗埝） zooplus 后面自己加.it 或 .de 根據自己地方加。都系歐羅區，TT唔駛加收費用，仲有系第一次客人同唔系用信用卡結帳，最后收費系151歐元。

zooplus 收到錢后3日送貨（先俾我的一個郵遞號碼可以追蹤）。因為系TT需要2、3日時間，差不多一個星期左右就可以收貨。星期五早上有人送貨。但間貨好似……好輕飄飄，無理由甘輕，系9.1kg，只怪自己笨，唔記得9.1有幾重，本來果個磨爪器都唔止甘輕啦…… 回頭送貨位老友已經走咗。入到屋打電話俾公主爹，話件貨有問題，打開睇，真系唔齊……公主爹就寫 mail 去問，我就打電話去問速遞公司，速遞公司話可能系2個包裹……但得一個號碼系查唔到。公主見到箱嘢入面有D佢有興趣知道系乜的嘢，就開始虎視眈眈謀住個箱。

唉……希望唔系黑成甘，連公主的新玩具都無咗節。好心急甘等 zooplus 回音的時候，睇下個箱，因為貼滿好多郵遞的貼子，所以無留意， 2 von 2 甘即系呢箱系 no.2 箱，仲有一箱未到啦……甘究竟系點呢，messanger 公主爹話我發現原來呢箱系 n.2仲有n.1的時候。公主爹話未有回音……
下午4點左右，又有人按門鐘，有包裹俾'S. Exxxx" 哇！ 應該系 n.1箱，飛到甘落去，見到好大箱呀！送貨的系 SDA (意大利郵政的速遞服務 好似系甘上下嘢，Allie 如果有錯請指教）唔系同 zooplus 御用的另一家速遞公司。簽收之后，送貨位哥哥話都唔知道邊個寫錯個號碼，好彩佢睇到原本 zooplus 出的文件先送到，如果唔系要我地要等到星期一嚕！箱嘢好鬼重…… 我抬唔到佢上樓梯，唯有滾佢上。公主系原本個磨爪器個頂睇住我滾箱嘢上來，個樣好似系到話“阿娘，做乜甘辛苦，唔等阿爹回來做？”算啦，你阿爹已經系公司跳下跳下甘等人回音，好打個電話話佢知道 n.1箱到。叫我咪開始自己“玩”要等佢一齊裝呀！

上圖就系我地開曬箱之后，開始裝的時候，公主系到檢查佢的新家具。
裝的時間唔系好長，30分鐘搞掂。wala

三層，仲有好多“瞓”位，公主呢，唔系貪心忘舊類型，
個舊磨爪器要我的收起佢先上呢個新的，
個舊的收咗去邊？去公主間房，果個位無甘危險，因為無跳跑道俾去“飛”上去，
所以可以擺個到夜晚等佢系窗口守住個花園。

呢兩日開始見公主系新呢臺最高個位(2米12）瞓，瞓下又落旁邊個兜到瞓，
因為果個位早上陽光普照，公主就可以曬太陽，
唔會嘈我要去花園（家陣個花園唔俾得佢去）

呢兩張系上星期影的，

呢張呢，系舊年12月中的
大家可以見到公主有幾鐘意系呢個廚房位到打躉……

萬圣節都未到…… 圣家甘早出黎博乜？

圣家通常都系十二月第一個星期日先會擺出黎，
當然就唔系好似公主娘依家甘求其擺佢地系露臺到啦！
有曬背景同燈飾咖。
意大利的圣誕節系可以唔擺圣誕樹，擺圣家，
各家有各自傳統。
呢家圣家系我屋企都成10個月，系時候要出現。
星期日太陽好，附近起樓工程星期日唔開工，陽臺陽光充足夠，又唔洗食塵，圣家要“透氣”。

圣家系奶奶的寶貝，咪睇少佢地，佢地屬于古董！ 系奶奶老豆年輕時代已經系到（奶奶話佢6歲已經有呢家圣家），甘大概呢3個像已經有超過60年。價值唔去估計，因為唔系可以用錢去衡量，對奶奶黎講系佢許多美好的回憶。甘點解依家系公主娘屋企出現，甘寶貝，唔通奶奶送俾公主娘？錯！唔系送，系公主娘搶”救“呢三個像。

公主娘成日都話好多嘢做，其實又唔知道自己做緊乜，呢三個像就系其中一項”長久戰“，剛到的時候無影像…… 到搞到一半先記得要影，俾個事前（中）事后對照俾大家睇睇。

圣母像

紅線部分本來系無，瑪麗亞黎到的時候系無鼻……完全系平。個座都跌爛咗……一個大窿。白色個D系我補的 Gesso。

圣 J

（我唔知道佢中文叫乜）右邊成匹胡須無咗，右手臂成條斷過，接駁翻（應該系奶奶手震震甘疵翻）不過接駁有問題……個位對唔準，一邊成條坑，另一邊系途曬出黎。

又系個座都跌爛咗（最傷應該系佢）……個窿好大。



牛牛

阿牛牛系傷得最少個件，不過對角跌咗入個牛肚到，點解會跌到落個肚到，因為牛角個位崩咗，所以大咗就跌到落個肚到。花咗半日先”撩“到出黎。又系白色部分系我由無變到佢有。

奶奶甘心愛呢家圣家（其實成組仲有其他羊馬當然唔少得耶穌）點解會甘傷？前年十一月尾的時候，老爺入醫院，發現有心臟病，奶奶系果段時間日日都好奔波，加上圣誕節又差不多時間到，家頭細務之余仲有好多瑣碎事要記掛。到星期日要放圣家的時候，老爺將圣家系收到好高，奶奶個子好矮，所以要爬梯去攞落黎，可能佢好累同心不在焉，就甘跌咗一盒落地下，就系呢三個像。奶奶一直都無出聲，前年其實我都無留意到呢三個像跌成甘，因為前年奶奶擺到好底，要趴系站臺到先會見到。舊年老爺擺翻圣家系平時擺開的高度（差不多系我視平線，奶奶投訴話太高，不過成家得佢一個甘矮所以老爺話少數服從多數），我先見到佢地搞成甘。見到系有人上咗少少色去蓋，我問奶奶發生乜事，奶奶先話俾我知道。D顏色系兩個孫（我兩個侄）探奶奶的時候想幫奶奶修理，不過最后都系疵唔到，系甘伊上少少色。我當時埝都無埝，話：奶奶，過節之后，你收咗落黎俾我試下補。奶奶好開心，雖然我自己都唔知道整唔整到，不過有心一定會有D嘢做到出離。

一月中的時候，奶奶已經將圣家交咗俾我。第一樣，清理，將小狼同小琪（我兩個侄）涂的顏色清理，同除塵。阿牛牛只角要”撩“出黎。三個像系石膏像。甘就容易好多，當然又系我罐”百搭“ gesso （話時話都用咗成4年幾都仲有成半系到，真好）本來想買石膏做，不過擔心D石膏點疵上去的問題，最后系用阿”百搭“ gesso 層積法甘做翻D立體出黎，一個星期一次，等上次個層干透再上。到第三個星期的時候發現其實都疵得好穩，就可以安心甘繼續整到中途，等干透，已經系6月的時候，公主娘去放假…… 乜都掉低曬！到9月先開始記得，唉呀！圣家呀！！

上兩個星期開始用最細號的砂紙磨平滑（記得影像果陣）。剛過的星期日，見有甘好陽光，所以就去上色，本來系想用模型油，點知道已經唔用得，干曬（成2年都系車房……） 甘點算，油彩啰，橫豎都系畫油畫用的 Gesso…… 應該無問題掛。其實系自己懵炳，成70年前的意大利上色技術，點會有模型油呢樣嘢咖！睇仔細D，個像系用人手上色咖，甘就如此這般，走狗運地，因為系油彩，連D色都好容易“溝”到接近原本的顏色，公主娘用咗5個鐘頭就幫三個像上好色，等干（天氣都幾潮濕）。希望下星期圣家可以返奶奶屋企。

Jerry 劫后余生大公開！

Jerry 系佢陽臺上最鐘意打躉個位。

卷埋你就睇唔到我無咗毛的窿

我要食飯，咪左頭左勢，咬你咖！





Jerry 翻到羅馬，Boss 同奶奶都話佢好唔好老皮……無啦啦會咬人同爪人。
唔知道系咪心火盛，定系樓上系甘裝修嘈到佢發燜。

有無覺得似曾相識

星期日老爺 Boss 生日，
去客廳影翻張相。
個客廳唔系成日招待客人，
因為 Jerry 成日走去D沙發到磨爪，
所以奶奶成日刪住大廳道門。
有無覺得右邊張畫好似系邊到見過？

老爺今年的生日蛋糕 - 好檸的 delizia al limone

公主爹老豆 - 我老爺，屋企人除咗奶奶（奶奶系叫佢個名），兩個孫叫佢做 Nonno 之外，
都系叫佢做 Boss，點解…… 唔知道啵，
佢唔鐘意D仔叫佢做 babo 鐘意佢地叫佢做 Boss，
我系跟公主爹叫老爺做 Boss，
叫奶奶做 Mamma。
所以老爺個生日蛋糕系寫 Boss
我之前問老爺鐘意食乜甜品，佢話無乜所謂，系好食的甜品都會鐘意
不過我知道老爺鐘意檸檬（唔系粵語殘片個演員），鐘意檸檬的黃色，
鐘意檸檬味的餅干，屋企棵果樹系檸檬樹，連送俾溫達老豆屋企入伙棵樹都系檸檬。
所以搵咗個檸檬到唔可以再檸檬的蛋糕食譜做佢70大壽的蛋糕。

我整呢個 delizia al limone （英文應該叫 Lemon delight）的時候，
其實無話俾奶奶知道，奶奶前1日已經訂咗另外一個蛋糕，
所以老爺生日搞到成枱都系蛋糕

個原來食譜系意大利文，
呢到用我的低能翻譯俾大家睇下，
咪以為個蛋糕系一件過 mono piece
其實系12個 muffin size 蛋糕仔做餅，
上面全部都系 cream （因為老爺同奶奶都鐘意食 cream)
所以重手D都無問題。

蛋糕材料：
150克砂糖，2只雞蛋，1個檸檬（皮和檸檬汁），90克牛油（室溫放軟），100克麵粉，50克薯粉，1湯匙甜品用的發粉。
原本食譜系將所有材料撈埋就可以入烤箱180°C 15分鐘
我覺得好似會發得麻麻，所以系將牛油搓入麵粉同薯粉到，將蛋黃同蛋白分開，蛋白加糖打到企身，先撈埋如已經涂上牛油同麵粉的 muffin 盤到。
效果唔錯（因為無得比較，第一次做系甘上下）
蛋糕成品放涼待用。

糖漿（用黎浸蛋糕用）
100克砂糖，100克水，1個大檸檬的皮，煮滾，放涼前將檸檬皮除掉。
完全冷卻后，加50克 Limoncello 拌勻。

但蛋糕同糖漿都冷卻后，用糖漿淋上蛋糕上。我將D蛋糕仔放入個筲箕到先淋糖漿，漏出黎的糖漿再淋落蛋糕到直至所有糖漿都俾蛋糕吸收為止。

將預備好的蛋糕排放好，每一個中間都有空間，等D cream fill in the blank。

Cream
500ml 鮮奶，2只蛋黃，150克砂糖，60克麵粉，30克薯粉，一個檸檬的皮。
以上材料拌勻，煮滾收慢火直至少許糊狀，離火待涼。200克奶油打至企身拌入已經冷卻的成品到，再放上蛋糕上。

我煮個 cream 杰少少，可以蓋到見唔到原來系12個蛋糕仔

整 cream 有兩個蛋白多出黎，我甘超級節儉一定會好好利用，就將D蛋白加糖，
打到企身，噴好D裝飾 整 Meringa，不過無”局“到好硬身，因為老爺奶奶D牙唔系甘好，所以有造型唔會變形就收火。


個蛋糕系10人分量，但食咗好豐富的午餐后，2個甜品一定有余。
奶奶話老爺得閑就攞只勺子去雪柜偷檸檬 cream 食 第二日
個蛋糕系個雪柜到消失咗，但只碟仲系雪柜到……

公主近照

有無發現公主肥咗大咗多毛咗D毛長咗？
呢幾張系星期六影，今日又發現佢d 毛好似又長D……

家貓街貓

前日系郁記到睇到Mel R 去咗 我都好唔開心，
雖然我未摸過 Mel R，未同佢玩過，
佢更加唔知道我系乜水，不過郁記一直都有寫同post佢由細細貓到去果日的照片，
好似我系睇住佢大甘，所以睇到佢甘離開，雖然未至于坐系地下喊，
不過一直睇就一直喊……
郁記有講過歐洲人對養貓狗的概念同我地好唔同。
貓狗地系系屋企外走動，有提供糧草同水，唔會入屋企，
我通常都覺得甘同“街貓‘無乜分別。我地唔同意甘叫養貓。
各人有各人意見點養自己的貓，我地無權利去插手人家點養。
自由系街上走動的代價就系危機…… 而且唔單系自己的貓，連人家的貓都會有危機.

系街上自由走動的貓，可以話”幾“幸福，
如果個”主人”系負責的話……
點叫負責，絕育其一，
健康方面，每年都要打針同做好多防疫。
要知道貓群中有好多傳染病，媒體可以包括：血液同排泄物、寄生蟲。
貓系有地盤主義的動物，好多時都會因為地盤而打架，
排泄物同時系劃分地盤的主要“工具”，
所以系街上自由走動的貓只都會好容易患病。
傳染病當中最恐怖的系 FIV, FeLV、FIP 呢幾種病毒，亦稱為貓的艾滋病。
感染的貓如果發病可以系1個月內死亡，無任何醫療方法。只有預防疫苗。
病癥如果無發病只能夠驗血鑒定。由呢幾種病毒可以引發其他的病。
如果要打預防疫苗，要先驗血，驗血一次通常要50歐元，
好多人就會因為甘而唔會做任何嘢，因為“貓之嘛……有9條命，唔洗甘緊張“的態度。

絕育除了系控制”貓口“之外，亦同時減低傳染病散播，
我日日都見到附近好多街貓，只只都又瘦又細，有D無咗只眼，
有d 斷腳，但我唔夠膽帶翻屋企，因為佢地系有人養！！！
同時我都唔知道佢地有無病同寄生蟲，好驚會傳染俾公主就大鑊。

現在的街貓好多都面對路面的交通。意外傷亡好高，以前系農莊，
D貓可以系農莊內自由自在，因為唔會有甘多車，遠離其他的貓，
但貓現在的生活環境唔系系農莊，日日都會見到好多120km/hr 的車！
同狗打架…… 亦系另一種無可避免的危機。
如果系自己的貓，請將佢變成家貓。遠離危機。
如自家家居環境唔許可，請唔好養貓，養貓系一種責任，唔系一種玩具。
唔系因為要教小朋友要有愛心的”教科書“。

點解甘勞氣，除咗因為見 Mel R 去咗之外，
公主最近幾個月都唔可以去花園玩。點解？
因為D無知的人，話自己養貓，可以連喂都唔喂，自己放假1個月，
去第二到度假，就掉底2只貓周圍走。
兩只貓自己搵食，搵貓砂。甘的主人，我唔相信呢兩只貓有打預防疫苗。
呢兩只可憐的貓走到系我花園開大細！我地花園唔系甘容易可以入，
但呢兩只貓就爬過4幅2米高圍欄走到我屋企個花園搞搞震。
夜晚有幾次見到佢地系我地花園到過夜……
公主當然就發曬爛渣…… 但又唔出得去！

后來同鄰居2貓太太講開，佢自己都有兩只家貓，
佢仲慘，唔單系佢屋企花園大小，偷佢只狗D 糧食，
兩只貓整爛個蚊窗3次，破門入屋搗亂，系人家屋企同人家的貓開片！
2貓太太去同呢兩只貓的主人鄰居“理論”，
已經唔要求賠償（3個蚊窗共210歐元，同自己只2只貓的醫藥費）
只系要求唔好俾兩只貓出外，請系自家屋企內養貓。
結論，該位缺德主人話：我唔得閑理甘多動物，養貓系甘咖啦，我唔俾佢地入屋咖，
整污垢個地板（下，甘你只狗又可以入屋？？！）
我好多嘢做，2只貓系我兩個仔，你要理論同佢地講，
下…… 你2位公子得3歲同5歲，
系呀，兩只貓系佢地咖，我都要教育下一代愛護動物。（真唔明原來甘叫愛護動物）
2貓太太好激氣，我都愛貓，但你甘唔叫養貓，
下次我見到佢兩只黎我屋企搗亂，我會打電話報警叫人黎帶走佢地。
缺德的主人仲好理直氣壯甘話，你依家恐嚇呀……

本來我聽到甘，想去鏟人，不過2貓太太拉住我，
我系意大利人呢位缺德的太太都可以甘對我，
你系亞洲人樣，仲要呢到得你一個，太容易認啦，無謂冶麻煩啦。
我好慶，意大利人無知到甘程度簡直難以想象，仲要甘反咬人，簡直過分。
兩只貓無罪，搞到佢兩只要自生自滅就系D甘無知的人。
我同情兩只貓，不過我更加同情公主依家連自己個花園都唔可以去玩，
This is an abuse!!
激死我啦！！

毒奶事件引發的搞笑嘢

自從獸醫唔俾公主食貓餅之后，要有d淀粉質物體代替下，
雖然好多系網上的理論都系話貓系食肉獸，
唔應該俾淀粉質作為貓食。
我成日都系到話……系獸醫同網上言論之間選擇要信邊個的話。
我會選擇獸醫，有乜事，佢要負責，網上言論呢？有乜事系我自誤，仲害埋公主。
當然獸醫有指示系俾幾多分量，
所以系照到足黎俾。

淀粉質，本來獸醫叫我煮米飯咖……

公主呢……一直都唔鐘意食新鮮飯，所以就用嬰兒米粉，之后又有麥粉。

搞笑事件1，
公主系超級麻煩友，呢樣嘢唔系今日先知道。
有日發現D嬰兒麥粉已經食光。
其實已經搵咗幾日P字頭牌子的麥粉，不過搵唔到。
毒奶事件又甘熱，其實我都驚驚地d 嬰兒麥粉的品質可靠性……
所以又想試下俾住家米飯公主食。以前有飯，公主就已經唔理我。
聞2嘢就掉頭走 餓到佢屎屎下，情愿去舔墻同食自己的毛都唔肯掂兜飯
所以都系心大心細甘整咗兜飯加新鮮雞肉。因為系夜晚到天光個餐，
我見佢肯走埋個兜到食，于是就好安心甘安慰自己，
依家無貓餅，所以會食飯。就去瞓。
翌日5：45，公主如常甘系個鬧鐘響之前就黎抄醒我。
我仲以為佢食嘥d 飯，所以到5：45先搵我，如果唔系早在3：38就黎搵我攞食……
到走埋個貓飯碗到……全部白米飯都仲系到，不過D雞肉就已經食清光。
D白米飯系埋一邊，公主好有心機甘將D白米飯撥埋一面。
可能系要花時間將d 飯同雞肉分開，所以佢無3點幾黎叫醒我……
我望下公主，佢仲好得戚甘望住我，
”唔好埝住甘就可以逼我食埋D甘難食的白米飯……“ 真系吹波波。

搞笑事件2
由于公主同我d 白米飯玩”紅海“唯有要買麥粉佢食。
同公主爹去附近間 GS，點知到得 M 字頭只米粉。
公主爹話，甘俾公主試下啰，下，我已經話M字頭，公主唔要……（死未，連牌子都要指定……—。— 米粉就更加唔會要啦 
公主爹唔信邪，就買咗一盒，到屋企，我話，拿， 你睇住呀，
公主真系唔食M字頭的米粉…… 白米飯都仲可以撥開，
米粉無得撥開，就成兜貓糧都唔食
唯有開過兜無米粉的俾佢。公主爹話投降！聽日返屋企經過藥房買啰。

公主爹第二日放工，買咗1盒同1罐翻屋企。
1盒系P字頭的米粉，個罐系N字頭的”成長麥粉“！
連藥房都無最簡單的麥芬賣。公主爹話有，
當佢見識過公主唔要M字頭的嘢之后，就知道點都唔好買M字頭的嘢……
藥房凈見到有M字頭的麥芬，佢走去問藥劑師，
有無P字頭的麥芬，藥劑師話有M字頭個只的麥芬呀，
公主爹答，唔得，藥劑師就好有耐性甘話，其實都系一樣jee。
公主爹答，點會一樣，P字頭一定好D，因為我只貓唔食M字頭條 line，
凈系要P字頭……
公主爹個刻先發現自己甘講有D嘢唔妥……
因為個藥劑師忍笑忍得好辛苦，臉都紅嘥，好辛苦甘話P字頭有米粉，
轉頭之后（可能笑飽之后）問有無試過N字頭的成長麥粉？
公主爹話無啵，甘就兩樣都買咗翻屋企……
P字頭米粉都好啦，頂住先，N字頭的成長麥粉，我話唔得，
公主爹話你都未俾公主食你點知道唔得？下……N字頭重要成長，
雖然條 production line 可能唔同…… 不過就點都有D擔心，
攞上手睇下D成分，跟住話，你認為公主可以食牛奶、糖、香草嗎？
唔得，點可以俾公主食牛奶同糖咖，我話你自己睇，有牛奶、糖同香草，點俾佢食。
公主爹話甘呀，聽日翻藥房換，我已經問，要唔要我去換，
唔系又會笑死個藥劑師，公主爹話唔洗，
費事因為系佢買但我攞去換會唔換。
公主爹攞住罐麥粉去藥房，藥劑師先開聲，
你只貓話唔得呀？……
公主爹都唔覺得有乜問題，仲好自然甘答，
都無開罐麥芬，不過我老婆話唔成份有牛奶，成貓唔食得牛奶，會拉肚子。
藥劑師埝咗一嘢，話我知道邊個系你老婆喇，
系咪，成日攞住獸醫處方單黎買寵物藥物個位中國面孔的太太。
公主爹話，系啰成區得公主娘一個系亞洲樣咋嘛
（所以我都系咪行差踏錯，實在太容易俾人點相）。
我相信…… 呢次事件之后，我地兩個一定成為本區最出名的“貓癡”

p.s 我同公主爹無一齊去藥房，所以d 人好大可能唔知道我地兩個系兩公婆。
我攞住獸醫的處方藥單系 jerry 的，因為系羅馬搵唔到，反而呢間藥店貨源充足。
講開 Jerry，依家好咗好多，不過D上次剃咗D毛都仲未長出黎（差不多成4個月……）不過食量都可以 瘦咗不過 fit 咗。希望天氣凍D佢D毛會長得快d ,圣誕節就可以影翻張相。