老媽子

老妈子之歌(點擊標題去youtube)
如果呢到開唔到，就將呢個鏈接：
http://www.youtube.com/watch?v=uFYcmZEOvW4
cip今日收到朋友俾我的youtube，
剛剛寫咗有關D類似嘢，好有感受，
所以想同大家分享分享。
（非常好笑，可能有好多女朋友好有共鳴）

我的 cultural shock

公主爹第一次去亞洲，有cultural shock 系好正常，不過我有cultural shock 就好古怪，我的cultural shock 系因為公主爹而產生，不過亦系我要反思的時候，系咪我系意大利住咗4年，我變咗而自己唔知？

最大的沖擊，系果晚西貢晚餐，
朋友中有2個系中小學認識的女朋友，話時話都差不多30年朋友，可以話好老友，不過自從大家都出黎做嘢之后，少咗見面，朋友A比較早結婚，有兩個仔仔。系我認識最耐的朋友，因為都成甘多年朋友，好多嘢都可以講同分享，佢有乜問題都會同我email “申” 我都會盡量企系佢角度去俾意見處理事情，不過我系真系好少講我系意大利的“谷氣”嘢佢知（其實我系報喜不報憂）。都見佢甘頭痛兩個兒子的問題同外家關系，所以無謂要佢擔心，因為我知佢系媽媽性格，所以無謂要佢白勞心勞力。

另一個朋友F 同太太連個剛1歲多的兒子黎食飯，我之前唔會碰剛認識的細路，因為個個見到我兇狠樣就哭，不過，鄰居的 Mattina 令我改觀，我第一次見佢，佢就走過黎申手要我抱，Mattina 2歲，好似一個小天使，佢弟弟 Thomas 大小小開始識行，都好鐘意搵我抱。其他我系意大利見朋友的BB都見到我都會伸手要抱抱，無大哭現象，我一位我個死人兇狠樣有所改善。所以就好自然走過去抱。點知佢大哭。朋友F就話，唔記得一早同我講，仔仔怕陌生人，要 warm-up，我非常之唔好意思地搞喊仔仔……

事件1： 唔知講開乜，同朋友A講剛剛搞喊仔仔事件同系意大利D細路唔同。佢俾個令我非常“心臟停頓”的答案：意大利D細路系咪當你系賓妹咋！哈哈哈。我知道佢講笑，不過我亦知道我塊面的面色有幾難睇。

事件2：朋友A叫佢兒子同公主爹打招呼，佢就叫公主爹做"vegitable man" ，我唔知公主爹聽唔聽到，朋友A就笑笑口同個仔講，“你唔可以甘咖，人地會話你無家教”

事件3：朋友A叫佢兒子同朋友F的兒子玩，佢兒子答“我唔同低能仔玩”，朋友A依然無任何動作，都仲系笑住甘話個仔……我希望朋友F聽唔到…… 不過我相信佢太太聽唔到，不過佢聽到，因為之后佢有隨口講“你朋友個仔都幾”曳“……”另一個當晚在場的朋友后黎都有同樣的comment，其實所有當晚在場的人都有通往講同樣的comment，有D比較坦白就話，你朋友唔識教仔，個仔依家唔教就無得教……我非常之鑒戒……

事件4：朋友送禮俾我地，其實真是非常意料之外，我同朋友食飯，唔系想收禮物，只系見見面，特別系D仔仔女女，有D我走咗之后先出世，朋友A的大兒子系我走個陣已經有3歲（就系當晚出現個個），見到朋友們幸福，系我今次再見的原因，孩子帶來的歡樂，可以系父母的面上見到。個晚，朋友A同朋友S送禮物俾我，其實好感動，感動唔在于禮物的價錢同合唔合用，一份心意其實非常之心領，弊在朋友A俾咗我份禮物后，就同公主爹講，我都有買俾你，不過我一見你就知道你唔合用，等我換咗之后再見到你就俾你。死火……公主爹唔老黎，佢好似笑笑口，不過知佢者莫若我…… 不過已經太遲，我都無符。

shock 1: 雖然成晚，公主爹一句都聽唔明，因為全部廣東話（除咗朋友A同佢講有關禮物系用英文之外），不同咪當佢傻，佢睇到好多嘢，仲非常不滿朋友A。問我，你點認識呢個人？公主爹其實對我的朋友都非常有好感，從來無 comment。佢一甘問就有嘢唔妥，我知道朋友A的舉止同笑聲比較夸張，不過都成30年老友，都唔會點話佢。公主爹“佢個仔好無教養……你咪叫我再見到呢個朋友，我唔要見，你要見，你自己去。” 我知道意大利人同中國人一樣對家庭觀念重，好多時都用子女的行為舉止黎衡量父母的教養。不過，我就重來唔捻過到甘地步！個仔"曳“就連朋友都無得做？我真系有Dshock，住咗意大利甘耐先知！禮物事件，公主爹覺得朋友A貶低佢，要因為收朋友A的禮物先出現…… 其實系咪我對意大利的 cultural shock 太唔敏感，所以依家先黎shock 呢？


shock 2:我系意大利其實唔系唔知自己一直都系”種族歧視“陰影下生活。不過我成日自我催眠：同自己講，唔系咖，唔系咖。唔好彩地經常遇到被人欺負我系外國人，雖然我兇狠成性，不過要想想效果，如果真系出事，無謂連累公主爹，所以都忍氣吞聲咗好多次。有段時間驚返華，（系米蘭中國人同意大利警察對抗果段時間），我同日本同事返工都提心吊膽，日本同事系中央火車站俾人大喊“返中國啦，咪留系到”。 同事當聽唔到，急急腳走。講真，我系到同賓妹無乜分別，因為都系外國人，大家都系攞住張“居留證”最多系佢系“工作居留”我系“婚姻居留”，不過你唔攞張居留證出離睇清楚，咪一樣……都系異類。不過返到香港，我可以唔洗催眠自己14日，本來好輕松，系意大利D種族陰影可以放底陣，就因為一句笑話，就會覺得成頭冷水照頭淋，甘都要提醒我，老友都無面俾！再想，其實系咪我錯，一直都無只系報喜不報休，我唔表現我系呢到有我的問題，所以搞到甘？

shock 3:我返香港，一路同公主爹都系講意大利文，因為佢懶得講英文，我又好自然地會對住佢講意大利文。好多時就甘擺烏龍，無啦啦會同小樓子講意大利文，如果系電話小樓子就會話，”你講緊意大利文喇，家姐……“如果系我面前望望我，我就知道自己擺烏龍。我唔要求一個幾十年的朋友，同我妹妹一樣甘對我，不過我希望系起碼能夠體諒我都會有擺烏龍的時候，唔好用D好“鄙視的語氣”同我講。我好shock 我朋友其實唔系一個我一直以為佢系一個好體貼同體諒的人，系咪距離同時間與生活環境會真系令朋友甘疏遠。

我地由北京返到香港之后，朋友A 打電話問我住幾號房，佢系全職家庭主婦看管2個兒子，所以我知道星期六系好寶貴的時間，佢想星期六早上6：00送公主爹的禮物去酒店……我其實都唔知點做好。所以叫佢唔好送過黎，佢特登走去換過份，話一定要送過黎，我已經好客氣甘講，送俾其他人。因為我知道公主爹會點樣……我唔想好似個晚甘，俾公主爹鬧足我2個幾鐘！如果真系送過黎，我捻公主爹同我反面都似。最后只有話，唔想收禮物，連之前送俾我個份其實都唔鐘意，不過檔次無講，朋友A非常唔高興，掛斷電話。

我本來想，系咪我應該同朋友A講實話：公主爹唔老黎你，所以唔好送件禮物黎？如果甘講，就一定會問點解，無理由話因為你唔識教仔，同你行為舉止太夸張，你貶低佢…… 朋友A會好傷佢心。老實話真系好傷人。我又唔想系電話同朋友A討論教孩子的問題，我無子女，我最多都系帶咗小樓子十幾年，我唔可以話我識教細路。我系咪“有異性無朋友呢？”……

香港青衣酒店

好橋地同郁記都系同一間酒店，不過我走咗之后佢先到，寫下呢間酒店的感覺。      唔賣廣告（無錢收）所以個名唔寫出黎啦。

我地住個間系3連酒店最入個間，我地訂7晚，所以有特惠只要4200港幣左右，以香港的酒店的價錢，可以話幾價廉物美。

最鐘意間房無地毯！之前個間同北京個間個地毯搞到公主爹日日"fifi fefe" 房間設計現代化，細細地但好實用。我地住系頂樓，面對住貨運站，不過唔嘈，重有小小海景。工作人員（唔單系接待處，連打掃位姐姐）都非常友善同有禮貌。預訂個陣系用我名，之前攞間行李去存放，“鹿”我張卡，不過由個陣開始發現，所有嘢都寫公主爹個名，有D奇怪，后黎發現，原來酒店方面系將外國游客、香港結婚的客人同大陸游客分層。可能驚搞錯，所以就乜寫公主爹個名落所有嘢到。

本來都捻住再返香港都住呢間酒店，因為服務同個樣都唔錯，個游泳池好正，無人去，同好干凈。點知，出事在另外兩間大量接待中國客人的酒店（好似中間個間最多，我地住個間都有，不過眼見好似少好多）。因為3間酒店旁邊其實系住宅區（好似都幾高尚）。有一個小商場，基本嘢例如：快餐店、便利店、藥店同超級市場都有齊。所以都幾方便，不過有晚比較早返酒店，同公主爹落超級市場買D嘢個陣，大量中國客系超級市場，其實都唔乜所謂，大家都系游客（我都系半個），想開個雪柜攞啤酒，有個大陸婆”棟“只腳壓住個雪柜系到“坳”小腿，D白色的死皮系甘落，好貴嘔心，我同佢講請讓開，望望我唔理！ 甘點算，公主爹望望我，我甘兇狠，點會由得佢，好大力甘打開到門，佢又好兇狠甘望住我，我唔理佢，公主爹知到我系甘，所以唔會出聲（佢講乜個大陸婆都唔識啦）。后面有個男人好大聲打“乞嗤”，個大陸婆系我前面，仲系“棟”住只腳，前無去路，唯有由旁邊小巷走，兜去另一面買埋其他嘢，個死人大陸婆，又唔知幾時走咗系我地前面，又棟起只豬蹄系到坳！個打“乞嗤”的大陸男人好似跟住我地行甘，繼續好大聲甘打“乞嗤”，我叫公主爹去排隊先，我攞埋件嘢就去俾錢，快D離開個地方。

我地出咗超級市場之后，發現果個好大聲打“乞嗤”的男人仲系我后面，我就好鬼大聲鬧佢“無衛生常識，落后的人，掉中國人的臉”公主爹唔知我鬧乜，個個男人就眼光光望住我，再望到公主爹系我旁邊，就唔出聲當聽唔到。
返到酒店房，公主爹話下次唔住呢間酒店，本來捻住離開咗北京，就可以遠離無文化的人，間酒店其實好好，弊在唔可以控制系樓下都有D甘嘢出現。下次俾多D錢住間貴D的酒店，避開…… 中國人幾時可以整體文化水平提高？？

香港鴨寮街 - 公主爹墮落記

無相，因為無影……攞住相機的公主爹唔得閑影……

我地系香港最后7日，公主爹去咗鴨寮街3次……（我頭疼都陪佢去，小樓子病都要同佢去）
3次都唔系1、2個鐘……佢都仲覺得唔夠，鴨寮街系佢天堂，仲問我點解唔早D帶佢去，你咪當我傻，我就系知道你會系到墮落，所以拖到甘遲先俾你黎，如果唔系，咪日日行程都系鴨寮街！
佢好好心機間間鋪頭去貢。電腦商場當然都唔會放過。
最后，仲逼我換新手機。佢買咗乜，
iphone
psp
手指mouse
blue tooth 耳機
其實仲想買其他嘢，不過驚系意大利俾海關”周“同真系捻清楚真系要再買乜先買。
已經話，要明年再去香港鴨寮街，小樓子笑佢，會因為鴨寮街移民香港。

講真，系鴨寮街又真系唔覺眼有鬼佬同游客，雖然HKTA 個網站都有介紹，不過鬼佬游客又真系的公主爹1個！個到D sales 都識講英文，所以應該唔系語言問題，不過系旺角就多好多鬼佬

志蓮靜苑 - 到香港唔睇就笨

志蓮靜苑起好個陣，我系中國，之后一直都唔機會同時間去睇，今次俾我如愿以償！

志蓮靜苑，系香港鉆石山地鐵站附近，到地鐵站就有指示牌，指示你點去。

志蓮靜苑可以話有幾部分，寺院只供游覽至下午4：30， 有另一部分系唔開放，寺院對面系南蓮池園，開放至夜晚。

一直都好鐘意仿唐建筑，特別想研究點樣可以唔洗用釘都可以成個結構都甘穩固。當我話俾公主爹知系香港有個甘建筑，佢就雙眼發亮，一定要睇！

完全無失望，入到寺院，同寶蓮寺好唔同感覺，人好少，加上唔接待旅游團，所以唔見有大陸旅客（大家就可以非常輕松）。寧靜 - 無寶蓮寺的誦經，仲以為自己去做日本…… 所有做工都非常精致。每一個室的佛像都系我見過的佛像中最靚。不過唔可以影相，所以無得比大家睇，最好都系自己親身去睇，因為實在系文字無法形容。

南蓮池院，由凈苑管理，中國式的庭院設計，打理的分廠好，如果鐘意研究建筑的朋友，一定要去花園入面的博物館參觀，博物館有好多建筑模型，不單只有志蓮靜苑，更包括好多在中國境內的唐代，以同樣建筑方法建成的建筑物（包括故宮同天壇）。仲有每一件部件構成整個結構的實物。可惜無書賣……如果有，就真系會買返本返屋企研究。

池院入面仲有其他不同的建筑、石頭（唔知有無人好似我地甘鐘意睇石頭……）同有一個盤景展覽，非常值得睇，好多好奇異的盤景，系難的一見。池院，仲有餐廳，（不過無入去食）。半日游，你一定唔會失望。

海洋公園

故地重游，依然覺得海洋公園非常正！ 

約咗個朋友齊齊去，一行四人，雖然我仲'pak’緊藥，不過都仲要去玩。系金鐘站坐巴士，唔記得幾錢…… 海洋公園入場209港幣，果陣系萬圣節，不過我都系日間去。但都好友萬圣節氣氛。

一到先去咗睇鳥，D鳥好多都唔怕人，都可以走到好近睇真D，之后無耐就玩做個搞到全體“濕身”的機動游戲，因為我地搞錯咗，將兩個最重磅擺咗系船頭，系激流中下沖個陣，因為頭重尾輕，D水照頭淋……差不多玩嘥所有機動游戲（有一、兩個太低能，所以唔玩），最正系部跳樓機！不過如果back bone 或有心臟病就真系咪玩，無謂傷身。

每個館都想多留一陣，因為真系好靚（非常鐘意海洋館，細個第一次去個陣已經好鐘意，依家都仲系非常留戀），見動物系最開心，雖然佢地唔可以系真的大自然環境里生活，不過一想到，好多人為的災難令佢地本來已經好難生存的地方更百上加斤后，系人工環境生活，其實多已經系唔錯。

中午飯”麥記“搞點，之前買個D飽都已經落曬肚，一人一飽，公主爹問價錢，佢眼都突出黎！有無搞錯？甘平！羅馬1/4價錢…… （返里羅馬之后佢唔再成日嘈話要去麥記）新果個“口者”理館（水母館，小樓子叫佢做“口者”理館）非常disco feel，差D唔舍得走。

睇咗熊貓，依家有4只，小樓子話新個對系剛剛到港，所以好多人都“樸”系到睇對新熊貓仔，又真系好鬼cute，其中一只好返瞓，成日塞只腳落另一只個口到。

玩咗成5個幾鐘，真系好鬼抵，仲玩得開心先好。

大嶼山一日游

公主爹趕住返香港，因為實在唔鐘意中國，最后果日就中午飯后，就走人（班機成7點幾），又驚塞車，所以早走咗，不過75人民幣由王府井到機場，半個鐘都唔洗。返到香港入住青衣的酒店都已經半夜，所以之后果日就近近地去咗大嶼山。

原本好想坐昂坪360，不過十月尾都未重開，所以去到東涌就坐巴士上大佛。因為系平日，所以都好品，我地三人，買做一日套票，30港幣1人，可以坐成日大嶼山的巴士，都幾抵。如果系假日應該系50港幣1人。

上大佛，公主爹好開心，不停甘影，因為終于有寺廟可以俾佢任影，雖然有D地方都唔可以影，不過佢已經好滿足。公主爹未接觸過佛教，第一次俾佢的感覺非常好。系寶蓮寺唔想走，佢覺得好平靜。

上大佛收費好似20+港幣，睇完外面，內面有博物館，都幾好睇，有大佛的建筑情況同記錄。張票之后可以去寶蓮寺小食部換小食，亦可買60港幣（好似仲有90港幣）的午餐。不過唔知公主爹鐘唔鐘意食，所以唔買午餐票。上完大佛，已經成2：00，去個小食部換“小食”，原本"林“唔會多得去邊，之后要落返去買其他嘢醫肚，俾張票位姐姐，問我地要乜點心，同要豆腐花定飲品，跟住已經見到3大盤麵！再加每人2件點心（定3件呢……唔記得），我要豆腐花，公主爹同小樓子要飲品。好飽之余都非常好味，點心都食唔完。公主爹其實唔想走，因為覺得真系好放松，靈魂得到安慰。不過多俾我地拖咗佢走。跟住系寶蓮寺對面坐巴士落大澳。

大澳，香港所余無幾的漁村，落巴士，就有人兜搭游客坐 船睇海豚，差不多有意想坐，不過小樓子話，條船甘嘈，海豚都走頭啦！又系啵，所以就凈系游漁村，公主爹就全程差不多掩住個鼻，佢頂唔順咸魚味不過就幾開心，因為見到好多新奇的事物，例如，香港人可以用汽車電池黎pump 氧氣俾D魚。同系市區見唔到的貓。乜香港D貓甘 細只？系羅馬D貓大咋……榕樹系一種奇觀，點解條漁村都甘干凈……游客區黎咖，傻佬！


大澳都由咗成2個鐘，本來計劃系落鴨寮街，不過到東涌果陣，突然間小樓子”醒起“樣嘢，東涌有個outlet，不如去逛下，如果有合心嘢就買，無就算啦。都好，東涌個outlet 好似叫東薈（我都話我記名系低能咖啦）。一行……2個鐘，買咗好多衫，不過系休閑服裝個部分，小樓子話仲有名牌（Guc i, Po o, CD 等）個邊未睇，不過我對名牌唔乜興趣，最鐘意個牌子叫 Si  ly 因為通常都會有我size。2個鐘頭，7、8袋出黎，用咗都唔夠2000港幣！我話小樓子，我地可以cancel 加連威老道個行程啦，要買的衫都都買齊，仲有驚喜！

已經累到死……加上有D頭疼，所以返青衣城快手食個日式晚餐就返酒店瞓…… 好在小樓子之前買做”辛x“傷風藥，開始"pak”藥的日子……

戰友 - 北京美好關系同回憶

呢篇無相，因為公主娘樣衰，所以同戰友影咗相，都無謂攞黎“嚇街坊”。
（戰友們都不是香港人所以這篇也不用廣東話語法寫）

北京最寶貴的回憶是在這里認識了這4個不離不棄的女“戰友”。工作上認識多好很要好的女朋友，不過這4個是真正的“戰友”，從北京的江山直打落上海。

我已經數不清，我究竟多少個通宵跟她們一齊度過，多少個周末跟她們埋頭苦干。做過多少個presentaion，多少個pitch…… 建立成功的品牌、喝了多少杯咖啡，多少個brainstrom 會議。還記得雪戰友說“我們倆真是一雙苦瓜，每次過大節，都只有我們倆在空蕩蕩的辦公室里干活。”我還說，“我們盡量早點走，別讓你愛人在家白發呆。” 我們兩個由星期一一直數，星期二、三、四、五、六、七、八、九、十到最高峰好像是二十一。我們不單在工作上互相幫忙，更是對方的好姐妹。每天噓寒問暖，關心大家的健康、未來、父母、愛人、孩子，一件很小的事，都能替對方高興上半天。

我們在差不多同一時間被“西宮”裁出“長城”。在落難的時候，我到上海，得到他們的幫助，我們還能有機會繼續合作。一幫非常有義氣的姐妹。我在中國得到她們很大的照顧和幫忙，鼓勵我尋找真正的幸福，讓我有機會把我該做的事情干好，安心離開到羅馬。她們教了我很多東西，在人生路上，我能認識真正的中華女性，真正流露著中華美德和美麗的女性，我覺得是很榮幸。

這一次再見到她們的時候，非常的感動，擁抱著她們的時候，我差不多掉淚。在那一刻，所有在那4年的美好時光（雖然是很嚴厲和痛苦），就一閃在腦海中略過。看到她們開心的活著，就覺得安心和快樂。

北京 - 大地盤

天安門 （請double click 這里看圖片）
原來去北京已經系成個幾月之前的事！要快D寫埋先……

北京城（請double click 這里看圖片）

表面功夫1
其實去北京，故地重游，有好多變化，好多地方都系到日夜趕工，好多新的大樓等等，因為聽說系12月30日之后，所有工程都唔可以繼續！所有大家都系到做好”表面功夫“，系限期前趕好個外觀，入面就可以08年先做……

表面功夫2
公主爹突然問我，點解北京D的士，個外殼好新，不過……果個搞窗唔系電動，系手動咖？佢唔講我又真系唔在意啵……又系啵，甘果日去完故宮，夜晚同第三位戰友吃飯（北京烤鴨，去咗……又唔記得個名添，系國際飯店對面，系長安大街上），就問問佢，佢話，系啊，D的士要“扮靚”迎奧運嘛，所以都凈做表面光功夫，入面無改咖……當然靚仔咗，連收費都貴啦，2002年大架D的士每公里收2皮，細架D收1.6皮。依家全部都收 2.2皮！不過我有時幾同情D的士佬，因為北京好多地方都唔準上客，唔同情佢地，系因為經常拒載同唔打咪鏢，就可以濫收車資。所以如果你上的士，架的士唔落鏢，你要提佢“師傅，請打鏢”，如果唔系佢可以亂收你錢。

表面功夫3警察，街上都好多公安，不過有事佢地都唔會出動咖，dummy 黎咖，我地見到系個十字路口，行人斑馬線上，有個中國婦女（明顯地唔系北京人）瞓咗系條斑馬線上痛哭，D車繞過佢走（個陣仲系好多車），無人停底理佢，公安？喂？公安？頭先有個系附近咖！仲唔過黎處理！都唔郁……。我地系的士到，叫個司機報公安，佢又唔理我地……

表面功夫4北京的夜晚俾以前明亮咗，以前長安大街入夜都好暗，依家，會以為去錯咗“拉斯維加斯”…… 不過北京都系換湯不換藥。D人都可以隨時系街上“就地開餐”。同會繼續見到D超級超載的單車……

表面功夫5打擊翻版？北京系非常鼓吹冒牌貨行業，點解？你去秀水街，以前系一條長街，全部賣冒牌貨，依家，秀水街上D檔口無曬，不過，只系搬咗去同一個地點的商場入面繼續叫賣冒牌貨！個日我無去（我同3個戰友starbugs 聚舊），公主爹由娘親同小樓子兩個左右護法磅住去（未免重演慕田峪事件）。我叫佢去見識下好啦，盡量唔好買嘢，唔想幫忙冒牌貨事業，最后佢都系用咗190人民幣買咗3件嘢返黎 …… 因為冒得太似，根本唔知系假貨……算啦，都買咗，佢過個講價癮就算。不過中國乜唔系同其他國家簽咗話管制冒牌貨嗎？定系我幻想出黎的新聞？？

一直唔記得（真系老咗，本來都已經無乜記性，依家仲衰D添），北京有一個地方值得去買嘢，系“潘家園”，“潘家園”有兩個部分，有一棟商城，賣舊貨，有D系茶壺同中國傳統嘢，當然就要“講價”。另一個部分系好似地攤，不過依家就比較有規范，“檔口”咗，大家如果鐘意買畫，系一個你會好開心的地方，因為非常平同都ok。公主爹用咗100人民幣（開價120人民幣）買咗張山水畫，1.3米x 0.68米，通常對住D賣畫，我都唔會殺價殺得太過分，因為有D真系已經超值，俾個畫家多D錢都應該。去潘家園地攤，最好早去，佢地開6：00，如果你可以9：00前去，就唔乜人，可以慢慢睇，過咗9：00 就好多人，凈系“睇頭”。

故宮 搶錢篇

故宮請double click 觀看圖片

故宮 - 我住咗系北京2年幾都無時間去過，今次重游北京，先有時間去，不過就感覺到 - 祖國啊，你真的那么恨錢嗎？

仲未上呢篇，已經見到Shar 話故宮乜都收錢，非常有同感，所以好快手寫呢篇。

搶錢1，故宮門口廁所1人民幣1人，都無所謂，要解決的事情就一定要做，但果個真系廁所，唔系洗手間，因為無得洗手！ 女游客比較好彩，因為都似個廁所，男游客就差好多。公主爹入到個廁所，仲以為去錯咗地方，因為方便的地方，系一個好似水槽的長不銹鋼盆。小樓子系第一個入廁所，出黎就話，入面無得洗手，好在，小樓子系“萬能叮當”個細細袋仔好似間藥房一樣，當然就有濕紙巾呢家嘢。

搶錢2 60人民幣入場，當然俾個個“紅螺寺”值回票價，不過漲得太離譜，我有朋友6個月前去，系40人民幣。2001、02年個陣都系20人民幣。以增長率黎睇，又漲得好離譜！

搶錢3 無好似shar 甘去珍妃井，因為小樓子去睇過（02年果陣系唔需要俾錢）佢話得個井，無乜特別，唔好曬腳骨力，所以我地兜落另一邊，因為見到有個牌寫住“珍寶館”，去到門口，先知道要俾60人民幣！ 橫豎都差不多行曬所有展覽館，開始覺得D嘢都差不多，所以無謂俾60人民幣又唔知有乜睇（經過紅螺寺的教訓，學精咗DD）。

戰友已經提醒我，故宮重修，好似最正個大殿就已經無得睇，不過黎到北京，就睇小D嘢都要貢入去睇睇啦。其實故宮有好多嘢都真系好正，不過衰在中國人唔識做presentation 同好多中國游客真系好離譜。所以搞到最后系無乜心機去睇。


我以前系北京做嘢果陣，好少到有中國游客出沒的地方，公司同事都好干凈，雖然有D都有大蒜味，不過都好輕微（的士就經常臭到飛起）。不過入到故宮，有幾隊”中國鴨仔團“，老遠已經有臭味。不過佢地人強馬壯，避都避唔開……

有玻璃的地方，入面無燈，好難怪D人就“癡”曬上D玻璃到“目及”嘢，不過好多中國游客，真系“咀"D 玻璃先恐怖，搞到D玻璃油淋淋返曬光，場面非常之嘔心……。

有D展覽廳明明寫住唔俾影相，中國游客（唔見有外國游客影）就一直影（仲要用閃光燈）到俾人鬧都唔停，到個保安到面前就好似老鼠見貓甘走都走唔切。

本來預計可以行5個鐘，因為實在好大。不過就系D甘嘔心的場面，加速腳步，快快走人，最后3個鐘就由御花園離開，本來想上景山，不過回頭一睇，兩大座大殿都俾綠色的網包住……睇乜吖……加上D鴨仔團恐怖臭味，公主爹覺得自己都臭咗，一定要返酒店沖涼，娘親就話好累，要休息休息，所以就走去快手食個中午飯（其實已經下午茶時間），之后就返酒店。

不到長城非好漢？？

慕田峪
依家上長城唔系難事，睇你去邊段的長城！10月去其實都唔錯，天氣好之余，風景都特別靚。

本來預計系去長城司馬臺，講講由北京出發可以到的長城先：
最近北京事市的系：八達嶺（大概半個鐘都可以到）
比較遠DD：慕田峪（正常1個鐘）
再遠D：司馬臺（成2個鐘）

我好鐘意司馬臺，大大話話都去過3、4、5、6次（唔記得，因為有朋友黎北京探我，都俾我拖咗去司馬臺，所以都數唔清去咗？次）。因為系最無俾人”維修“過的長城，系最三段中最原始的一段，冬天非常靚，不過要好多體力先上到，因為好斜。長城下有小溪同馬匹，好友塞外風情。

八達嶺，同小樓子去過一次，之后都咪搞我，最”人工化“，修理得太”新正“無曬味道。人又多，乜遠景都唔系好睇到。加上非常多商業活動，所以走都走唔切。

慕田峪，系以上兩段長城的”中間“，唔會太人工化，當然就唔系甘原始。

之前果晚同戰友食飯，梁戰友極力推薦去慕田峪，回想起黎，其實應該多謝佢甘細心，一眼見到有我阿娘親同行，娘親身體麻麻，所以上司馬臺，可能真系比較攞命。之后同公主爹商量，佢都話見娘親凈坐飛機都可以甘累，都擔心佢上唔到司馬臺，所以就改咗去慕田峪。

北京的士佬都幾“倫盡”，之前約果個無時間，臨時搵佢朋友黎。遲到半個鐘，仲唔知做乜接錯人…… 又要打電話搵番佢翻來……搞到成10：00先離開酒店。離開酒店，先去買”糧草“。因為公主爹腸胃敏感，所以好多嘢都唔敢俾佢食，娘親早餐搞掂，午餐可以簡單D。所以又走去中糧廣場到‘入貨”兩大瓶水同starbugs 三明治。之后就出發，見去中糧個陣都無乜塞車，以為星期六會暢通……點知……2個鐘先到……系市郊整路，塞咗成個鐘。

慕田峪 - 可以坐有纜車上，所以非常簡單地大家都成為“好漢”！架纜車好似香港海洋公園個款，幾分鐘就到，我買單程票，上辛苦D落就容易，都要郁下娘親，行下對身體好吖。我記得我去親長城都無俾“入場費”，上次去慕田峪都好似無俾錢，可以自由上。乜改咗？4個人單程纜車加入場費供320人民幣（1頭80人民幣），是但啦，第一次同娘親同公主爹出游，浪費D都無乜所謂。香山紅葉，其實都唔一定上香山睇，今次系慕田峪都睇到（請睇相）。算系甘啦，因為小樓子都未上過慕田峪。所有收獲可以算唔錯。我地正宗“慢游派”都游蕩咗好耐先落黎，中途就系人地玩“落山兜”個位毀滅咗午餐，因為大家都好好奇，想睇有無人會跌出個兜，不過唔乜人玩，所以見唔到。落到“商業區”，我好自然就走前搵個的士佬，但突然小樓子好大聲叫停我，因為有個”阿姨“拉住公主爹買T-shirt。點都唔放手，我走埋去，問幾錢，佢唔理我，唔緊要，我咪問公主爹啰，條傻佬想俾70人民幣買件寫住我上過長城同有長城樣的霉T-shirt。當然就俾我制止，當個阿姨拎轉頭攞個陣，就好快手拖走公主爹、小樓子就同娘親好手快腳離開事發現場！公主爹仲唔明我地點解拖佢走（佢手上已經落咗錢出黎），我叫佢自己睇，跟住個檔寫住”10人民幣“同一件T-shirt。不過最后佢都無買，因為俾我嚇佢，件T-shirt洗兩嘢就玩完，同你點知邊個”逗“過件衫。
的士佬話我地真系好”慢游“俾平常D客游多2個鐘。慢慢睇吖嘛，之后就話附近有間”紅螺寺“，好多人去。我未去過（其實以前系北京住個陣都唔聽過有間甘嘢），所以又去下啰。40人民幣入場費。有嘢睇就話，我娘親系門口已經話唔去，不過都到門口，就入去啦。不過有嘢睇果段維修唔開！之后我同小樓子同娘親就悶咗個半鐘，公主爹就樣樣都新鮮，所以都ok，不過佢好唔滿意一樣嘢，明明系寺院，點解搞到好似游樂場甘，D人可以好似大叫大嚷，同D人坐上D雕塑上影相，每樣嘢都收錢，同好似游樂場甘玩…… 無嘢講……因為佢無講錯…… 橫豎都悶親大家，不如早D返歸，驚又塞車，個的士佬問我攞多D錢。
回程，好在早走……又塞車……奇景！D車上行人路上飛馳！緊急通道都塞車！羅馬D司機其實已經好”規矩“（比起北京）……無驚無險剛剛好用緊的士佬個8個鐘就到酒店。沖個涼之后，又要同小樓子”腦力激蕩“Brain storm 去邊吃飯…… 咪有系最后返”恒基中心“啰。